NSO ke akpanam edieke ata akpan ufan fo emi amade onyụn̄ enen̄erede okpono anamde n̄kpọ emi mîtịmke in̄wan̄a fi? Edieke mme owo ẹdọhọde ke enye edi ibak sia mîdiọn̄ọke ntak emi enye anamde n̄kpọ oro, ndi akpada ye mmọ, mîdịghe ndi okpoyom usụn̄ obụp ufan fo ntak emi enye akanamde n̄kpọ oro? Edieke enye mîdụhe nditịn̄ ntak, ndi ekpenyene ime ebet enye editịn̄ se iketịbede?

Imekere ke akpama nditịm mfiọk se iketịbede mbemiso ọbọrọde. Emekeme ndikere, ‘Ndi ufan emi okposụk anam utọ n̄kpọ emi? Ihih, utọ n̄kpọ emi ibietke enye.’ Ọfọn, kere ise: Ndi idịghe se ikponyụn̄ inamde edi oro ye Abasi edieke ikopde owo ọdọhọde ke esidi enye anam eti anam idiọk?

Ndusụk n̄kpọ emi Abasi anamde ekeme ndikpa fi idem, mîdịghe ekeme ndidi udiọn̄ọke ntak emi enye ayakde ndusụk n̄kpọ ẹtịbe. Ediwak owo ẹkeme ndidọhọ fi ke esidi Abasi anam eti anam idiọk, ẹnyụn̄ ẹkeme ndinam fi etiene mmọ ada Abasi ntre. Ndi ayada ye mmọ mîdịghe ndi ayama ndikop edem iba mbemiso afo ọbọrọ? Nte ọdiọn̄ọde Abasi eketre edibiere se afo edinamde. Mmọdo, bụp idemfo ete, ‘Ami ndiọn̄ọ Abasi adan̄a didie?’

Edieke n̄kpọ ọdiọkde ye owo, oro ekeme ndinam enye ekere ke Abasi imaha imọ. Edi fiak kere ise: Ndi Abasi esinam n̄kpọ ọdiọk ye owo? Ndi ikam idịghe enye esinam n̄kpọ ọfọn ye owo? Nte ima ikokụt, Satan edi “andikara ererimbot emi,” idịghe Jehovah. (John 12:31) Satan edi ntak ofụri ibak ye kpukpru nnanenyịn emi ẹdude ke ererimbot emi. N̄kpọ en̄wen emi anamde ibọ ufen edi unana mfọnmma nnyịn ye mme n̄kpọntịbe unana idotenyịn.

Ndi emi ọwọrọ ke Abasi inamke baba n̄kpọ kiet? Bible ọdọhọ ke Abasi edi “Andinam enyọn̄ ye isọn̄,” enye okobot nnyịn ke “utịbe utịbe usụn̄,” ye nte ke ‘ibifịk uwem owo ẹsịne enye ke ubọk.’ (Psalm 124:8; 139:14; Daniel 5:23) Nso ke kpukpru emi ọwọrọ?

Emi ọwọrọ ke Abasi okobot nnyịn; enye onyụn̄ ọnọ nnyịn uwem. (Utom 17:28) Ọwọrọ n̄ko ke uwem emi idude, kpukpru ndiye n̄kpọ ke ererimbot emi, mme ufan oro inyenede, ndikeme ndima ima, ndikeme ndikop inem udia, ufuọn̄ n̄kpọ, ye kpukpru se inamde uwem enem, ẹdi enọ Abasi. (James 1:17) Ndi ukereke ute ke kpukpru emi ẹwụt ke Abasi edi ata eti Ufan emi ikpọbuọtde idem inyụn̄ ikpono?

Imọfiọk ke ekeme ndisọn̄ ndusụk owo ndibuọt idem ke Abasi. Emi ekeme ndidi sia mmọ mîtịmke ifiọk enye. Magazine emi ikemeke nditịn̄ kpukpru ntak emi anamde ndusụk owo ẹkere ke Abasi esidi anam eti anam idiọk. Edi iyom ndinam fi ọfiọk ke udutuaha n̄kpọfiọk edieke odomode nditịm mfiọk Abasi. * Nnyịn imenịm ke edieke anamde emi, ke eyenen̄ede ọfiọk Abasi. Ke ima ikeneme kpukpru emi, ndi enen ndikere ke esidi Abasi anam eti anam idiọk? Inenke. Enye esinam eti n̄kpọ kpọt. Bible ọdọhọ ke “Abasi edi ima.”—1 John 4:8.