Na bakewa e dua na mataqali ika e dau kabita eso na manumanu ni waitui. E rawarawa tale ga ni taluva mai kina, qai sega ni vakamavotaka. Era kurabuitaka na dauvakadidike na veika e cakava.

 Vakasamataka mada: Ke mani corocoroa se dravia na kuli ni manumanu ni waitui ena kabi ga kina na bakewa. Kena ivakaraitaki, e dau kabita na vai, qio, vonu, tovuto kei na so tale na manumanu ni waitui. E kania na manumanu lalai kei na vo ni kena kakana na manumanu e kabita. E vakarawarawataka nona veitosoyaki ni kabita e dua tale na manumanu, e taqomaki vinaka tale ga. Era vulica tiko na dauvakadidike na nona kabikabi, nira via kila na sala e malumu qai kaukaua vinaka kina na nona kabi.

 Era kabita dei toka na bakewa e dua na qio vakaitamera

 E toka e uluna nona kabikabi. E raoni, vavaku, malumu, ra qai yatuni tu kina na sui somidi, qori e vukea me dregata vinaka na ka e kabita. Ni vakaduria na nona kabikabi, ena veitaratara na sui somidi qori kei na kulinimanumanu e kabita. Na iwalewale qori ena vukea me kabi dei tiko ga se mani vakacava na totolo se veimoiyaki ni manumanu e kabita.

 Era qoroya na saenitisi na kabikabi ni bakewa ra mani vakatotomuria e dua na kena ibulibuli. E raoni qai rawa ni kabi ena vanua cava ga. Nira saga mera dreta laivi, na kaukaua ni kena kabi e tautauvata ni vakalevutaki vakavica vata na drau na kena bi!

 Levu na ka e rawa ni vakayagataki ena iyaya vakalivaliva me vakatotomuria na kabikabi ni bakewa. Qori e okati kina na ivakatakilakila era vakabira na dauvakadidike vei ira na manumanu ni waitui, dikevi ni botonisauloa kei na vakabiri ni cina se so tale na iyaya ni cakacaka ena ruku ni wavu se waqa.

 Cava o nanuma? E buli se bula vakaidewadewa na kabikabi ni bakewa?