Morag dalugdog ang kabanha sa ilang pagdagan! Klaro kaayo ang pagkaasoy sa Bibliya niining upat ka kabayo ug sa mga nagsakay niini! Unang migula ang puting kabayo, nagsakay niini ang gipasidunggan ug bag-ong gikoronahang hari. Sunod nga migula ang kabayo nga samag kalayo ang kolor, ug ang nagsakay niini nagkuha sa kalinaw sa yuta. Dayon misunod ang ikatulong kabayo nga itom ug kolor, ug ang nagsakay niini may dalang timbangan nga nagsimbolo sa makapasubong mensahe bahin sa kanihit sa pagkaon. Pagkahuman, migula ang ikaupat nga kabayo. Luspad kinig kolor, nga timailhan sa epidemya sa makamatayng mga sakit. Ug ang nagsakay niini ginganlag Kamatayon. Nagsunod niini ang Hades, ang komon nga lubnganan sa tawo, nga naglamoy sa daghang nangamatay!​—Pinadayag 6:1-8.

“Nahadlok ko dihang akong nabasa ang bahin sa upat ka mangangabayo. Gibati nakong duol na kaayo ang Adlaw sa Paghukom ug kay dili pa ko andam, dili gyod ko maluwas.”​—Crystal.

“Nainteres ko sa upat ka mangangabayo nga nagsakay sa mga kabayo nga lainlaig kolor. Dihang akong nasabtan ang kahulogan sa panan-awon, mas naapresyar nako ni.”​—Ed.

Parehas ba kang Crystal ang imong gibati bahin sa upat ka mangangabayo? O parehas kang Ed? Bisan hain niana, ang upat ka mangangabayo maoy usa sa pinakapopular nga panan-awon sa Pinadayag, ang kataposang basahon sa Bibliya. Nahibalo ka ba nga makabenepisyo ka kon imong masabtan kini nga panan-awon? Ngano? Gisaad sa Diyos nga mabatonan nimo ang tinuod nga kalipay pinaagi sa pagbasa, pagtuon, ug pag-aplikar sa mga nasulat sa maong basahon sa tagna.​—Pinadayag 1:1-3.

Bisag ang uban nahadlok sa panan-awon bahin sa upat ka mangangabayo, kini wala gisulat aron hadlokon ka. Gani, kini nagpalig-on sa pagtuo sa daghan ug naghatag kanilag nindot nga paglaom sa umaabot. Mapalig-on sab ka niini! Palihog basaha ang sunod artikulo.