˗Zlan ꞊dede ˈnën ˈö ˗tɔ pë ˈˈpɛpɛ ˗Damɛn. ˗A ˗bha ˗këdhösü züdɔdhɛ ˈyaa ˈdhö ɛɛnˈˈ ˗a ˈˈdhiʋ̈todhɛ yö ˈti ˗dho kë toŋtoŋdhö. (Psaume 90:2) Nɔɔn˗ ˗së ˗nu ˈwo go Biblö ˈgü bhë, ˗wo ˗go ˗a ˈˈpiʋ̈. (1 Timote 1:11) Kë ˈö˗ wo ꞊dhɛ ˗Zlan ˈnën ˈö kwa ˗da bhë, yö dosɛnŋ ˈnën kwa dua ˈdhö ˗mü kö ˈkwa ˗a gba.​—˗Dhɛkpaɔ dhiaˈˈ ˈsëëdhɛ 4:11 ˗wo pö.

Mɛnbhɩɩdhe ˈbha yö ˈti ˗kpan ˗Zlan ˗bha do, ˈyö ˗tɔ ꞊dhɛ ˗zuu ˗mü ˗a ˈka. ˗Zuu ˈnën ˈö ˗tɔ ˗këdhösü ˈö ˈkpii˗ ˈö ˗ʒiö ˗a ˈka ˗këdhösü ˈˈpɛpɛ ˈwo ˈˈkpɔnŋ ꞊taa ˗an ˗ta. (Zan 1:18; 4:24) ˈKö ˗kë ˈˈdhʋ̈ kwa ꞊mɔɔn˗ ˗bha ˈkwa ˗Zlan ˗bha ˈˈklʋʋsë ˗nu yö ˗a ˗dapë ˗nu ˗bha. Kwa˗ ˗bha ˗dhɔ waa˗ ˗bha ˈwɔndɔdhe ˗nu ˗yö ˈˈdhübhɛ ꞊va waa ꞊blëë ˈˈbin ˗nu ˈö ˗an ˗da bhë ˗an ˗bha. ˗Kɔ ˈö dhaŋ˗ waa ˈˈkpɔnŋtaadhɛ ˈwo˗ ˈka, ˗yö ˗a ˗bha ˈˈpiigbɩɩdhɛ ˗zɔn kwa ˗dhɛ.​—Wlɔmö 1:20 ˗wo pö.

Kwa ꞊mɔɔn˗ ˗bha ˈkwa ˗Zlan ˗bha ˈˈklʋʋsëdhɛ ˈbhaa ˗nu dɔ ˈzü Biblö ˗wo pö ˗sü ˈka. ˗A ˈwɔnzuan ˈtɔ˗ ꞊dhɛ, ˗yö pë ˗nu ˈö˗ ˗dhɔ ˗Zlan ˗kë waa ˗a ˗dhɛ ˗nu ˈö˗ ˗san ˗ya ˗kë ˗an ˗zɔn kwa ˗dhɛ. ˗Yö ˗kɔ ˈö ˗Zlan mɛn ˗nu kun ˗a ˈka waa ˗kɔ ˈö ˈwɔn ꞊suu ˈˈpɛpɛ kun ˗a ˈka, ˗ya ˗zɔn ˈpö.​—Psaume 103:7-10 ˗wo pö.

Yesu ˗ya ˗pö: “Yi Dë [...] ˈi ˗ya ˗sü ˈka dhang˗ ˗nu ˈgü, i ˈtɔ ˈö ˈˈslʋ̈ʋ̈slʋ̈ bha ˗yö bhɔ ˗dhɛ ꞊gban ˈˈpɛpɛ ˈgü.” (Matiö 6:9) ˈKö ˗kë ꞊dhɛ ˗Zlan ˗zë ˈtɔ ˈka ˗wo ˗yö ꞊va, ˗a ˈtɔ ꞊dede ˗yö dosɛnŋ. ˗Wo ˈdhɛ ˈö ˈdhö waa ö ˗bha pö ˗kɔ ˗mü. ꞊Danwo ˈgü ˗wa ˗pö “Zoova.”​—Psaume 83:18 ˗wo pö.

˗Wo ˗Zlan ˈtɔ ꞊dede bho ˗sü ˈka Biblö ꞊vadhɛ ˗nu ˈgü, ˈö ˈwo ˗a ˗zë ˈtɔ ˈka ˗wo ˗nu ˈwo ꞊dhɛ Dëmɛn ɛɛnˈˈ ˗Zlan ˈdhö bhë, ˈwo˗ ˗ya ˗sü ˈka ˗a ˈˈgblʋʋ ˈgü. ˈˈKɛɛ ˈdhɛ ˈwo wo bo Biblö ˗ya ˗sü ˈka ꞊kwɛŋzü, ˗Zlan ˈtɔ ꞊dede ˈö kun ˗a ˈgü ˗yö ˗mɔɔn 7000 ˗bha. ˈˈTʋ̈ŋ ˈö Yesu kun ˈwɔn ˈö ˗gban ˗Zlan ˗bha ˗a ˗ta ˈˈpʋ ˗ni ˈgü mɛn ˗nu ˗dhɛ ˗a ˈka bhë, ˗yö ˗Zlan ˈtɔ ˗zɔn.​—Zan 17:26 ˗wo pö.

˗Bhö video ˗Zlan ˈtɔ ˗yö ˗dhö ˗ee? ˗ga.

Mɛn ꞊vadhɛ ˗bha ˗kë saanˈˈ ˈgü ˗sü ˈö bhë, ˗ya ˗zɔn ꞊dhɛ Zoova ˗zo ˈyaa kwa ˈˈpiʋ̈ ˗ee? Mɛn ˈbhaa ˗nu ˗wa ˗pö ꞊dhɛ ˗yö kwa ˗da saanˈˈ ˗nu ˈgü ˈˈdhʋ̈ kö ˗yö kwa ˈgüdan, ˈˈkɛɛ ꞊sua ˗mü.​—Zakö 1:13 ˗wo pö.

˗Zlan ˗yö ˗we ˗a ˗bha kö mɛn ˈö ˈdhö ˗yö ö ˗de ˗dhidhɛwɔn kë. ˗A ˗kë ˈˈdhʋ̈ ˗sü ˈgü, ꞊bhlëë ꞊dede ˈnën˗ ˗ya kwa ˗bha. ˗Potaasü ˈö kwa ˗gɔ kö kwa ꞊dede ˈkwa kwa ˗kɔ ˈˈyɛ ˗Zlan gba ˗sü ˗bha bhë, ˈyaa kwa ˗dhɛ ˗së ˗ee? (Josué 24:15) ˈˈKɛɛ ˈwɔn yaa ˗kë wo ˗yayɔɔ ˗nu ˈka ˗sü ˈnën mɛn ꞊vadhɛ ˗da ˗a ˗ʒian ˗ta. Yö ˈnën ˈö˗ ˗wɔn ˈgü ˈyö mɛn ꞊vadhɛ ˈdhö saanˈˈ ˗ni ˈgü ꞊dɛɛ. ˈWɔn ˗nu ˈö ˈwaa kpɛnŋdhö ˈˈdhʋ̈ ˗bhë, Zoova ˗ya ˗kpan ˗an ˗bha, ˗ya zuʋ̈ˈˈ ˗to ˈzlöö.​—ˈWunzüdɔdhɛ 6:5, 6 ˗wo pö.

Zoova ˗Zlan ˗yö ö ˗zo ˗kë kwa ˈˈpiʋ̈. ˗Ya ˈˈpiʋ̈ kö ˈkwa ˗tosɛta kë zuʋ̈gblüdhi ˈgü. ˗A ˈˈtʋ̈ŋ ˈyaa ꞊gblɛnŋ ˈzü kö ˗yö saanˈˈ ˗nu waa pë ˗nu ˈwo nu saanˈˈ ˗nu ˈka, ˗an bho ˈˈshia˗. ˈˈKɛɛ ˗yö dɔ kö ˗yö ˗a kë ˈˈdhʋ̈, pë ˈö ˗kë ˈö ö ꞊kwaa saanˈˈ ˗nu ˗zü ˈwo ˗kë ˈˈtʋ̈ŋ ˈnën ˈbhaa ˈˈpiʋ̈, ˗a ˗gɛn ˗ya ˗gɔ. Ka ˗dho ˗kpan ˗a ˗gɛn ˗bha ˈwɔn ˗gɔ 8 ˗bha ˗naan ˈgü.​—2 Piɛdhö 2:9; 3:7, 13 ˗wo pö.

Zoova ˗ya ˗dhɛ kwa ˗gɔ kö ˈkwa ꞊ɲɔɔn ö ˈˈsɔɔ ˈwɔn ˗blɛɛ ö ˗dhɛ ˗sü ˈka bhɛɛwo ˈgü. ˗A ˗zo ˗yö ˈmɛn ˈö ˈdhö ˗a ˈˈpiʋ̈. (Psaume 65:2; 145:18) ˗Ya ˈˈpiʋ̈ kö ˈö kwa ˗bha ˈwɔn yaa ˗nu ˗bhawɔn ˈto. ˈKö ˗kë ꞊dhɛ yi ˈbhaa ˗nu ˈka kwa ˗kɔ ˗yö ˗kun ˈwɔn ˗së kë ˗sü ˈka, pë ˈˈgbɩɩ˗ ˗nu ˈö ˈkwa˗ ˗an kë ˗ni ˈgü kö ˈkwa kë ˗a ˗dhɛ ˗së bhë, ˗yö ˗an ˗yö. ˈDhɛ ˈö ˈˈdhʋ̈, ˈkö ˗kë ꞊dhɛ kwa ꞊sɔŋ ˗yö ˈyaa˗, kwa ꞊mɔɔn˗ ˗bha ˈö kwaa ˗Zlan ˈkwa ˗da ˈˈtɔŋdëdhɛ ˗së ꞊dede ˈgü.​—Psaume 103:12-14; Zakö 4:8.

ˈDhɛ ˈö ˗kë ꞊dhɛ Zoova ˈnën ˈö ˗tosɛta ˗nu kwa ˗dhɛ bhë, kwa dua ˗mu kö ˗a ˗dhɔ ˗yö kwa kë ˗yö ʒiö ˗a ˈka mɛn ꞊gban ˈˈpɛpɛ ˗ta. (Makö 12:30) ꞊Ya kë ꞊dhɛ ˈbha˗ ˗zɔn ꞊dhɛ Zoova ˗dhɔ ˗yö ü ˗kë ˈwɔn ˗nu ˈwo ˗gban ˗a ˗bha ˗an draanˈˈ ˗sü ˈka, ꞊ya ˈgo mü ˈzü pë ˗nu ˈö˗ pö ˈü˗ kë ˗ni ˈgü, ü ˗dho ꞊ɲɔɔn ˗a ˈˈsuee ꞊dedewo.​—1 Timote 2:4; 1 Zan 5:3 ˗wo pö.