Ena Maji 2019, e vakatulewataki e tolu na kisi me baleti ira na tacida ena mataveilewai cecere duadua (Supreme Court of Cassation), e Bulgaria. E vakatulewataka na mataveilewai nira sega ni cala na tacida. E yaga sara ga na vakatulewa qori ni taqomaki kina nodra galala ni sokalou na tacida.

E rua na kisi e baleta tiko nodrau vosavakacacataki ira na tacida e rua na tabana ni tukutuku. Ena 2012, e tabaka na niusipepa (Vseki Den) e dua na itukutuku lasu me baleta noda vakabauta. E vakaraitaka tale ga ena 2014, na siteseni retioyaloyalo (SKAT TV) e dua na ripote lasu me baleta noda isoqosoqo. Ia e sega ni duavata na tabana ni itukutuku nodra kerea na tacida me vakadodonutaki na ka era lasutaka. Oti e vica vata na kisi kei na kerekere, sa qai tauca na lewa na Mataveilewai Cecere. Ena ika18 ni Maji, 2019, e vakatulewataka na Mataveilewai Cecere ni cala vakalawa na ka e cakava na SKAT TV. Ena ika26 ni Maji, e yavutaka na Mataveilewai na lewa vata ga e tauca ina siteseni me totogitaka kina na Vseki Den, ni lasu e uqeta tiko ga na veicati.”

Na ikatolu ni kisi e baleta tiko nodra vakacacani na tacida vei ira na isoqosoqo vakapolitiki era vakatokai na VMRO-Bulgarian National Movement. Ena ika17 ni Epereli 2011, era soqoni vata na tacida ena iVakananumi ni Mate i Jisu. Era mokulaki na tacida vei ira na ilawalawa voravora e rauta nira le 60 vakacaca, e liutaki ira o Georgi Drakaliev. E levu na tacida era mavoa kina, era mani kauta ina mataveilewai na ka e yaco, e tini sara ina Mataveilewai Cecere. Ena ika20 ni Maji, 2019 e vakatulewataka na Mataveilewai ni cala o Mr. Drakaliev, e totogitaki me saumi ira vakailavo na tacida.

Eda marau ena tolu na vakatulewa e caka qori, sa yavutaki sara ga kina na kena taqomaki nodra galala ni sokalou na tacida mera ‘bula galala tiko ga, mera vakacegu nira qarava mai vu ni lomadra na Kalou.’—1 Timoci 2:2.