N̄KUKUN̄KPỌYỌRIYỌ ẹsidaha ọkwọkudịm ẹka ebiet ekededi emi mmọ ẹyomde ndika. Ẹdọhọ ke se ibede n̄kukun̄kpọyọriyọ 500,000 ẹkeme ndife ke ebiet emi adade nte an̄wambre bọl kiet. Ndien okposụkedi emi mmọ ẹwakde ntem, kiet isifehe ikọtọ kiet. Nso isin̄wam mmọ?

Kere ise: N̄kukun̄kpọyọriyọ enyene ikpọ enyịn iba ke ibuot. Enyene n̄kpọ emi esịnede ke esịt enyịn esie emi esinamde enye ọfiọk ke n̄kpọ en̄wen ke asan̄a ekpere imọ. Edieke n̄kukun̄kpọyọriyọ en̄wen m̀mê n̄kpọ en̄wen asan̄ade edi ndituak enye, n̄kpọ emi esịnede ke enyịn n̄kukun̄kpọyọriyọ mi ayadiana ye mfre esie anam mba ye ukot esie ẹben̄e idem man enye ọsọsọp efep n̄kpọ oro. Ke nditịm ntịn̄, enye ekeme ndifep n̄kpọ ọsọp utịm ikotion akan owo ndikep enyịn.

Ntaifiọk ẹkpep ekese n̄kpọ ẹto enyịn n̄kukun̄kpọyọriyọ ye n̄kpọ emi esịnede enye ke enyịn. Mmọ ẹda ifiọk emi ẹbot ukwakutom emi esisan̄ade anam n̄kpọ emi owo akpanamde. Mmọ ẹsịn n̄kpọ emi esinamde ukwakutom emi okûwat ọkọtọ n̄kpọ ke ini enye asan̄ade anam utom, ndien edieke n̄kpọ oyomde ndidi nditọ enye, enye esifep n̄kpọ oro. Ntaifiọk ke ẹda ifiọk emi n̄ko ẹnam moto emi edide edieke moto en̄wen awatde edi nditọ enye mîdịghe edieke enye awatde aka nditọ n̄kpọ, enye ọsọsọp ọtọt andiwat. Prọfesọ Shigang Yue emi anamde utom ke ufọkn̄wed ntaifiọk Lincoln ke United Kingdom ọdọhọ ete: “Imekeme ndikpep ekese n̄kpọ nto ekpri n̄kpọ nte n̄kukun̄kpọyọriyọ.”

Afo ekere didie? Ndi n̄kukukpọyọriyọ emi enyenede utọ enyịn emi okofoforo? Mîdịghe ndi ẹkebobot enye?