Rose ọdọhọ ete: “Mmesikop ọkpọsọn̄ ubiak ke ntak udọn̄ọ emi n̄kadade-da mmana. N̄kemeke aba ndinam ediwak se n̄kesinamde.” Udọn̄ọ esie ikayakke enye ekeme ndikot Bible onyụn̄ anam n̄kpọ Abasi nte enye ekesinamde. N̄kpọ emi ama enen̄ede afịna enye. Edi se Jesus eketịn̄de ke Matthew 19:26 ama an̄wam enye. Itie oro ọdọhọ ke “Abasi ekeme ndinam kpukpru n̄kpọ.” Rose ama edikụt ke enyene nsio nsio usụn̄ emi imọ ikemede ndikpep Ikọ Abasi. Sia udọn̄ọ esie mîkayakke enye ekeme ndisikot n̄wed ndusụk ini, enye ama esibre Bible ye mme n̄wed esop Abasi emi ẹkotde ẹdọn̄ ke Intanet. * Enye ọdọhọ ete: “Ekpedi owo ikokotke mme n̄kpọ emi idọn̄ ke Intanet, ndiọn̄ọke se n̄kpanamde man n̄ka iso n̄kpere Abasi.”

Ini ekededi emi Rose ofụhọde ke ntak emi enye mîkemeke ndinam se enye ekesinamde, se 2 Corinth 8:12 etịn̄de esidọn̄ enye esịt. Itie oro ọdọhọ ete: “Edieke edinyịme akam odude, enen̄ede enem Abasi esịt ndibọ nte ekemde ye se owo enyenede, idịghe se owo mînyeneke.” Itien̄wed emi anam Rose ọfiọk ke se ededi emi udọn̄ọ esie ayakde enye anam ọnọ Abasi enem Abasi esịt.

Delphine oro iketịn̄de iban̄a ọdọhọ ete: “Ke ini eyen mi emi ekedide isua 18 akakpade, n̄kpa esie ama abiak mi tutu uwem odorode mi. N̄kekere ke inyeneke se idinamde n̄kop inemesịt aba ke uwem emi.” Edi, se ẹwetde ke Psalm 94:19 ama enen̄ede ọdọn̄ enye esịt. Andiwet Psalm oro ọkọdọhọ Abasi ete: “Ke ini ediwak ekikere ẹtịmerede mi esịt, ndọn̄esịt fo enem ukpọn̄ mi.” Delphine ọdọhọ ete: “Mma mbọn̄ akam nnọ Jehovah nte an̄wam mi nnam mme n̄kpọ emi ẹdidọn̄de mi esịt.”

Enye ama ọtọn̄ọ ndisin̄wam mbon en̄wen. Nte ini akakade, enye ọkọdọhọ ke imọ itie nte n̄kpọ emi nditọwọn̄ ẹsidade ẹsịn kọlọ ke n̄kpọ emi mmọ ẹdrọde (crayon)​—ọkpọkọm obobụn̄ọ, osụk enyenyene ufọn. Kpasụk ntre, okposụkedi emi esịt obụn̄ọde enye, enye okụt ke imọ imosụk ikeme ndin̄wam mbon en̄wen. Enye ọdọhọ ete: “Mma ndikụt ke ini ekededi oro ndade Ikọ Abasi ndọn̄ nditọ ukpepn̄kpọ mi esịt, ke Jehovah esida oro ọdọn̄ mi esịt onyụn̄ ọsọn̄ọ mi idem.” Enye ama ewet mme owo ke Bible emi ẹkenyụn̄ ẹfụhọde nte enye. Enye ọdọhọ ete: “Kpukpru mmọ ẹkedi mbon emi ẹsibọn̄de akam kpukpru ini.” Enye ama okụt n̄ko ke ndikot Bible esitiene an̄wam owo ọyọ.

Ndikpep Bible anam Delphine ọfiọk n̄ko ke ọfọn ndikere mban̄a ini iso, idịghe se ima ikebebe. Idotenyịn oro ẹtịn̄de ẹban̄a ke Utom 24:15 ọdọn̄ enye esịt. Itien̄wed oro ọdọhọ ete: “Ndinen owo ye mme anam ukwan̄n̄kpọ ẹyeset ke n̄kpa.” Ndi Delphine enen̄ede enịm ke Jehovah ayanam eyen esie eset? Enye ọdọhọ ete: “Mmesitie n̄kere nte n̄kụtde eyen mi ke ini iso. Ete mi eke heaven ewewet usen emi ami ndifiakde n̄kụt eyen mi. Mmesikere nte itiede kiet ke in̄wan̄esa nnyịn ye nte mfatde enye ndian ke idem nte n̄kafatde enye usen oro n̄kamande enye.”