Leta Benin

Nso ke Mmen Idem N̄kesịn Emi?

KE USENUBỌK ke ikpehe kiet ke Edem Usoputịn Africa, ufuọn̄ edesi ye efere esiyọhọ ofụm. Iban ẹbiom ata ikpọ mbiomo ke ibuot ke ẹka urua. Ke ẹsak ufan ufan imam ke ẹnyịme urua n̄kpọ. Isibịghike-bịghi utịn esitọn̄ọ ndifiop.

Ke ini nditọwọn̄ ẹkụtde Yovo, oro edi, afia owo, mmọ ẹsitọn̄ọ ikwọ mmọ ẹnyụn̄ ẹnek unek. Mmọ ẹsitọn̄ọ ikwọ mmọ ntem: “Yovo, Yovo, bon soir” ẹnyụn̄ ẹtre ye “Mbọk yom n̄kpọ nọ nnyịn ke ikwọ ye unek oro!” Edi eyeneren kiet iketieneke mmọ ikwọ ikwọ oro. Nte n̄kosụk nsan̄ade n̄ka, enye ama etiene mi onyụn̄ ọtọn̄ọ ndida ubọk nnam idiọn̄ọ nnọ mi. Se enye akanamde eketie nte usem idiọn̄ọ. Mma n̄kpep ndibọp ikọ ke Usem Idiọn̄ọ Mbon America (ASL) ke ini n̄kodude ke United States, edi ẹsem French ke Benin.

Mma n̄n̄wana nnam idiọn̄ọ abisi itiaita emi ẹdude ke enyịn̄ mi. Eyen oro ama atuak inua imam. Enye ama eyịre mi ke ubọk, ada mi asan̄a afan̄usụn̄ kiet aka ufọk mmọ. Ufọk emi ekedi ufọkitiat oro enyenede ubet iba. Mbonubon mmọ ẹma ẹkanade mi ẹkụk. Kpukpru mmọ ẹketịn̄ ikọ ke usem idiọn̄ọ. Mma n̄kere se n̄kpanamde. Mma nnam enyịn̄ mi ke usem idiọn̄ọ n̄wụt mmọ, nnyụn̄ n̄wet n̄kpọ ke ekpri babru nnọ mmọ nte ke ndi isụn̄utom emi esikpepde mme owo Bible ye nte ke nyafiak ndi. Ndusụk ke otu mbọhọidụn̄ mmọ oro ẹkopde ikọ ẹma ẹtiene ẹwọrọ ẹdi, ẹnyụn̄ ẹtop ibuot ndiwụt ke imoyom mfiak ndi. Mma n̄kere nte ‘Nso ke mmen idem mi n̄kesịn emi?’

Ke mma n̄kesịm ufọk mma n̄kere, ‘Anaedi owo odu oro edikemede ndin̄wam mbon emi ẹfiọk un̄wọn̄ọ Abasi emi ọdọhọde ete: “Utọn̄ [ẹyesịrede] mme inan.”’ (Isaiah 35:5) Mma nnam ndụn̄ọde. Ubatowo oro ẹkenamde ndondo emi okowụt ke inan ye mbon oro mîkopke n̄kpọ ọfọn, oro ẹdude ke Benin, ẹdi owo 12,000. Esịt ama enem mi etieti ke ini n̄kedide ndifiọk ke idịghe Usem Idiọn̄ọ French ke ẹsikpep ke ufọkn̄wed inan mi, edi ke ẹsikpep Usem Idiọn̄ọ Mbon America. Edi esịt ikenemke mi ke ini n̄kọfiọkde ke idụhe Ntiense Jehovah ndomokiet mi, emi ọfiọkde Usem Idiọn̄ọ Mbon America. Mma nsiama, nnyụn̄ ndọhọ Ntiense n̄kann̄kụk oro nte, “Ubaha-e nte owo emi ọdiọn̄ọde Usem Idiọn̄ọ Mbon America ekpedide mi man edin̄wam mbon emi.” Enye ama ọbọrọ ete: “N̄kọ afo mi nan̄a, ntak mûn̄wamke?” Enye ama enen! Mma ntobo n̄wed emi owo esidade ekpep idemesie Usem Idiọn̄ọ  Mbon America ye mme DVD oro Mme Ntiense Jehovah ẹsiode. Abasi ama eyere akam mi ke ini Ntiense kiet emi enen̄erede ọdiọn̄ọ usem idiọn̄ọ okotode Cameroon edidụn̄ ke Benin.

Etop ama asuana nte ke ami ke n̄kpep Usem Idiọn̄ọ Mbon America. Ẹma ẹdọhọ n̄ka n̄kese Brice, emi esiwetde mbuwet usem idiọn̄ọ. Ẹkeda ndakeyop ẹnam itieutom esie, ndien itieutom esie ama esibịt etieti ke ini eyo ofiopde. Enye ndisikwọhọde brọsh esie ke mme ndakeyop oro ke ediwak isua ama anam ibibene itieutom esie akabade enyene uduot akpara. Enye ama ọkwọhọde akpakaha ifan̄, ekem atuak ada ese se ndinamde. Mma nsịn DVD ke ekpri n̄kpọmbre mi. Enye ama esịk akpakaha esie enen̄ede ekpere n̄kpọmbre oro onyụn̄ anam idiọn̄ọ ete, “An̄wan̄a mi! An̄wan̄a mi!” Nditọwọn̄ ke mbọhọ oro ẹma ẹwọn̄ọ ẹdiyọhọ ẹnyụn̄ ẹda ẹnyan itọn̄ ẹse se ẹsiode. Uyo ama ọbọhọ kiet ke otu mmọ ete, “Ntak emi mmọ ẹsede fim emi owo mîtịn̄ke ikọ?”

Kpukpru ini emi n̄kesifiakde n̄ka ndise Brice, ibatowo oro ẹkesidide ndise DVD emi esitetịm awak. Ikebịghike Brice ye mme inan eken ẹma ẹtọn̄ọ ndidi mbono esop Christian nnyịn. Ndisikabade n̄kpọ nnọ mmọ ama an̄wam mi nsọp mmehe ye usem idiọn̄ọ. Nte mmọ ẹkekade iso ẹwak, ndusụk mmọ ẹma ẹsidi ẹdiyom mi ke ufọk. Ke uwụtn̄kpọ, usen kiet ubomisọn̄ mi emi ama akakani ama okụni onyụn̄ esịm ke ini okodụkde itịghede ke adan̄aemi n̄n̄wanade ndifep ebot ye edi emi ẹkeyode ke usụn̄. Ekem mma n̄kop n̄kpọ ọtọde edem ubomisọn̄ mi. Ndien mma n̄kere nte, ‘Oh, okûdi n̄kpọ afiak abiara oro!’ N̄kpọ ikabiarake, inan kiet ekefehe etiene mi an̄wana ndinam ntuak nda ke ndimia ubomisọn̄ mi!

Otu emi ẹsemde Usem Idiọn̄ọ Mbon America ẹma ẹtọn̄ọ ndidu ke mme ikpọ obio eken. Ke ini ẹkesịnde ikpehe emi ẹsemde usem idiọn̄ọ ke akamba mbono utịt isua nnyịn, ẹma ẹdọhọ mi ntiene n̄kabade se ẹnamde. Ke ini n̄kọdọkde mbot utịn̄ikọ n̄kada mbet etịn̄ikọ ọtọn̄ọ, mma nti akpa ini emi n̄kọtọn̄ọde utom isụn̄utom. Mma nsikere, ‘Nso efen ke n̄kpanam nte isụn̄utom ke Africa?’ Nte n̄kesede otuowo, mma mfiọk ke mmenyene ibọrọ mbụme oro—mmekeme ndidi isụn̄utom oro an̄wamde mme inan. Idahaemi mbụpke aba idemmi, ‘Nso ke mmen idem n̄kesịn emi?’