VEIVOSAKI KEI TAUKEINIVALE
E Kauaitaka na Kalou na Noda Rarawa?
Qo e dua na ivakaraitaki ni ka e rawa ni veivosakitaka kei taukeinivale e dua na iVakadinadina i Jiova. Kaya mada e gole yani ina vale nei Miri o Sala e dua na iVakadinadina.
NA CAVA E VAKALAIVA KINA NA KALOU MEDA RARAWA?
Sala: Au veisoliyaka tiko mai e dua na tikidua, kena ulutaga O Via Kila na ka Dina? Qo na nomu ilavelave.
Miri: Qori na ka ni lotu?
Sala: Io. E tiko qo e ono na taro. Na taro cava o
Miri: Wawa! O na vakalusia ga nomu gauna.
Sala: Baleta?
Miri: Au sega ni vakabauta na Kalou.
Sala: Au marautaka ni o vakaraitaka mai vakadodonu. E dau va qori tu ga nomu rai?
Miri: Sega. Au dau lai lotu niu se gone, ia qo sa sega.
Sala: Oi. Isa, na yacaqu o Sala.
Miri: O au o Miri.
Sala: Au marau ni daru sota nikua.
Miri: Vinaka na veisiko mai.
Sala: Au sega ni via vakasaurarataki iko Miri mo veisautaka na nomu vakabauta. Ia au kauai ga ni o tukuna ni o sega ni vakabauta na Kalou. Dua na vuna?
Miri: Io. A laucoqa o tinaqu ena 17 na yabaki sa oti.
Sala: Isa. A mavoa levu?
Miri: Io, sa paralase tu qo.
Sala: Au kila ni o rarawataka sara ga qori.
Miri: Io, dua na ka noqu rarawa. Qori na vuna au dau taroga kina: Ke bula dina na Kalou, na cava e vakalaiva kina meda rarawa?
E CALA KE DA TAROGA NA VUNA?
Sala: E sega ni cala ke va qori nomu rai. E kena ivakarau ga meda via kila na vuna eda rarawa kina. Eso mada ga na tagane kei na yalewa yalodina ena gauna vakaivolatabu era dau vaqaqa tale ga qori!
Miri: E dina?
Sala: Io. O via raica e dua na kena ivakaraitaki ena iVolatabu?
Miri: Io.
Sala: Dikeva na ka a taroga na parofita yalodina o Apakuki vua na Kalou ena Apakuki, wase 1, tikina e 2 kei na 3: “A cava na kena dede, kemuni Jiova, me’u sa tagi, ka kemuni sa sega ni rogoca? au sa tagi vei kemuni e na vuku ni valavala kaukauwa, ia ko ni sa sega ni ia na veivakabulai? A cava ko ni sa vakatakila kina vei au na ca?” Vakacava e tautauvata tale ga qori kei na ka o taroga?
Miri: Io.
Sala: E sega ni cudruvi Apakuki na Kalou ni taroga qori, se tukuna vua ni lailai nona vakabauta.
Miri: Sa dina!
E CATA O JIOVA NA RARAWA
Sala: E vakavuvulitaka na iVolatabu ni kauaitaka na Kalou na veika rarawa eda sotava.
Miri: E kauai dina?
Sala: Meu vakaraitaka mada vei iko e dua na kena ivakaraitaki ena Lako Yani 3:7. Kerekere wilika mada mai.
Miri: Sa donu. E kaya: “A sa kaya ko Jiova, au sa raica dina na nodra rarawa na noqu tamata, era sa tiko mai Ijipita, ka’u sa rogoca talega na nodra tagi e na vukudra era sa lesia vakabibi na nodra cakacaka; ni’u sa kila na nodra rarawa.”
Sala: Vinaka. O raica rawa e keri ni kauaitaka na Kalou na nodra rarawa na nona tamata?
Miri: Io.
Sala: E sega ni raica wale tu ga na ka eda sotava. Raica tale mada na iotioti ni tikina ena tikinivolatabu qori. E kaya na Kalou: “Ni’u sa kila na nodra rarawa.” Ena cavuta beka qori qori e dua na Kalou e dau veivakalolomataki?
Miri: Sega.
Sala: E macala e keri ni Kalou e sega ni raica wale ga na noda rarawa, e vakararawataki koya sara ga.
Miri: Oi sa dina.
Sala: Ni o vakasamataka tiko qori, daru raica tale mada e dua na ivakaraitaki. E vakamacalataki qori ena Aisea 63:9. E tukuna na imatai ni cegu: “E na nodra rarawa kecega sa rarawa kina ko koya.” E vakaraitaka beka qori ni tarai Jiova na rarawa era sotava na nona tamata?
Miri: Io, vaka vei au.
Sala: Miri, ke sa va qori, kena ibalebale e kauaitaki keda dina na Kalou, e sega tale ga ni taleitaka meda rarawa. E rarawa ena gauna eda rarawa kina.
NA CAVA SA RUI DEDE KINA?
Sala: Ni bera niu gole, au via vakaraitaka ga e dua tale na tikina.
Miri: Sa donu.
Sala: Dikeva mada na ka e tukuna na iVolatabu me baleta na kaukaua ni Kalou. E vakamacalataki ena Jeremaia 10:12. Kerekere wilika mada.
Miri: E kaya: “Sa bulia na vanua ko koya e na nona kaukauwa, ka vakataudeitaki vuravura e na nona vuku, ka tevuka yani na lomalagi e na nona yalomatua.”
Sala: Vinaka. Vakasamataka mada na ka e tukuni tiko e keri. Sa wacava na levu ni kaukaua e tu vua na Kalou me bulia na lomalagi kei na vuravura kei na ka kece era tu kina, se vakacava?
Miri: Dina sara ga.
Sala: Ke tu vua na Kalou na kaukaua me bulia na veika era tu wavokiti keda, e macala ga ni tu tale ga vua na kaukaua me na vakaotia na veika rarawa eda sotava, se vakaevei?
Miri: Io.
Sala: Kena ivakaraitaki ga o nomu Na. Na cava o rarawataka kina na ituvaki mosimosi e sotava tiko?
Miri: Niu lomani koya.
Sala: Ke tiko vei iko na kaukaua, o na vakaotia na nona rarawa?
Miri: Io.
Sala: Vakasamataka mada qori. E tukuna na iVolatabu ni kauaitaka noda rarawa na Kalou, e lomani keda, qai levu na nona kaukaua. Ia e vosota voli na Kalou qai sega ni yalototolo me vakaotia na noda rarawa.
Miri: Au sega ni bau vakasamataka tu va qori.
Sala: O nanuma ni tiko na vuna vinaka e vakalaiva kina meda sotava na rarawa? *
Miri: Io, de dua.
Sala: Vakacava meu lesu tale mai ena dua na gauna me daru veitalanoataka na ulutaga qori?
Miri: Au na marautaka sara ga. *
O dau lomatarotarotaka tu e dua na ulutaga mai na iVolatabu? O via kila na ka era vakabauta na iVakadinadina i Jiova kei na nodra ivakarau ni sokalou? Ke vakakina, taroga e dua na iVakadinadina i Jiova. Era na marau mera vakamacalataka vei iko na kena isau.
^ para. 61 Me ikuri ni ivakamacala, raica na wase 11 ni ivola Na Cava Sara e Kaya na iVolatabu? tabaka na iVakadinadina i Jiova.
^ para. 64 Ena qai vakamacalataki ena dua tale na ulutaga e muri na vuna e vakalaiva kina na Kalou meda sotava na rarawa.