È nɔ zán xógbe “Samalíinu ɖagbe” ɔ ɖo kpaa mɛ dó dó gesí mɛ e nɔ d’alɔ mɛ ɖěvo e ɖo hudó mɛ lɛ́ é ɖé. Lǒ e Jezu dó bó ná dó xlɛ́ ɖɔ nɔzo ɖagbe ɖé nɔ d’alɔ mɛ ɖěvo lɛ́ kpó nǔbláwǔkúnúmɛ kpó, ma kpɔ́n to e mɛ yě gosín é, alǒ fí e yě jɔ sín é é mɛ wɛ è ɖe xógbe ɔ sín. a

Ðo xóta élɔ́ mɛ ɔ, mǐ ná ɖɔ xó dó nǔ élɔ́ lɛ́ jí:

•  Étɛ́ ka nyí “Samalíinu ɖagbe” ɔ sín lǒ?

•  Étɛ́wú Jezu ka dó lǒ énɛ́?

•  Nǔkplɔ́nmɛ tɛ́ ka ɖo lǒ ɔ mɛ?

•  Mɛ alɔkpa tɛ́ Samalíinu lɛ́ ka nyí?

•  Nǔ e jɛ nǔgbó nǔgbó é jɛ́n “Samalíinu ɖagbe” ɔ sín tan nyí a?

Sin sɛ xwe ná lǒ e Jezu dó é tɔn ɖíe: Nya Jwifu ɖé gosín Jeluzalɛ́mu wá xwe Jelíko. Hwenu e é ɖo yiyi wɛ ɖo ali ɔ jí é ɔ, ajotɔ́ lɛ́ fin nǔ tɔn lɛ́, xo è, lobo jó è dó nyi beɖebeɖe.

Jwifu vɔ̌sánúxwlémawutɔ́ ɖé gbɔn nya tomɛyitɔ́ e gblé wǔ é kpá bó dín, bɔ nukɔnmɛ ɔ, sinsɛngán Jwifu ɖěvo lɔ wa mɔ̌. Yě kpó tomɛyitɔ́ ɔ kpó bǐ wɛ nyí to ɖokpó ɔ mɛ nu có, yě mɛ ɖě ka nɔ te bó d’alɔ ɛ vɔ́vɔ́ ǎ.

Gǔdo mɛ ɔ, nya toɖévomɛnu ɖé wá xweyǐgbe. Samalíinu ɖé wɛ n’i. (Luki 10:33; 17:16-18) É blá wǔ nú Samalíinu ɔ, bɔ é kpé nukún dó akpa nya ɔ tɔn lɛ́ wú. Énɛ́ gúdo ɔ, é kplá ɛ yi xwé e gbe alitanu lɛ́ nɔ yi nɔ é ɖé. É kpé nukún dó wǔ tɔn zǎn ɔ bǐ mɛ ɖo fínɛ́. Ayǐhɔ́ngbe tɔn ɔ, é s’axɔ́ xwénɔ ɔ, ɖɔ é ní kpé nukún dó nya ɔ wú, bó lɛ́ ɖɔ n’i ɖɔ émí ná lɛ́ sú akwɛ́zínzán ɖěvo e sixú wá xwetɔ́n lɛ́ é sín axɔ́.—Luki 10:30-35.

Nya e lin ɖɔ mɛ e kpó émí kpó nyí akɔ ɖokpó ɔ lɛ́, bó lɛ́vɔ́ ɖo sinsɛn ɖokpó ɔ mɛ lɛ́ é kɛ́ɖɛ́ wɛ nyí nɔzo émítɔn lɛ́ é wɛ Jezu dó lǒ ɔ ná. Jezu ba ná kplɔ́n nǔ tají ɖé nya ɔ, é wɛ nyí ɖɔ, nya ɔ ɖó ná mɔ nǔ jɛ wú ɖɔ “nɔzo” mɛtɔn xó ɔ kún fó ɖó Jwifu hǎtɔ́ mɛtɔn lɛ́ kɛ́ɖɛ́ jí kpowun ó. (Luki 10:36, 37) È sɔ́ tan énɛ́ lɔ dó Biblu mɛ, bó ná dó kplɔ́n nǔ tají ɖé mɛ e jló ná nyɔ́ Mawu nukúnmɛ lɛ́ é bǐ.—2 Timɔtée 3:16, 17.

Tan ɔ kplɔ́n mɛ ɖɔ nɔzo ɖagbe ɖé nɔ ɖe xlɛ́ ɖɔ émí nɔ se wǔvɛ́ xá mɛ, gbɔn nǔwiwa tɔn lɛ́ gblamɛ. É nɔ wa nǔɖé dó d’alɔ mɛ e ɖo wǔvɛ́ mɛ é ɖé, nú mɛ ɔ ná bó tlɛ gosín fí ɖěbǔ, ɖó sinmɛ agbaza tɔn ɖěbǔ, alǒ nyí to ɖěbǔ mɛ nu ɔ nɛ́. Nɔzo jɔ nɔzo ɖé nɔ wa nǔ xá mɛ ɖěvo lɛ́ lěe é nɔ ba ɖɔ è ní wa nǔ xá émí gbɔn é.—Matíe 7:12.

Samalíinu lɛ́ nɔ nɔ xá ɖé mɛ ɖo totaligbé Judée tɔn. Jwifu ɖěɖěe da mɛ e ma nyí Jwifu ǎ lɛ́ é wɛ dó kún yě mɛ ɖé lɛ́ tɔn.

Ðo xwe kanweko nukɔntɔn H.M. tɔn mɛ ɔ, Samalíinu lɛ́ ɖó sinsɛn yěɖésúnɔ tɔn ayǐ. Yě yí gbe nú wěma atɔ́ɔ́n nukɔntɔn Nǔwlánwlán mímɛ́ Ebléegbe tɔn lɛ́ tɔn, bó ka gbɛ́ éé kpó lɛ́ é.

Jwifu e nɔ gbɛ ɖo Jezu hwenu lɛ́ é gěgé gbɛ́ wǎn nú Samalíinu lɛ́, bó nɔ ba ná kpé nǔ ɖěbǔ xá yě ǎ. (Jaan 4:9) Jwifu ɖé lɛ́ nɔ zán xókwín “Samalíinu” dó zun mɛ ná.—Jaan 8:48.

Nú nǔ e jɛ nǔgbó nǔgbó e ɖé jí wɛ è zɔn dó, dó dó lǒ dó Samalíinu ɔ wú kpó è gbɔ kpó ɔ, Mawuxówéma ɔ ɖɔ ǎ. É ɖo mɔ̌ có, Jezu nɔ ɖɔ xó dó aca e tóɖóetɔ́ lɛ́ tuun ganjí lɛ́ é kpó fí ɖěɖěe yě tuun ganjí lɛ́ é kpó wú hwɛhwɛ ɖo nǔkplɔ́nmɛ tɔn lɛ́ mɛ, bónú yě ná dó sixú mɔ nǔ jɛ nǔ tají e kplɔ́n mɛ wɛ é ɖe é mɛ.

Gǒflɛ́mɛ tan énɛ́ tɔn lɛ́ gěgé sɔgbe ɖo hwenuxó linu. Ði kpɔ́ndéwú ɔ:

• Ali e gosín Jeluzalɛ́mu yi Jelíko é ɖi ga nú kilomɛ́tlu 20 jɛjí, bɔ kilomɛ́tlu ɖokpó ɖ’é mɛ bó nyí sáan hwaa. Tan ɔ lɔ ɖɔ pɛ́pɛ́pɛ́ ɖɔ tomɛyitɔ́ e xwe Jelíko é “jɛ te sín Jeluzalɛ́mu.”—Luki 10:30, nwt.

• Vɔ̌sánúxwlémawutɔ́ lɛ́ kpó sinsɛngán Jwifu ɖěvo lɛ́ kpó e nɔ nɔ Jelíko é nɔ gbɔn ali énɛ́ hwɛhwɛ wá yi Jeluzalɛ́mu.

• Ajotɔ́ lɛ́ nɔ tɔ wu nú tomɛyitɔ́ lɛ́ ɖo ali énɛ́ e jɛ gblǒlǒ mɛ é jí hwɛhwɛ bó ná dó gbo ali nú yě, tají ɔ, nú mɛ ɖěɖěe nɔ zɔn yěɖokpó lɛ́ é.