Oteten a man mambo mane̱i, doi lo̱ngo̱ la mulema le nde ka nje e?

• esangisan

• je̱ne̱

• diko̱m

• mukaisedi

Jalabe̱ le nde ná doi lo̱ngo̱ la mulema le nde ka man mambo mane̱i me̱se̱. Nin tema e me̱nde̱ tele̱ye̱ ońola nje.

•  Nje ye doi la mulema e?

•  Ońola nje longa doi lo̱ngo̱ la mulema e?

•  Ne̱ni weno̱ ná o longa doi lo̱ngo̱ la mulema e?

•  Nje myemba mo̱ngo̱ ma yabe̱ mi makwalano̱

Doi lo̱ngo̱ la mulema le nde lambo o yabane̱no̱ o bia jemba nje ye bwam na nje ye bobe. Bibe̱l e makwala ná le nde ka “mbenda . . [ni] tilabe̱ o milema [ma bato]”. (Roma 2:15) Doi la mulema la bwam di mongwane̱ wa o dutea jombwea ngea weno̱ pula no̱ngo̱, to̱so̱ ni ńena o máno̱ngo̱no̱.

• Doi lo̱ngo̱ la mulema le nde ka esangisan. Di madie̱le̱ wa o ngea ni te̱nge̱n ná o sambe mbeu a ńolo.

• Doi lo̱ngo̱ la mulema le nde ka je̱ne̱. Di mabonde̱ mo̱nge̱le̱ mo̱ngo̱, na pat’a moto weno̱ oteten na mbale̱.

• Doi lo̱ngo̱ la mulema le nde ka diko̱m la bwam. Le ná di bola wa malea ma bwam, longwane̱ pe̱ wa o tongwe̱le̱ nje o mabolano̱ yete̱na o sengane̱ mo̱.

• Doi lo̱ngo̱ la mulema le nde ka mukaisedi. Di makaise̱ wa ke̱ o boli lambo la bobe.

Bekwesedi: Doi lo̱ngo̱ la mulema le nde elongisan a mweńa ye ná yongwane̱ wa (1) o no̱ngo̱ bedomsedi ba bwam na (2) o po̱ngulane̱ mawuse̱ mo̱ngo̱.

Bibe̱l e mome̱le̱ biso̱ ná di benge be̱ne̱ “doi la mulema di sangi.” (1 Petro 3:16) Bola la nika le ndutu jita yete̱na doi lo̱ngo̱ la mulema di si longabe̱.

“Na si ta na langwea bayedi bam we̱ni na malano̱, na ta nde na wo̱ndo̱. O bebotedi, doi lam la mulema di ta di kaise̱ mba, nde ombusa ponda nik’e si ta pe̱ e takise̱ mba.”—Jennifer.

O sukan, doi la mulema la Jennifer di timbi tute̱le̱ mo̱ o langwea bayedi bao mbale̱, na nje e si male̱.

Dutea te̱: Doi la mulema la Jennifer di wusa pomane̱ jome̱le̱ mo̱ e?

“Ye ndutu jita o wo̱ndo̱. Doi lo̱ngo̱ la mulema lese̱le̱ te̱ ná o no̱nge bedomsedi ba bobe bō̱, e bo̱bi ná o no̱nge bedomsedi ba bobe bepe̱pe̱.”—Matthew.

Bato bō̱ ba si mombwea doi labu la mulema. Bibe̱l mo̱ ná ba ‘kwedi etiṅtiṅ.’ (Efeso 4:19) Betukwedi ba Bible en français courant be makwala ná: “Ba si mabwa pe̱ iso̱n.”

Dutea te̱: Ba bena doi la mulema di si makaise̱no̱ ke̱ ba boli lambo la bobe be bonam na mbale̱ e? Njika mitakisan ba me̱nde̱no̱ be̱ne̱ ye̱ke̱i te̱ e?

Bekwesedi: Ná o kombe̱ doi la mulema di sangi, wangame̱n ‘jangwe̱le̱ dibie̱ lo̱ngo̱ o jemba bwam na bobe.’—Bonahebe̱r 5:14.

Ná o longe doi lo̱ngo̱ la mulema, wangame̱n be̱ne̱ eyembilan to̱ lambo di malee̱ ne̱ni bola nika ná o we̱le̱ kobisane̱ bedangwedi bo̱ngo̱ na mo̱. Bato bō̱ ba mabupe̱ nde:

• mbia mabu na bose̱di babu

• myemba mabu ma yabe̱

• bato ba biane̱

Nde bediedi be maso̱be̱ o Bibe̱l be buki nika ńe̱se̱. Nik’e si mańakisane̱ biso̱ ońolana Bibe̱l e wu nde na “mudī ma Loba,” Mo̱ ńena nu weki biso̱, na nu bi pe̱ nje e peti bwam ońol’asu.—2 Timoteo 3:16.

Jombweye byembilan bō̱.

BEDIEDI: “Di [makeka] o dangwa bwam o mambo me̱se̱.”—Bonahebe̱r 13:18.

• Ne̱ni ben bediedi beno̱ ná be die̱le̱ doi lo̱ngo̱ la mulema ke̱ o mapula bola lambo la bobe o pond’a kekise̱, ke̱ o mapula wo̱ndo̱ bayedi bo̱ngo̱, to̱ ke̱ o mapula jiba e?

• Doi lo̱ngo̱ la mulema di tute̱le̱ te̱ wa o be̱ mbale̱ o mambo me̱se̱, njika tombwane̱ nika ńeno̱ ná e wanea wa tatan na o kie̱le̱ ni maye̱ e?

BEDIEDI: “Ńa musonje mīla.”—1 Korinto 6:18.

•  Ne̱ni ben bediedi beno̱ ná be die̱le̱ doi lo̱ngo̱ la mulema ke̱ o be̱n ńo̱ng’a jombwa bedinge̱dinge̱ ba maye̱ to̱ ńa be̱ne̱ mulatako ma mome na muto obiana o maba to̱ babe̱ e?

• Doi lo̱ngo̱ la mulema di tute̱le̱ te̱ wa o ńa musonje mīla, njika tombwane̱ nika ńeno̱ ná e wanea wa tatan na o kie̱le̱ ni maye̱ e?

BEDIEDI: “Bińo̱ leane̱ muyao mō̱ na nune̱, lo be̱ ndedi, lo lakisane̱ mawuse̱ mō̱ na nune̱.”—Efeso 4:32.

•  Ne̱ni ben bediedi beno̱ ná be be̱ne̱ ngińa omo̱ń ango̱ yete̱na siso̱ṅtane̱le̱ di po̱i oteten a wa na munańo̱ngo̱ to̱ na diko̱m lo̱ngo̱ e?

• Doi lo̱ngo̱ la mulema di tute̱le̱ te̱ wa o be̱ muyao na ndedi, njika tombwane̱ nika ńeno̱ ná e wanea wa tatan na o kie̱le̱ ni maye̱ e?

BEDIEDI: “Mudī [ma Yehova] mu singe̱ nu nu to̱ndi mańakisan.”—Myenge 11:5.

•  Ne̱ni ben bediedi beno̱ ná bongwane̱ wa o po̱so̱ sinima, maloko ma video to̱ mambo mape̱pe̱ ma matombe̱ o television e?

• Doi lo̱ngo̱ la mulema di tute̱le̱ te̱ wa o samba longe̱le̱ la ńolo le njo, njika tombwane̱ nika ńeno̱ ná e wanea wa tatan na o kie̱le̱ ni maye̱ e?

Myango: “Mako̱m mam mō̱ ma ta moka maloko ma video me njo, mba pe̱ na ta noka mo̱. Na sango am a langwea mba ná na soka pe̱ mo̱. Na ta so̱ nde noka mo̱ ke̱ nalo omboa mako̱m mam. Na ta be̱ na po̱i te̱ mboa, na si malangwea bayedi bam to̱ lambo. Sango am a ta a baise̱ mba nga me̱se̱ me bwam, mba pe̱ na ta nde nalabe̱ ná e. Buńa bō̱, na mba na langa Myenge 11:5, nde na botea senga bobe ońola nje na tano̱ na bola. Na mba na so̱ṅtane̱ ná na s’angame̱n pe̱ joka ma maloko. Nin ngedi, nese̱le̱ mo̱ na mbale̱. Na nik’e bola ná diko̱m lam diwo̱ pe̱ di s’oka pe̱ mo̱.”—Jeremy.

Dutea te̱: Njika ponda doi la mulema la Jeremy di botedino̱ bola ebolo, njika ponda pe̱ a botedino̱ sengane̱ mo̱ e? Nje myango ma Jeremy mi mokwe̱le̱no̱ wa e?

Bekwesedi: Doi lo̱ngo̱ la mulema di malee̱ nja weno̱ na mambo mena me wa mweńa. Nje doi lo̱ngo̱ la mulema di malee̱no̱ jombwea wa e?