De dua era sa vakayagataka nomu itokani na sala ni veikilai ena internet, ra qai dau veitalanoataka vakalevu. Rairai era na vakalialiai iko ni o sega ni vakayagataka. Na cava mo nanuma tiko ena ituvaki qori, kei na ka mo cakava kina?

 Sega ni o iko ga o vakila tiko qori. E levu na itubutubu e sega ni vakatarai ira na luvedra mera vakayagataka na sala ni veikilai ena internet. E rairai era kila ni na rawa ni yaco kina na leqa me vaka na:

•   lomabibi kei na tauvimate ni vakasama.

•   saravi ni iyaloyalo vakasisila, vakau vua se vakauta na itaba vakasisila, kei na veivakasagai ena internet.

•   rawa ni vakaleqa na veitokani.

 Levu na itabagone era vakatulewataka mera kua ni vakayagataka na sala ni veikilai ena internet. Era liaca ni sa vakaleqai ira tiko vakalevu na sala ni veikilai ena internet. Dikeva mada qo eso na ivakaraitaki dina:

•   E raica o Priscilla ni vakalusia nona gauna e rawa ni vakayagataka ena veika e yaga cake.

•   E sega ni lewa rawa o Jeremy na levu ni iyaloyalo vakasisila e basika ena nona iyaya vakalivaliva.

•   E raica o Bethany ni sa kauaitaka tale vakasivia na ka era cakava tiko eso.

 “Au vakatulewataka meu bokoca na sala ni noqu veikilai ena internet. Au marautaka sara ga, e levu tale ga na gauna au vakayagataka ena ka e bibi cake.”—Sierra.

 “Au sega ni taleitaka ni rawarawa noqu bobula ena sala ni veikilai ena internet. Eso na gauna au dau leqataka tale ga nodra rai eso tale ena vidio se itaba au biuta. E dredre sara ga meu bokoca na sala ni noqu veikilai ena internet. Ia au vakila na vakacegu.”—Kate.

 Talairawarawa vei rau nomu itubutubu. Vakaraitaka vei rau ni o yalomatua ni o muria nodrau lewa qai kua ni cudru se vosakudrukudru.

 iVakavuvuli vakaivolatabu: “Na tamata yalowai e totolo ni vakaraitaka nona cudru, ia o koya e vuku e vosovoso qai lewai koya vinaka.”—Vosa Vakaibalebale 29:11, Easy-to-Read Version.

 Eso era na rawa ni tukuna vei iko mo vunitaka se cakava lo vei rau nomu itubutubu nomu sala ni veikilai ena internet. E cala sara ga qori! Ena rawa ni vakavuna ga nomu lomaleqa qai ora na lomamu. Ena rawa tale ga ni vakaleqai iko ke rau kila na nomu itubutubu, ena dredre tale ga me rau nuitaki iko.

 iVakavuvuli vakaivolatabu: “Keitou vinakata me keitou dina ena ka kece.”—Iperiu 13:18.

 Vakadeitaka ni o na cakava. Me vakai ira ga na itabagone sa cavuti oti mai, o na rairai vakasamataka e levu na vuna mo kua ni vakayagataka kina na sala ni veikilai ena internet. Ke o nanuma ni vinaka vei iko, kua ga ni vakayagataka. Me kua ni rau vakatulewa ga vei iko na nomu itubutubu, o iko tale ga mo vakadeitaka ni qori na ka o via cakava. Na sala qori o na sega kina ni madua ke ra tarogi iko nomu itokani, era na sega tale ga ni vakalialiai iko.

 Bibi me nanumi: Talairawarawa vei rau nomu itubutubu, qai saga mo raica eso na ka dou duavata kina me baleta na sala ni veikilai ena internet me rawa ni o vakatulewa vakataki iko. O rawa ni marautaka tiko nomu bula ke o sega mada ga ni vakayagataka na sala ni veikilai ena internet ena gauna qo.