Me ren Jon 9:1-41
9 Atun a fetáleló, a kúna emén mwán mi chuun seni an uputiw.
2 Me néún kewe chón káé ra eisini: “Rappai, ié a tipis, ei mwán are seman kewe me inan pwe iei a uputiw nge mi chuun?”
3 Jises a pélúweni: “Esap ei mwán a tipis are seman kewe me inan, nge a ina ussun pwe án Kot kewe angang repwe pwápwááló ren i.
4 Atun mi chúen rán, a lamot sipwe féri ekkewe angang án ewe Emén mi tiinieito. Ewe kiroch epwele war atun esap wor emén a tongeni angang.
5 Úkúúkún ái nónnóm wóón fénúfan, ngang ewe saramen fénúfan.”
6 Mwirin an apasa ekkeei mettóch, a attufetiw lepwúl me féri och pwakak ren ewe attuf, me a tóóf ngeni mesen ewe mwán kewe,
7 me apasa ngeni: “Kopwe feiló ores lón ewe watteen leenien isoisen konik Siloam” (weween “Kúnéló”). Iwe a feiló me ores, me a liwinsefál nge a kúna mwan.
8 Iwe, chón órun kewe me pwal chókkewe mi piin kúkkúna pwe i emén mi soutingor, ra poputá le apasa: “Iei i ewe mwán a kan mómmóót me tittingor, iká met?”
9 Ekkóch ra apasa: “Iei i.” Ekkóch ra apasa: “Aapw, a chék nikinikin.” Ewe mwán a apasa: “Ngang i.”
10 Iwe ra eisini: “Iwe, ifa ussun ka kúna mwom?”
11 A pélúweni: “Ewe mwán itan Jises a énénú och pwúl me tóóf ngeni mesei me ereniei, ‘Kopwe feiló Siloam me ores.’ Iwe, úa feiló me ores me úa kúna mwei.”
12 Ren ei ra ereni: “Ifa i ena mwán?” A apasa: “Úse silei.”
13 Ra emmwenaaló ren ekkewe Farisi ena mwán mi chuun me mwan.
14 A sereni ránin Sapat, ewe rán Jises a énénú ewe pwúl me ánennelóói mesan.
15 Iwe, lón ei atun ekkewe Farisi ra pwal poputá le eisini ewe mwán ifa ussun a kúna mwan. A ereniir: “A tóóf ngeni mesei och pwakak, me úa ores, me úa tongeni kúnaei.”
16 Mwirin, ekkóch me lein ekkewe Farisi ra poputá le apasa: “Ei mwán ese feito seni Kot, pún iei ese apwénúetá ewe Sapat.” Ekkóch ra apasa: “Ifa ussun án emén mwán mi tipis epwe tongeni féri ekkena esin manaman?”* Iwe, a wor tipefesen lefiler.
17 Me ra pwal ereni ewe mwán mi chuun: “Pokiten mesom ekkena i a ánennelóói, iwe met meefiom ussun i?” Ewe mwán a apasa: “I emén soufós.”
18 Iwe nge, ekkewe chón Jus rese lúkú pwe ei mwán mi chuun me mwan nge iei a kúna. Ra kérato seman kewe me inan
19 me ra eisiniir: “Iei i néúmi we oua erá pwe mi chuun seni leuputiwan? Iwe ifa ussun a kúna iei?”
20 Seman kewe me inan ra pélúweni: “Ám mi silei pwe iei i néúm we me a chuun seni leuputiwan.
21 Nge ren ifa ussun an a kúna iei, áúse silei, are ié a ánennelóói mesan kewe, áúse silei. Oupwe kapas eis ngeni. A watte ierin. A tongeni pwisin kapas.”
22 Seman kewe me inan ra apasa ekkeei mettóch pún ra niwokkusiti ekkewe chón Jus. Pún ekkewe chón Jus ra fen etipeeúfengen pwe iká emén epwe apasa pwe Jises ewe Kraist, ena emén epwe katowu seni ewe sinakok.
23 Iei popun seman kewe me inan ra apasa: “A watte ierin. Oupwe kapas eis ngeni.”
24 Iwe, iei oruuen atun ra kéri ewe mwán mi chuun me mwan, me ereni: “Kopwe elingaaló Kot ren óm apasa ngenikem ewe enlet. Ám mi silei pwe ei mwán emén chón tipis.”
25 A pélúweni: “Iká i emén chón tipis, ngang úse silei. Eú chék mettóch úa silei, ngang mi chuun, nge iei úa tongeni kúnaei.”
26 Mwirin, ra eisini: “Met a fér ngonuk? Ifa ussun a ánennelóói mesom kana?”
27 A pélúweniir: “Úa fen erenikemi, nge ouse rongorong. Pwata oua pwal mochen rongsefál? Met, oua pwal mochen wiliiti néún chón káé?”
28 Ren ei ra turunufasa le ereni: “En néún ena mwán chón káé, nge ám néún Moses chón káé.
29 Áúa silei pwe Kot a kapas ngeni Moses, nge ren ei mwán, áúse silei ia a feito me ie.”
30 Ewe mwán a pélúweniir: “A wesen ámáirú ei, pwe ouse silei ia a feito me ie, nge i a ánennelóói mesei.
31 Sia silei pwe Kot ese kan aúseling ngeni chón tipis, nge iká emén a niwokkusiti Kot me féri letipan, i epwe aúseling ngeni ei emén.
32 Seni lóóm sise fókkun rong ussun án emén ánennelóói mesen emén mi chuun seni leuputiwan.
33 Iká ei mwán esap feito seni Kot, esap tongeni féri och mettóch.”
34 Lón ar pélúweni ra ereni: “Ka uren tipis atun ka uputiw nge iei ka asukulakem?” Iwe, ra oturawu lúkún!
35 Jises a rong pwe ra oturawu i lúkún, iwe atun a kúna i, a apasa: “Ka lúkú lón ewe Néún aramas?”
36 Ewe mwán a pélúweni: “Kese mochen ereniei iká i ié, pwe úpwe lúkú lón i.”
37 Jises a ereni: “Ka fen kúna i, me ren enletin, i ewe emén a fóffós ngonuk.”
38 A apasa: “Samol, úa lúkú lón i.” Me a asamolu* i.
39 Mwirin, Jises a apasa: “Úa feito ngeni ei fénúfan pwe ekkewe mettóch úa féri repwe efisi pwe ekkewe mi chuun repwe kúna mwer me ekkewe mi kúna mwer repwe chuun.”
40 Ekkóch ekkewe Farisi mi nóm ren ra rong ekkeei mettóch, me ra ereni: “Met, ám áúa pwal chuun?”
41 Jises a ereniir: “Iká oua chuun, ese wor ámi tipis. Nge iei oua erá, ‘Ám mi kúna mwem.’ Ámi tipis mi chék nónnóm.”
