Luke 2;1-52
2 Edikem ke mme usen oro Caesar Augustus owụk ewụhọ+ ete ẹwet enyịn̄ mme owo ke ofụri isọn̄ ẹsịn ke n̄wed;
2 (akpa usịnenyịn̄ emi akada itie ke ini Quirinius ekedide andikara Syria;)
3 ndien kpukpru owo ẹka obio mmọ kiet kiet ndisịn enyịn̄ ke n̄wed.+
4 Joseph n̄ko oto obio Nazareth, ke Galilee, ọdọk aka Judea, ke obio David, emi ekerede Bethlehem,+ koro enye edide owo ufọk ye owo ubon David,+
5 ndikesịn enyịn̄ ke n̄wed ye Mary,+ emi ẹkedade ẹnọ enye ke ndọ nte ẹken̄wọn̄ọde,+ emi ekperede ndiman eyen ke emi.+
6 Ke adan̄aemi mmọ ẹdude do, usen edikem enye ndiman eyen.
7 Ndien enye aman eyen esie eren, akpan,+ onyụn̄ ada ubak ọfọn̄ awan̄ enye enịm ke usịnudia ufene,+ koro itie mîkodụhe inọ mmọ ke ubetnna isenowo.
8 N̄ko mme ekpemerọn̄ ẹma ẹdu ke idụt oro emi ẹketiede ke an̄wa ẹkpeme otuerọn̄ mmọ ke okoneyo.
9 Ndien angel+ Jehovah awara edida ekpere mmọ, ubọn̄+ Jehovah onyụn̄ ayama akanade mmọ okụk, ndien ndịk anam mmọ etieti.
10 Edi angel oro ọdọhọ mmọ ete: “Ẹkûfehe ndịk, koro, sese! ami ntan̄a eti mbụk akwa idatesịt eke edinyenede kpukpru owo nnọ mbufo,+
11 koro Andinyan̄a,+ emi edide Christ Ọbọn̄,+ amana ọnọ mbufo mfịn emi ke obio David.+
12 Ndien emi edi idiọn̄ọ eke ẹnọde mbufo: mbufo ẹyekụt nsekeyen emi ẹwan̄de ke ubak ọfọn̄ nte anade ke usịnudia ufene.”
13 Ndien kpa idaha oro akwa udịm mbon heaven+ ẹdidu ye angel oro, ẹtoro Abasi+ ẹnyụn̄ ẹdọhọ ẹte:
14 “Ubọn̄ enyene Abasi ke ata enyọn̄,+ emem onyụn̄ odu ke isọn̄+ ke otu mbon oro enye enyịmede.”+
15 Ntre ke ini mme angel ẹma ẹkedaha ẹkpọn̄ mmọ ẹnyọn̄ọ heaven, mme ekpemerọn̄ oro ẹdọhọ kiet eken ẹte: “Ẹyak nnyịn isọp ika Bethlehem ikese n̄kpọ emi adade itie, emi Jehovah+ anamde nnyịn ifiọk.”
16 Ndien mmọ ẹwara ẹka ẹkekụt Mary ọkọrọ ye Joseph, ye nsekeyen nte anade ke usịnudia ufene.
17 Ke ini mmọ ẹkụtde enye, mmọ ẹnam ẹfiọk ikọ emi ẹketịn̄de ẹnọ mmọ ẹban̄a ekpri eyen emi.
18 Ndien idem akpa kpukpru mmọ emi ẹkopde mme n̄kpọ emi mme ekpemerọn̄ ẹtịn̄de ẹnọ mmọ,
19 edi Mary omụm kpukpru ikọ emi akama, onyụn̄ ekere ke esịt esie se mmọ ẹwọrọde.+
20 Ekem mme ekpemerọn̄ oro ẹfiak ẹnyọn̄ọ, ẹnọ Abasi ubọn̄ ẹnyụn̄ ẹtoro enye kaban̄a kpukpru n̄kpọ oro mmọ ẹkekopde ẹnyụn̄ ẹkụtde, kpa nte ẹketịn̄de ẹnọ mmọ.
21 Edi ke esịmde ọyọhọ usen itiaita+ emi ẹnyenede ndinịm enye mbobi,+ ẹsio enye enyịn̄ Jesus,+ kpa enyịn̄ oro angel ọkọnọde mbemiso ẹyomode enye.+
22 N̄ko, ke mme usen edinam mmọ ẹsana+ ẹsịmde utịt nte ibet Moses etemede, mmọ ẹda enye ẹdọk ẹdi Jerusalem ndiyak nnọ Jehovah,
23 kpa nte ẹwetde ke ibet Jehovah ẹte: “Kpukpru eyeneren emi esịrerede itie eyen edidi edisana ọnọ Jehovah,”+
24 ẹnyụn̄ ẹnyene ndiwa uwa nte ẹtịn̄de ke ibet Jehovah: “Mbomon̄kuku iba m̀mê nditọ ibiom iba.”+
25 Ndien, sese! owo kiet ama odu ke Jerusalem emi ekekerede Simeon, owo emi okonyụn̄ edi edinen owo eke abakde Abasi, emi eketiede ebet ndọn̄esịt+ Israel, edisana spirit onyụn̄ odoro enye ke idem.
26 N̄ko-n̄ko, Abasi ama ayarade ọnọ enye ke edisana spirit ete enye idikwe n̄kpa tutu enye okụt Christ+ Jehovah.
27 Enye onyụn̄ odụk edi temple ke ndausụn̄ odudu spirit;+ ndien nte ete ye eka ẹdade ekpri eyen emi, Jesus, ẹdụk ẹdi man ẹnam ye enye nte ido ibet edide,+
28 enye ọbọ enye akama ke ubọk, otoro Abasi onyụn̄ ọdọhọ ete:
29 “Ke emi, Akakan Ọbọn̄ Andikara, afo amayak ofụn fo ọnyọn̄ ke ifụre+ nte afo ọkọdọhọde;
30 koro enyịn mi omokụt usụn̄ eke afo adade ọnọ edinyan̄a+
31 emi afo enịmde ke iso kpukpru mme idụt,+
32 kpa un̄wana+ ndifụhọde ufụhọn̄kpọ+ mfep ke iso mme idụt+ ye ubọn̄ ikọt fo Israel.”
33 Ndien idem akpa ete ye eka esie aban̄a mme n̄kpọ oro ẹtịn̄de ẹban̄a enye.
34 N̄ko, Simeon ọdiọn̄ mmọ, edi ọdọhọ Mary eka esie ete: “Sese! Ẹnịm enye man ediwak owo ẹduọn̄ọ+ ke Israel+ ẹnyụn̄ ẹfiak ẹdaha ẹda, man enye onyụn̄ edi idiọn̄ọ eke ẹtịn̄de ikọ ẹdian+
35 (ih, ẹyeda anyan akan̄kan̄ ẹkịm fi ukpọn̄),+ man ekikere ediwak esịt akpayarade.”+
36 Edi Anna prọfet an̄wan kiet ama odu, eyen Phanuel, emi otode esien Asher (n̄wan emi ama enen̄ede ọsọn̄, okonyụn̄ odu ye ebe esie ke isua itiaba ọtọn̄ọde ke ini emi enye ọdọde ndọ nte eyenan̄wan emi mîfiọkke erenowo,
37 enye okonyụn̄ edi ebeakpa+ emi esịmde isua anan̄ ye inan̄ ke emi), ndien akananam enye itreke ndidu ke temple nnam edisana utom okoneyo ye uwemeyo,+ etre udia onyụn̄ anam n̄kpeubọk.
38 Ndien kpa ke hour oro enye asan̄a ekpere onyụn̄ ọnọ Abasi ekọm onyụn̄ etịn̄ aban̄a eyen oro ọnọ kpukpru owo emi ẹtiede ẹbet edinyan̄a Jerusalem.+
39 Ntre ke mmọ ẹma ẹkenam kpukpru n̄kpọ nte ibet+ Jehovah etemede, mmọ ẹfiak ẹnyọn̄ọ Galilee ẹka Nazareth+ obio mmọ.
40 Ndien ekpri eyen oro ọdọdiọn̄ ọkọri onyụn̄ okop idem,+ ọyọhọ ye ọniọn̄, mfọn+ Abasi etetịm odu ye enye.
41 Edi ekedi ido ete ye eka esie ndisika Jerusalem+ kpukpru isua ke ini usọrọ passover.
42 Ndien ke ini enye esịmde isua duopeba, mmọ ẹdọk ẹka nte ido+ usọrọ edide
43 ẹnyụn̄ ẹdu do tutu mme usen usọrọ oro ẹkụre. Edi ke ini mmọ ẹnyọn̄de, eyen oro Jesus osụhọ ke Jerusalem, edi ete ye eka esie ifiọkke.
44 Mmọ ẹkere ẹte enye odu ke otu mbonisan̄ emi mmọ ẹsan̄ade kiet, ẹnyụn̄ ẹsan̄a isan̄ usen kiet+ ndien ẹtọn̄ọ ndiyom enye ke otu iman ye mme ọdiọn̄ọ.
45 Edi, ke ini mmọ mîkwe enye, mmọ ẹfiak ẹka Jerusalem, ẹketịn̄ enyịn ẹyom enye.
46 Edikem, ke usen ita ẹma ẹkebe mmọ ẹkụt enye ke temple,+ nte etiede ke ufọt mme andikpep akpan̄ utọn̄ ọnọ mmọ onyụn̄ obụp mmọ mbụme.
47 Edi idem ọdọdiọn̄ akpa kpukpru mmọ emi ẹkpan̄de utọn̄ ẹnọ enye aban̄a ifiọk ye ibọrọ esie.+
48 Ndien ke ini mmọ ẹkụtde enye idem akpa mmọ, eka esie onyụn̄ ọdọhọ enye ete: “Eyen, ntak emi afo anamde n̄kpọ ntem ye nnyịn? Sese ami ye usọ imasan̄a iyom fi ye mfụhọ.”
49 Edi enye ọbọrọ mmọ ete: “Ntak emi mbufo ẹkpesan̄ade ẹyom mi? Nte mbufo ikọfiọkke ite nnyene ndidu ke ufọk Ete mi?”+
50 Edi, mmọ ikọfiọkke se ikọ oro enye etịn̄de ọnọ mmọ ọwọrọde.+
51 Ndien enye asan̄a ye mmọ osụhọde edi Nazareth, onyụn̄ aka iso osụk ibuot+ ọnọ mmọ. N̄ko, eka esie etịm omụm kpukpru ikọ emi akama ke esịt esie.+
52 Ndien Jesus ọdọdiọn̄ ọkọri ke ọniọn̄+ ye idaha onyụn̄ okụt mfọn ke iso Abasi ye ke iso owo.+
