Bible etịn̄ se iditịbede ndiwụt ke “eyo emi,” m̀mê ererimbot emi ọmọn̄ esesịm utịt. (Matthew 24:3; Edisana Ŋwed Abasi Ibom) Bible ọdọhọ ke “mme akpatre usen” m̀mê utịt ererimbot emi edi emi. (2 Timothy 3:1; Daniel 8:19) Se mme prọfesi emi ẹwụtde ke ererimbot emi ọmọn̄ esesịm utịt mi:

• Ẹyen̄wana ekọn̄ ke nsio nsio itie ke ofụri ererimbot.—Matthew 24:7; Ediyarade 6:4.

• Akan̄ oyodu.—Matthew 24:7; Ediyarade 6:5, 6.

• Ikpọ unyekisọn̄.—Luke 21:11.

• Ndiọi udọn̄ọ.—Luke 21:11.

• Ubiatibet ọyọtọt.—Matthew 24:12.

• Mme owo ẹyebiat isọn̄ emi.—Ediyarade 11:18.

• Mme owo ẹyediọk uwem etieti. Ediwak owo ẹyenana “esịtekọm, inyeneke nsọn̄ọnda, . . . inyịmeke ndidụk ediomi ekededi, mbon edidọk, ẹnana mfara ke idem, ẹtie obom obom, imaha eti ido, mme andida owo nnọ, ẹsọn̄ ibuot, ẹkohode idem.”—2 Timothy 3:1-4, Edisana Ŋwed Abasi Ibom.

• Ubon itiehe aba nte ekesitiede, mme owo “inyeneke ndammana ima” aba ke ubon, nditọ “ẹsọn̄ ibuot ye ete ye eka.”—2 Timothy 3:2, 3.

• Ata ediwak owo inamke n̄kpọ Abasi aba nte ẹkesinamde.—Matthew 24:12.

• Ediwak owo ẹka ufọkabasi, edi idụhe uwem nte mbon emi ẹdiọn̄ọde Abasi.—2 Timothy 3:5.

• Mme prọfesi Bible, esịnede mbon oro aban̄ade utịt ererimbot emi, etịm an̄wan̄a ikọt Abasi idahaemi akan nte akan̄wan̄ade.—Daniel 12:4.

• Ikọt Abasi ke ẹkwọrọ eti mbụk Obio Ubọn̄ Abasi ke ofụri ererimbot idahaemi.—Matthew 24:14.

• Ediwak owo ke nsio nsio ebiet inịmke ke utịt ererimbot emi ekpere, ndusụk ẹkam ẹda ẹnam n̄kpọ imam.—Matthew 24:37-39; 2 Peter 3:3, 4.

• Ata ediwak prọfesi emi ibatde ke enyọn̄ emi ndisu ini kiet owụt ke ererimbot emi okụre ama.—Matthew 24:33.

Ndi nnyịn idu ke “mme akpatre usen”?

Ih. Nte ererimbot etiede ye se Bible etịn̄de owụt ke mme akpatre usen emi ọkọtọn̄ọ ke 1914. Ini oro ke Obio Ubọn̄ Abasi ọkọtọn̄ọ ndikara ke heaven, ndien akpan n̄kpọ emi Edidem Obio Ubọn̄ Abasi akanamde ekedi ndisio Satan kpa Devil ye mme demon esie ke heaven nduọn̄ọ ke isọn̄. (Ediyarade 12:7-12) Satan enen̄ede ada mme owo ọdọn̄ utom ke mme akpatre usen emi. Ntak edi oro mme owo ẹdiọkde uwem ntem idahaemi; oro anam uwem enen̄ede ọsọn̄ mfịn.—2 Timothy 3:1.