Ata Abasi okobot kpukpru n̄kpọ. Enye inyeneke ntọn̄ọ idinyụn̄ inyeneke utịt. (Psalm 90:2) Enye enyene eti mbụk emi odude ke Bible. (1 Timothy 1:11) Nnyịn ikpenyene ndituak ibuot nnọ enye ikpọn̄-ikpọn̄ sia enye ọnọ nnyịn uwem.​—Kot Ediyarade 4:11.

Akananam baba owo kiet ikwe Abasi sia enye edide Spirit, ndien emi ọwọrọ ke enye enen̄ede okon̄ akan mme owo ke isọn̄. (John 1:18; 4:24) Mme n̄kpọ oro Abasi obotde ẹnam ifiọk mme edu Abasi. Ke uwụtn̄kpọ, nsio nsio mfri ye mme flawa emi Abasi obotde ẹwụt ke enye enyene ọniọn̄ onyụn̄ ama nnyịn. Akaka ekondo nnyịn owụt ke Abasi enyene odudu.​—Kot Rome 1:20.

Ndikot Bible ayanam ikpep ekese iban̄a Abasi. Ke uwụtn̄kpọ, Bible anam ifiọk se Abasi amade ye se enye asuade, nte enye esinamde n̄kpọ ye mme owo, ye nte enye esinamde n̄kpọ ke ini n̄kpọ etịbede.​—Kot Psalm 103:7-10.

Jesus ọkọdọhọ ete: “Ete nnyịn emi odude ke heaven, yak ẹnam enyịn̄ fo asana.” (Matthew 6:9) Okposụkedi emi Abasi enyenede ediwak udorienyịn̄, enyịn̄ kiet kpọt ke enye enyene. Ẹkot enyịn̄ emi ẹtiene nte usem kiet kiet etiede. Nnyịn isikot enye “Jehovah” nte ẹsinyụn̄ ẹkotde ke Ikọmbakara​—Kot Psalm 83:18.

Ẹsion̄o enyịn̄ Abasi ẹfep ke ediwak Bible ẹnyụn̄ ẹda mme udorienyịn̄ nte Ọbọn̄ m̀mê Abasi ẹdọn̄ ke mme ebiet emi enyịn̄ emi okpodude. Edi ke ini ẹkewetde Bible, enyịn̄ emi ama odu ebe utịm ike-7,000. Jesus ama anam mme owo  ẹfiọk enyịn̄ Abasi ke ndisikot enyịn̄ emi ke ini enye ọkọkwọrọde Ikọ Abasi ọnọ mmọ.​—Kot John 17:26.

Se vidio emi Abasi Ekere Didie?

Ndi ekese ufen oro ibọde ọwọrọ ke Jehovah Abasi ikereke iban̄a nnyịn? Ndusụk owo ẹdọhọ ke Abasi esimia owo ufen man odomo owo ese, edi emi idịghe akpanikọ.​—Kot James 1:13.

Abasi ọnọ nnyịn ifụre ndibiere se iyomde ndinam. Ndi nnyịn imaha nte Abasi ọnọde nnyịn ifụre ndibiere m̀mê iyanam n̄kpọ esie m̀mê idinamke? (Joshua 24:15) Ekese ufen oro ibọde mfịn edi koro ediwak owo ẹmekde ndinam mbon en̄wen idiọk. Esinen̄ede abiak Jehovah ndikụt utọ n̄kpọ emi.​—Kot Genesis 6:5, 6.

Jehovah Abasi ekere aban̄a nnyịn. Enye oyom nnyịn ikop inem uwem. Ibịghike enye ọmọn̄ etre ufen onyụn̄ osobo mbon oro ẹnamde mme owo ẹbọ ufen. Edi enyene eti ntak emi anamde Jehovah ayak mme owo ẹbọ ufen ke esisịt ini. Iyekpep iban̄a emi ke ọyọhọ Ukpepn̄kpọ 8.​—Kot 2 Peter 2:9; 3:7, 13.

Jehovah ọdọhọ isan̄a ikpere imọ ke akam. Enye ekere aban̄a nnyịn owo kiet kiet. (Psalm 65:2; 145:18) N̄ko, Enye enyịme ndifen mme idiọkn̄kpọ nnyịn. Enye okụt ukeme oro isịnde ndinam se inemde enye esịt kpa ye oro isiduede enye ndusụk ini. Mmọdo, imekeme ndidi ufan Abasi kpa ye oro idide mme anamidiọk.​—Kot Psalm 103:12-14; James 4:8.

Akpana ima Jehovah ikan nte imade owo ekededi sia enye ọnọ nnyịn uwem. (Mark 12:30) Afo ediwụt ke imama Abasi ke ndikpep ekese mban̄a enye nnyụn̄ nnam se enye ọdọhọde, ndien emi ayanam etetịm asan̄a ekpere enye.​—Kot 1 Timothy 2:4; 1 John 5:3.