Ang Bibliya Makabag-o sa Kinabuhi

Unsay nakapausab sa usa ka babayeng kawatan ug ismagler ug diamante nga mahimong usa ka matinud-anong empleyado? Unsay nakatabang sa usa ka babaye nga misulay sa paghikog sa duha ka higayon nga makaplagan ang katuyoan sa iyang kinabuhi? Sa unsang paagi ang usa ka palahubog ug adik sa droga nakabatog kusog sa pagbiya sa iyang makadaot nga mga bisyo? Tagda kon unsay ilang ikasulti bahin niini.

NGALAN: MARGARET DEBRUYN

EDAD: 45

NASOD: BOTSWANA

KANIADTO: ISMAGLER UG KAWATAN

KAAGI: Taga-Germany ang akong amahan apan nahimong lungsoranon sa Habagatan-Kasadpang Aprika (Namibia na karon). Ang akong inahan taga-Botswana, sa tribo sa Mangologa. Ako natawo sa lungsod sa Gobabis, sa Namibia.

Sa katuigan sa 1970, ang kagamhanan sa Habagatang Aprika nagkontrolar pag-ayo sa Namibia ug estriktong nagpatuman sa balaod sa pagpihig sa rasa sa tanang kalungsoran ug kabaryohan. Tungod kay dili managsamag rasa ang akong mga ginikanan, gipugos sila sa pagbulag. Busa namauli mi sa akong mama kauban sa akong mga igsoon, ug mipuyo mi sa Ghansi, sa Botswana.

Niadtong 1979, mibalhin ko sa Lobatse, Botswana, ug mipuyo uban sa nagsagop kanako samtang gitapos nako ang akong pagtungha. Sa ulahi, nakatrabaho ko ingong klerk sa usa ka talyer. Sukad sa akong pagkabata, nagtuo ko nga ang Diyos dili magtagana sa panginahanglan sa mga tawo, ug mahimo nimo kon unsay imong gusto—husto o sayop—aron ikaw ug ang imong pamilya mabuhi.

Sanglit nahimo akong sinaligan diha sa trabahoan, kini akong gipahimuslan aron makapangawat ug mga piyesa. Sa dihang moagi ang tren sa lungsod inigka-gabii, manakay mi sa akong mga kauban ug mangawat sa bisan unsa nga among madala. Nagbaligya kog mga diamante, bulawan, ug bronse sa ilegal nga paagi. Misugod ko sa pag-abuso sa droga, nahimong bangis kaayo, ug daghag trato.

Dayon niadtong 1993, nawad-an kog trabaho tungod kay nasakpan ko nga nangawat. Gibiyaan ko sa akong mga barkada, kay nahadlok nga basin masakpan sab sila. Nasakitan ko sa ilang gihimo, mao nga nawad-an kog pagsalig sa tanang tawo.

KON SA UNSANG PAAGI GIBAG-O SA BIBLIYA ANG AKONG KINABUHI: Niadtong 1994, nahibalag nako si Tim ug Virginia, mga misyonaryo sa mga Saksi ni Jehova. Sa tingpaniudto mag-estoryahanay  mi didto sa bag-o nakong gitrabahoan, ug ila kong gitudloan bahin sa Bibliya. Sa ulahi, mibati kog pagsalig nila, busa miuyon ko nga moadto sila sa balay aron ipadayon ang akong pagtuon sa Bibliya.

Wala madugay akong nahibaloan nga kon gusto nakong pahimut-an ang Diyos, kinahanglang usbon ko ang akong pagkinabuhi. Pananglitan, nakat-onan nako ang giingon sa 1 Corinto 6:9, 10 nga “walay mga makihilawason, . . . ni mga kawatan, ni mga tawong dalo, ni mga palahubog, ni mga tigsultig pasipala, ni mga mangingilkil ang makapanunod sa gingharian sa Diyos.” Hinayhinay nakong gihunong ang akong mga bisyo. Miundang ko sa pagpangawat. Mihunong ko sa pagpakig-uban sa mga membro sa gang nga dugay nakong gipakig-ubanan. Dayon, uban sa tabang ni Jehova, akong gibulagan ang akong mga trato.

MGA KAAYOHAN NGA AKONG NABATONAN: Uban sa dakong paningkamot, akong nakat-onan ang pagkontrolar sa akong kasuko nga dili mosingka sa akong mga anak kon sila masayop. (Efeso 4:31) Naningkamot ko nga mosulti nga kalmado. Maayo kaayo ang resulta niini ug mas nasuod ang relasyon sa among pamilya.

Ang akong mga higala kanhi ug bisan ang akong mga silingan misalig na kanako. Ako karon usa na ka matinud-anon ug sinaligang empleyado nga mainampingong nagdumala sa mga suplay ug salapi. Busa, natagan-an nako ang akong kaugalingon samtang akong gigugol ang daghang panahon sa pagtabang sa uban nga makakat-on sa Bibliya. Mouyon gayod ako sa mga pulong sa Proverbio 10:22: “Ang panalangin ni Jehova—mao kana ang makapadato, ug dili niya kana dugangan ug kasakit.”

NGALAN: GLORIA ELIZARRARÁS DE CHOPERENA

EDAD: 37

NASOD: MEXICO

KANIADTO: MISULAY SA PAGHIKOG

KAAGI: Nagdako ko sa adunahang lugar sa Naucalpan, nga Estado sa Mexico. Sukad sa pagkabata, rebelyoso na kaayo ko ug gustong moadto sa mga parti-parti. Nakakat-on ko sa pagpanigarilyo sa edad nga 12, pag-inom ug bino sa edad nga 14, ug sa paggamit ug gidili nga mga droga sa edad nga 16. Pipila ka tuig sa ulahi, milayas ko sa among balay. Kasagaran sa akong mga higala naggikan sa gubot nga mga pamilya, nga giabusohan sa pisikal o sa binaba nga paagi. Daw wala gayoy paglaom ang kinabuhi alang kanako, nga tungod niana duha ka higayon nga ako misulay sa paghikog.

Pag-edad nakog 19, nagtrabaho ko ingong usa ka modelo. Tungod niana, ako nakig-uban sa mga politiko ug mga artista sa sosyal nga mga okasyon. Sa kadugayan naminyo ko ug nakabatog mga anak, apan ako ang masunod sa among pamilya. Wala ko miundang sa akong mga bisyo sa pagpanigarilyo ug pag-inom, ug nakighugoyhugoy gihapon kanunay sa akong mga barkada. Law-ay kaayo kong manulti, ug bastos ang akong mga komedya. Dali ra kaayo kong masuko.

Kadaghanan sa akong mga kauban pareho nakog paagi sa pagkinabuhi. Alang kanila, morag naa na kanako ang tanan. Apan gibati gihapon nako ang kahaw-ang, nga daw walay katuyoan ang akong kinabuhi.

KON SA UNSANG PAAGI GIBAG-O SA BIBLIYA ANG AKONG KINABUHI: Ako nagtuon sa  Bibliya uban sa mga Saksi ni Jehova niadtong 1998. Nakat-onan nako nga ang kinabuhi aduna gayoy katuyoan. Nahibaloan nako nga katuyoan sa Diyos nga ibalik ang Paraiso sa yuta ug banhawon ang mga patay, ug mahimo akong makapahimulos niini sa umaabot.

Nahibaloan usab nako nga kinahanglan nakong sundon ang Diyos aron madayag ang akong gugma kaniya. (1 Juan 5:3) Nalisdan ko niini sa sinugdan sanglit dili man ko modawat ug tambag ni bisan kinsa. Apan sa kataposan, akong naamgohan nga dili nako magiyahan ang akong kinabuhi sa ako lang kaugalingon. (Jeremias 10:23) Nag-ampo ko sa giya ni Jehova. Mihangyo ko nga iya kong tabangan nga magkinabuhi sumala sa iyang mga sukdanan ug tudloan ang akong mga anak nga dili mosundog sa akong pagkinabuhi kaniadto.

Lisod gayod alang kanako ang paghimo sa gikinahanglang mga kausaban, apan akong gipadapat ang tambag nga mabasa sa Efeso 4:22-24: “Inyong hukason ang daan nga pagkatawo nga nahiuyon sa kanhi ninyong paagi sa panggawi . . . ug magsul-ob sa bag-ong pagkatawo nga gilalang sumala sa kabubut-on sa Diyos sa matuod nga pagkamatarong ug pagkamaunongon.” Alang kanako, ang pagsul-ob ug bag-ong pagkatawo nagpasabot sa pag-undang sa hugaw nga bisyo sa pagpanigarilyo, ug pag-usab sa akong malaw-ay nga sinultihan. Halos tulo ka tuig nga ako naningkamot sa pagbag-o aron mabawtismohan ingong usa sa mga Saksi ni Jehova.

Dugang pa, gituman na nako ang akong papel ingong asawa ug inahan. Akong gipadapat ang tambag sa 1 Pedro 3:1, 2: “Kamong mga asawa, magpasakop kamo sa inyong mga bana, aron nga, kon aduna may dili-masinugtanon sa pulong, sila makabig nga walay pulong pinaagi sa panggawi sa ilang mga asawa, tungod kay mga saksing-nakakita sa inyong maputling panggawi uban ang halawom nga pagtahod.”

MGA KAAYOHAN NGA AKONG NABATONAN: Mapasalamaton kaayo ko kang Jehova nga akong nahibaloan karon ang katuyoan sa kinabuhi. Mibati ko nga ako nahimong mas maayong tawo ug mapadako na nako ang akong mga anak sa maayong paagi. Usahay makonsensiya ko sa akong nahimo kaniadto, apan nasayod si Jehova kon unsay anaa sa akong kasingkasing. (1 Juan 3:19, 20) Ang pagkinabuhi sumala sa mga prinsipyo sa Bibliya nanalipod gayod kanako gikan sa kadaot ug nakahatag kanakog kalinaw sa hunahuna.

NGALAN: JAILSON CORREA DE OLIVEIRA

EDAD: 33

NASOD: BRAZIL

KANIADTO: PALAHUBOG UG ADIK SA DROGA

KAAGI: Natawo ko sa Bagé, usa ka siyudad sa Brazil nga dunay halos 100,000 ka molupyo nga nahimutang duol sa utlanan sa Brazil ug Uruguay. Ang pangunang panginabuhian maoy pagpananom, ug pagpamuhig baka. Nagdako ko sa kabos nga distrito diin ang mga gang bangis kaayo, ug kasagaran sa mga batan-on mga palahubog ug mga adik sa droga.

Sa dihang miundang ko sa pag-eskuyla, misugod ko sa pag-inom-inom, pagpanabako ug marijuana, ug pagpaminawg rock nga musika. Dili ko motuog Diyos. Nagtuo ko nga ang tanang pag-antos ug kagubot maoy pamatuod nga walay Diyos.

Ako gitarista ug tigkomposog kanta, ug kasagaran madasig ko sa paghimog kanta pinaagi sa pagbasa  sa Pinadayag diha sa Bibliya. Wala mosikat ang among banda sumala sa akong gidahom, busa misamot pa ang akong pagkaadik sa droga. Wala ko mahadlok nga mamatay sa sobrang paggamit niini. Daghan sa akong idolong mga mang-aawit namatay nianang paagiha.

Aron makapalit ug droga manghulam kog kuwarta sa akong lola, nga maoy nagpadako kanako. Mamakak ko kon mangutana siyag unsay akong gamitan sa kuwarta. Misamot ang kahimtang sa dihang nalangkit ko sa espiritismo, kay nagtuo nga kana makatabang kanako nga makakomposo ug maayong mga kanta.

KON SA UNSANG PAAGI GIBAG-O SA BIBLIYA ANG AKONG KINABUHI: Sa dihang nagtuon ko sa Bibliya ug nagtambongan sa mga tigom sa mga Saksi ni Jehova, ang akong panglantaw ug kinaiya nausab. Inanay nakong naugmad ang tinguha nga mabuhi ug mahimong malipayon. Tinukmod sa bag-ong kinaiya, nakahukom ko nga paputlan ang taas nakong buhok. Ako kining gipataas kaniadto ingong timailhan sa akong pagka-dili kontento ug pagkarebelyoso. Dayon akong nahibaloan nga aron dawaton sa Diyos ang akong pagsimba, kinahanglang moundang ko sa paghuboghubog, pag-abuso sa droga, ug pagpanigarilyo. Kinahanglan usab nakong bag-ohon ang matang sa akong musika.

Sa unang higayon nga mitambong kog tigom sa mga Saksi ni Jehova, namatikdan nako ang teksto sa Bibliya nga gidispley diha sa bungbong. Kini ang mabasa sa Proverbio 3:5, 6: “Salig kang Jehova sa bug-os mong kasingkasing ug ayaw pagsalig sa kaugalingon mong pagsabot. Sa tanan mong mga dalan tagda siya, ug siya magatul-id sa imong mga alagianan.” Kini nga teksto sa Bibliya nagpasalig nga si Jehova motabang kanako sa pagbag-o sa akong kinabuhi, kon siya akong alagaron.

Apan lisod kaayo kon akong usbon ang naandang pagkinabuhi ug undangon ang akong mga bisyo. Kini sama ra nga akong putlon ang akong kamot. (Mateo 18:8, 9) Dili nako kini mahimo nga inanay. Nasayod ko nga dili kana mosaler sa akong kahimtang. Busa gihunong dayon nako ang tanan nakong mga bisyo. Gilikayan usab nako ang tanang dapit ug mga tawo nga makahaylo kanako sa pagbalik sa akong makadaot nga pagkinabuhi kanhi.

Nalipay ko sa akong pag-uswag, ug wala nako tagda ang pagkaluya sa buot. Kinahanglang hinlo ako sa pisikal, moral, ug espirituwal aron makabaton kog maayong baroganan atubangan ni Jehova. Nag-ampo ko ug nangayog tabang kang Jehova nga makalimtan nako ang akong mga kalihokan kanhi ug molantaw sa unahan. Usahay, madani ko sa pag-inom ug bino, apan mamugos gihapon ko sa nagtudlo kanako sa Bibliya nga magtuon mi bisag nalipong pa ko.

Ang pagkakat-on sa kamatuoran bahin sa Diyos diha sa Bibliya—nga siya nagmahal sa matag usa kanato, nga iyang laglagon ang bakak nga relihiyon, ug siya karon nagpaluyo sa tibuok kalibotang pagsangyaw nga buluhaton—nakatabang kanako. (Mateo 7:21-23; 24:14; 1 Pedro 5:6, 7) Kini nga kamatuoran haom kaayo nga samag mga piyesa sa puzzle. Sa kataposan ako mihukom sa pagdedikar sa akong kinabuhi ngadto sa Diyos. Gusto kong magpasalamat sa tanan niyang gihimo kanako.

MGA KAAYOHAN NGA AKONG NABATONAN: Akong nahibaloan karon nga ang akong kinabuhi aduna nay katuyoan ug kahulogan. (Ecclesiastes 12:13) Mitabang na ko sa mga panginahanglan sa among pamilya inay nga magsigeg pabug-at nila. Gipaambit nako ang akong nakat-onan sa Bibliya ngadto sa akong lola, ug iya nang gidedikar ang iyang kinabuhi kang Jehova. Daghang membro sa among pamilya ug ang usa ka membro sa akong banda kanhi nagdedikar usab sa ilang mga kinabuhi kang Jehova.

Minyo na ako karon ug gigahin namo sa akong asawa ang kadaghanan sa among panahon sa pagtabang sa uban nga makakat-on sa Bibliya. Gibati gayod nako ang abundang panalangin ni Jehova tungod kay nakakat-on ako sa ‘pagsalig kaniya sa tibuok kong kasingkasing.’

[Blurb sa panid 29]

“Inanay nakong naugmad ang tinguha nga mabuhi ug mahimong malipayon”