“Edieke mbufo ẹben̄ede Ete n̄kpọ ekededi enye ọyọnọ mbufo ke enyịn̄ mi.”—John 16:23.

Ikọ Jesus emi owụt ke Jehovah iyomke ikama edisọi mbiet ibọn̄ akam inọ imọ m̀mê ibọn̄ akam ke enyịn̄ ndisana owo, mme angel, m̀mê mbon oro ẹma ẹkekpan̄a. Edi enye oyom ibọn̄ akam inọ imọ ke enyịn̄ Jesus Christ. Ke ini ibọn̄de akam inọ Abasi ke enyịn̄ Jesus, oro owụt ke imọdiọn̄ọ ke se Jesus akanamde ọnọ nnyịn anam Abasi okop akam nnyịn. Jesus ọkọdọhọ ete: “Baba owo kiet itieneke Ete ibọhọke ebe ke ami.”—John 14:6.

“Ẹn̄wan̄a esịt mbufo ẹnọ enye.”—Psalm 62:8.

Ke ini ibọn̄de akam inọ Jehovah, akpana itịn̄ ikọ ye enye nte ikpetịn̄de ye edima ete nnyịn. Akpana isitịn̄ se isịnede nnyịn ke esịt ukpono ukpono inọ Abasi, utu ke ndikokot akam ke n̄wed m̀mê nditịn̄ se ikomụmde idọn̄ ke ibuot.

“Se ededi oro nnyịn iben̄ede nte ekemde ye uduak esie, enye ọbiọn̄ utọn̄ ke eben̄e nnyịn.”—1 John 5:14.

Bible etịn̄ se Jehovah Abasi edinamde inọ nnyịn ye se enye oyomde nnyịn inam inọ imọ. Edieke iyomde Abasi okop akam nnyịn, ana ibọn̄ akam emi “ekemde ye uduak esie.” Ntre, oyom ikpep Bible man inen̄ede idiọn̄ọ Abasi. Emi ayanam ibọn̄ akam nte enye oyomde.

Ben̄e Abasi Mme N̄kpọ Emi Oyomde. Imekeme ndiben̄e Abasi mme n̄kpọ emi isiyomde ke usen ke usen, utọ nte udia, ọfọn̄, ye ebiet emi ikpodụn̄de. Imekeme n̄ko ndiben̄e Abasi ọnọ nnyịn ifiọk man ikeme ndibiere n̄kpọ ọfọn, onyụn̄ an̄wam nnyịn ikeme ndiyọ se iwọrọde nnyịn. Imekeme ndiben̄e Abasi anam nnyịn inen̄ede ibuọt idem ye enye, efen ndudue nnyịn, onyụn̄ an̄wam nnyịn.—Luke 11:3, 4, 13; James 1:5, 17.

Sịn Mbon En̄wen ke Akam. Esinen̄ede enem ete ye eka ndikụt nditọ mmọ ẹmade kiet eken. Jehovah n̄ko oyom nditọ esie mi ke isọn̄ ẹma kiet eken. Ọfọn isisịn mbon en̄wen ke akam, utọ nte ebe m̀mê n̄wan nnyịn, nditọ nnyịn, mbonubon nnyịn, ye mme ufan nnyịn. James mbet Jesus ọkọdọhọ ete: “Ẹbọn̄ akam ẹban̄a kiet eken.”—James 5:16.

Sikọm Abasi ke Ini Ọbọn̄de Akam. Kop se Bible etịn̄de aban̄a Abasi emi okobotde nnyịn mi: ‘Enye ọfọn ido, ọnọ mbufo edịm emi otode enyọn̄ ye ini eduek, ọnọ mbufo udia barasuene onyụn̄ anam esịt mbufo ọyọhọ ye idatesịt.’ (Utom 14:17) Ke ini itiede ikere kpukpru se Abasi anamde ọnọ nnyịn, iyesima ndikọm enye ke ini ibọn̄de akam. Ana nte idude uwem n̄ko owụt ke imama ofụri se Abasi anamde ọnọ nnyịn.—Colossae 3:15.

Ndusụk ini, esịt isinemke nnyịn edieke etiede nte Abasi isọpke ibọrọ akam oro ikọbọn̄de ke ofụri esịt inọ enye. Edieke oro etịbede, ndi ọwọrọ ke Abasi imaha nnyịn? Iwọrọke ntre! Yak ineme se iketịbede inọ ndusụk owo, emi owụtde ke oyom isinyene ime inyụn̄ ika iso ibọn̄ akam.

Steve, oro iketịn̄de iban̄a ke akpa ibuotikọ magazine emi, ọdọhọ ete, “Ekpedi mma ntre ndisibọn̄ akam, uwem okpokodorode mi.” Nso ikan̄wam enye? Enye ama ọtọn̄ọ ndikpep Bible onyụn̄ okụt ke oyom inyene ime inyụn̄ ika iso ndibọn̄ akam. Enye ọdọhọ n̄ko ete, “Mma mbọn̄ akam n̄kọm Abasi ke nte enye adade mme ufan mi an̄wam mi. Esịt enem mi idahaemi akan nte ekesinemde.”

Nso kaban̄a Jenny emi ekekerede ke Abasi ikemeke ndikop akam imọ sia imọ mîwọrọke n̄kpọ? Enye ọdọhọ ete, “Ke ini eketiede mi nte ke n̄wọrọke n̄kpọ ke usụn̄ ndomokiet, mma nsibọn̄ akam ndọhọ Jehovah an̄wam mi mfiọk ntak emi etiede mi ntre ke idem.” Didie ke akam akan̄wam enye? Enye ọdọhọ ete, “Ndibọn̄ akam nnọ Abasi anam nse idemmi nte Abasi esede mi onyụn̄ anam mfiọk ke ọkpọkọm esịt mi ọdọhọ ke n̄wọrọke n̄kpọ, ke Abasi isehe mi ntre. Emi inyụn̄ iyakke uwem odorode mi.” Jenny aka iso ọdọhọ ete: “Ndibọn̄ akam anam n̄kụt ke Jehovah edi Ete mi ye Ufan mi, ke enye ama mi onyụn̄ eben̄e idem ndin̄wam mi ini ekededi, ama akam edi mmanam se enye ọdọhọde.”

Yak itịn̄ n̄ko iban̄a Isabel. Ke ini enye akasan̄ade ye idịbi, mme dọkta ẹma ẹdọhọ enye ke eyen emi enye edimande oyobiomo ata idiọk ndo. Emi ama anam esịt obụn̄ọ enye. Ndusụk owo ẹma ẹdọhọ enye osion̄o idịbi oro. Enye ọdọhọ ete: “Esịt ama etịmede mi tutu n̄kere ke mmọn̄ n̄kpa.” Nso ke enye akanam? Enye ọdọhọ ete, “Mma mbọn̄ akam ediwak ini ndọhọ Abasi an̄wam mi.” Ekem enye ama aman eyeneren onyụn̄ osio enye Gerard. Eyen oro ama obiomo ndo nte mme dọkta ẹketịn̄de. Ndi Isabel ekere ke Abasi ikọbọrọke akam imọ? Ikereke. Didie ke Abasi ọkọbọrọ akam esie? Isabel ọdọhọ ete, “Ke ini n̄kụtde eyen mi, emi edide isua 14 idahaemi, okopde inem uwem kpa ye oro obiomode ndo, mmesikụt ke Abasi ọbọrọ akam mi. Eyen emi edi akakan edidiọn̄ emi Abasi ọnọde mi.”

Se mme owo ẹtịn̄de emi anam iti ikọ andiwet Psalm emi: “Afo oyokop eben̄e mbon nsụkidem, O Jehovah.” (Psalm 10:17) Emi owụt ke ọfọn ika iso ndibọn̄ akam.

Ẹwet ediwak akam emi Jesus ọkọbọn̄de ke Bible. Akam esie emi mme owo ẹdiọn̄ọde ẹkan edi enye emi enye ekekpepde mbet esie. Nso ke ikeme ndikpep nto akam oro?