Ang pulong disiplina nagpasabot ug paggiya o pagtudlo. Usahay, naglakip ni ug pagtul-id sa dili maayong batasan sa anak. Pero sagad, naglakip kini sa pagtudlog maayong pamatasan nga makatabang sa anak sa paghimog maayong mga desisyon.

Sa di pa dugayng katuigan, ang disiplina halos nawala na diha sa ubang pamilya, kay ang mga ginikanan nahadlok nga kon disiplinahon ang mga anak basin kini makapaubos sa ilang kompiyansa sa kaugalingon. Pero, ang maayong mga ginikanan magtakdag balanseng mga balaod ug magbansay sa ilang mga anak sa pagsunod niana.

“Kinahanglang tudloan ang mga anak kon unsay angay ug dili angayng buhaton kay makatabang ni inigkadako nila. Kon walay pagdisiplina, ang mga anak samag barko nga walay timon​—nga walay hustong direksiyon o maunlod pa gani.”​—Pamela.

Ihatag ang nahiangayng disiplina. Kon dili mosunod ang imong anak sa imong mga balaod, ihatag ang nahiangayng disiplina. Pero kon gisunod sa imong anak ang imong mga balaod, dayega siya.

“Kanunay nakong dayegon ang akong mga anak tungod sa ilang pagkamasinundanon nga talagsa na lang kaayo karon. Kon dayegon nimo sila, mas dali silang modawat ug disiplina.”—Christine.

PRINSIPYO SA BIBLIYA: “Kon unsay gipugas sa usa ka tawo, mao pod ang iyang anihon.”​—Galacia 6:7.

Magmabalanse. Dihang magdisiplina, ipahaom kana sa edad ug abilidad sa anak ug sa kaseryoso sa sayop nga iyang nahimo. Ang mga silot sagad epektibo kon konektado kini sa nahimong sayop​—pananglitan, kon dili sila mosunod sa imong mga balaod sa paggamit ug cellphone, embargoha kana o limitahe ang ilang paggamit niana. Pero ayaw sab ug kasuko dayon sa ginagmay nilang mga sayop.

“Sayron usa nako kon gituyo ba gyod sa akong anak ang dili niya pagsunod o nakahimo lang ba siyag sayop nga desisyon. Dunay kalainan ang balikbalik nga paghimo sa sayop nga kinahanglang tul-iron ug ang sayop nga kinahanglan lang ipaamgo.”​—Wendell.

PRINSIPYO SA BIBLIYA: “Ayaw palagota ang inyong mga anak, aron dili sila maluya.”​—Colosas 3:21.

Magmahigugmaon. Mas daling dawaton ug sundon sa mga anak ang disiplina kon nahibalo sila nga gihatag kini tungod sa gugma sa ilang ginikanan.

“Dihang masayop ang among anak, amo siyang pasaligan nga proud mi niya tungod sa maayong mga desisyon nga iyang nahimo sa miagi. Amo siyang sultian nga ang iyang sayop dili makadaot sa iyang reputasyon kon iya kanang tul-iron ug nga andam mi sa pagtabang niya sa paghimo niana.”​—Daniel.

PRINSIPYO SA BIBLIYA: “Ang gugma taas ug pailob ug maayo.”​—1 Corinto 13:4.