“Nodra iTavi na Yalewa ena Tarataravaki”
E vakavinavinakataka e dua na kabani levu ni tarataravaki e Peritania nodra sasaga na iVakadinadina i Jiova mera vakavulici na yalewa ena vakayagataki ni misini lelevu ena vanua ni tarataravaki ni valenivolavola ni tabana vou, volekati Chelmsford, e Essex. E solia na Considerate Constructors Scheme * (CCS) vei ira na iVakadinadina i Jiova na maka levu duadua ena nodra vakaitavitaki na yalewa ena tarataravaki, e kaya tale ga nira “duatani sara.” Cava e va kina qori nodra rai?
E rauta ga ni 13 na pasede na yalewa e Peritania era dau tarataravaki. Ena vakadidike e cakava e dua na kabani e Peritania, e laurai ni vica wale sara na goneyalewa era taleitaka na tarataravaki. Ia e rauta ni 40 na pasede na tacida yalewa era tarataravaki tiko e Chelmsford. E sivia tale ga e 60 na pasede na tacida yalewa era vakayagataka na misini lelevu.
Era cakacaka vata na yalewa kei na tagane e Chelmsford
Cava e vukei ira na tacida yalewa qori mera vakayacora vinaka nodra itavi? Na veivakavulici kei na veitokoni. Qori e rua na ka e okati ena ivakatagedegede ni CCS. E uqeti ira kina na dau taravale mera raica vakabibi nodra cakacaka, mera “dau veidokai ena vanua ni cakacaka, kua ni veivakaduiduitaki, veiuqeti kei na veitokoni,” okati tale ga kina “nodra vakabibitaka na veivakavulici.”
Era Vakavulici na Yalewa Mera Vakayagataka na Misini Lelevu
E dua na tacida yalewa o Jade, e vakavulici ena vakayagataki ni misini lelevu ni kelikeli, e draivataka tale ga na lori levu ni usa qele. E kaya: “Dua na ka noqu taleitaka! Au sega vakadua ni tadra meu na cakava rawa na cakacaka qo. Eso na gauna e ka ni sasaga toka, ia au cakava tiko ga ni levu na ka au vulica kina.” Dua tale o Lucy, e kila tale ga na vakayagataki ni misini lelevu. E kaya: “Matai ni gauna au gole mai kina, au sega sara tu ga ni kila e dua na ka meu veivuke kina ena cakacaka qo. Ia au vakavulici ena imatai ni siga. Yacova mai qo, au sa cakacaka oti kei na lima na duidui timi, levu gona na ka au sa vulica!”
Caka tiko na veivakavulici ena vakayagataki ni misini na telehandler
Levu na ka era vulica na yalewa ena timi era cakacaka kina, sega ni vakayagataki misini lelevu ga. E kaya o Eric e liutaka tiko e dua na timi ni tarataravaki: “Era dau maroroya vinaka na misini na yalewa ni vakatauvatani kei ira na tagane, era kila tale ga ke sa ca na misini era na ripotetaka.”
Tokoni Nodra Vakaitavi na Yalewa ena Tarataravaki
E kaya o Carl e liutaka e dua na timi ni vakayagataki na misini lelevu: “Au qoroya na totolo ni nodra vulica na yalewa na draivataki misini lelevu. Eso na gauna, au na digi ira ga mera draiva sega soti o ira na tagane e vakayabaki tu nodra draiva!”
Vakayagataki tiko na misini e semata na paipo ni wai
Nira vakaraitaka na liutaka na cakacaka nodra veitokoni, era nuidei kina na vakavulici tiko. Kena ivakaraitaki o Therese. Sa kenadau tu qo ena vakayagataki ni misini lelevu, na gauna e vakayagataka kina na misini lelevu ena raica vakabibi nona itavi, kei na qaqarauni me kua na vakacalaka. E kaya: “E levu sara na ka au cakava ni tokoni au qai nuitaki au o koya e liutaka na cakacaka . E sega ni matewale noqu sasaga niu kila nira na taleitaka e levu noqu cakacaka, era na doka tale ga!”
Dua tale o Abigail e kila na vakayagataki ni misini kei na draivataki na lori lelevu ni usa qele, e vakavinavinakataka na veitokoni kei na duavata. E kaya: “Era sega ni veivakaduiduitaki na tagane keimami cakacaka vata. Era tu vakarau mera veivuke, era sega ni lewa se siova noqu cakacaka.”
Era Gumatua Qai Dau Cakacaka
Era vulica na yalewa era tarataravaki e Chelmsford eso tale na cakacaka me vaka na sovea, vakayagataki vakavuku na iyaubula kei na qele, ripeataki na misini, kei na vakaduri ni kaukamea e vakayagataki. E kaya o Robert e cakacaka vata kei ira na yalewa ena duidui tabana, nira “gumatua, era dau cakacaka, ra qai talairawarawa.” E kaya o Tom e dau sovea: “O ira na yalewa keimami cakacaka vata era dau raica vakamatailalai na ka, era qaqarauni tale ga. Era vinakata me caka vinaka sara ga.”
Sa rauta me kaya kina o Fergus: “E tiko nodra itavi na yalewa ena tarataravaki!”
^ para. 2 Na Considerate Constructors Scheme e dua na isoqosoqo e raica me vakavinakataki tiko ga na veika e vauca na tarataravaki e Peritania.
Rawa ni o Wilika Tale ga
NA VALE NI VAKATAWA
Na Kalou e Kauaitaki Ira Dina na Yalewa?
TARO E TAROGI WASOMA
E Tiko na Nomuni iTalatala Yalewa?
Na cava nodra itavi na yalewa ena cakacaka vakavunau era vakayacora na iVakadinadina i Jiova e veiyasa i vuravura?
TARATARAVAKI
iKatolu ni iWasewase ni iTaba ni Valenivolavola ni Tabana e Peritania (Seviteba 2016 ina Feperueri 2017)
Toso totolo sara tiko na cakacaka ena valenivolavola ni tabana ni iVakadinadina i Jiova e Peritania.