“Mawu e nɔ ná mɛ nukúnɖíɖó é ní bló bónú awǎjijɛ ɖaxó kpó fífá ɖaxó kpó ní gɔ́ ayi mitɔn mɛ, ɖó ji e mi ɖe dó wǔ tɔn é wú, bónú nukúnɖíɖó mitɔn ní dó sixú túnflá, gbɔn hlɔ̌nhlɔ́n gbigbɔ mímɛ́ tɔn gblamɛ.”—Hlɔ̌manu lɛ́ 15:13, Biblu gbɛ yɔ̌yɔ́ ɔ tɔn.

 “Mawu e gɔ́n nukúnɖíɖó nɔ gosín ɔ, ní bló bónú awǎjijɛ e nǔ bǐ vɔ ɖ’é wú ɔ kpódó fífá e nǔ bǐ vɔ ɖ’é wú ɔ kpó ní gɔ́ ayi mɛ nú mi gbɔn nǔɖiɖi e mi ɖó n’i ɔ jí, bónú nukúnɖíɖó mitɔn ná túnflá gbɔn Yɛsinsɛn sín hlɔ̌nhlɔ́n jí.”—Hlɔ̌manu lɛ́ 15:13, MAWUXÓWÉMA.

 Mɛsɛ́dó Pɔ́lu zán xógbe énɛ́ lɛ́ dó xlɛ́ ɖɔ émí ba ɖɔ Mawu ní ná ‘awǎjijɛ kpó fífá kpó’ nǔɖitɔ́ hǎtɔ́ émítɔn lɛ́. Jijɔ ɖagbe ɖagbe énɛ́ lɛ́ cá kan xá nukúnɖíɖó e Mawu nɔ ná mɛ é kpó hlɔ̌nhlɔ́n gbigbɔ mímɛ́ tɔn kpó.

 Xó Mawu tɔn Biblu ɔ kplɔ́n nǔ mǐ dó nukúnɖíɖó e Mawu nɔ ná mɛ é wú. Sɔgbe kpó Hlɔ̌manu lɛ́ 15:4 kpó ɔ, “nǔ e è ko wlán ɖ’ayǐ [ɖo Biblu mɛ] lɛ́ é bǐ ɔ, è wlán yě bo ná dó kplɔ́n nǔ mǐ, bónú gbɔn dɛ e mǐ nɔ dɛ é kpó gbɔ e Nǔwlánwlán mímɛ́ lɛ́ nɔ dó nú mɛ é kpó gblamɛ ɔ, mǐ ní dó sixú ɖó nukún nǔ.” Biblu kɔ́n sɛ sín akpá e Mawu dó bo ná ɖe ɖɛ tagba ɖěɖěe sixú zɔ́n bɔ è lin ɖɔ gbɛ kún ɖó nu ó lɛ́ é jí, ɖi ya, nǔagɔwaxámɛ, azɔn kpó kú kpó. (Nǔɖexlɛ́mɛ 21:4) Mawu ná bló bɔ akpá énɛ́ lɛ́ ná jɛnu gbɔn Jezu Klísu gblamɛ. Énɛ́ wú wɛ mǐ sixú ɖó nukún sɔgúdo ɖagbe hú gǎn ɖé.—Hlɔ̌manu lɛ́ 15:12.

 Ényí mǐ ɖeji dó Mawu wú ɔ jɛ́n nukúnɖíɖó énɛ́ e é nɔ ná mɛ é sixú “túnflá” nú mǐ. Bǎ e mɛ mǐ kplɔ́n nǔ dó wǔ tɔn yi ɖó é ɔ, bǎ énɛ́ mɛ wɛ mǐ ná kú d’é jí ɖɔ è sixú ɖeji dó wǔ tɔn bǐ mlɛ́mlɛ́ yi ɖó. (Ezayíi 46:10; Titu 1:2) Ðó nukúnɖíɖó ɖejidéwú e Mawu nɔ ná mɛ é wútu ɔ, ényí mɛɖé ná bo tlɛ ɖo wǔvɛ́ lɛ́ mɔ wɛ ɔ, awǎjijɛ kpó fífá kpó sixú gɔ́ ayi mɛ ɔ tɔn mɛ.—Hlɔ̌manu lɛ́ 12:12.

 Fífá, awǎjijɛ kpó nukúnɖíɖó kpó lɛ́ cá kan xá “gbigbɔ mímɛ́” e nyí hlɔ̌nhlɔ́n e Mawu nɔ sɔ́ dó w’azɔ̌ ná é. a Mawu nɔ zán gbigbɔ mímɛ́ tɔn dó ɖe akpá tɔn lɛ́, bɔ énɛ́ nɔ ná mɛ nukúnɖíɖó. Gbigbɔ énɛ́ sixú lɛ́ bló bɔ è ɖó jijɔ ɖagbe lɛ́, ɖi awǎjijɛ kpó fífá kpó.—Galátinu lɛ́ 5:22.

 Wěma e è wlán sɛ́dó klisánwun e nɔ nɔ toxo Hlɔ̌ma tɔn mɛ lɛ́ é wɛ nyí wěma Hlɔ̌manu lɛ́ tɔn ɔ. Klisánwun énɛ́ lɛ́ hǎbǔ nyí Jwifu, bɔ yě mɛ ɖé lɛ́ ka nyí ǎ. Pɔ́lu dó wǔsyɛ́n lanmɛ nú yě mɛ bǐ ɖɔ yě gosín fí vovo bo ɖó walɔ vovo lɛ́ có, yě ní dó gǎn bo nɔ bǔ ɖo linlin kpó nǔwiwa kpó mɛ.—Hlɔ̌manu lɛ́ 15:6.

 Pɔ́lu flín klisánwun e ɖo Hlɔ̌ma lɛ́ é ɖɔ é ko lín din bɔ Mawu ɖɔ ɖ’ayǐ ɖɔ hweɖénu ná wá su, bɔ mɛ e gosín akɔta lɛ́ bǐ mɛ lɛ́ é ná ɖó gbe kpɔ́ dó kpa susu nú Émí. Bo ná dó nɔ gǔdo nú xó énɛ́ ɔ, Pɔ́lu ɖe xó sín Nǔwlánwlán mímɛ́ Ebléegbe tɔn lɛ́ b mɛ azɔn ɛnɛ. (Hlɔ̌manu lɛ́ 15:9-12) Nǔ e ɖɔ wɛ é ɖe é ɖíe: Sinsɛnzɔ́ Klísu tɔn sixú hɛn le wá nú mɛ e ɖo akɔta lɛ́ bǐ mɛ lɛ́ é gɔ́ nú Jwifu lɛ́. Nukúnɖíɖó e Mawu nɔ ná mɛ é ɖokpó ɔ wɛ gbɛ̌ta we lɛ́ bǐ ɖó. Énɛ́ wú ɔ, mɛ e ɖo agun Hlɔ̌ma tɔn mɛ lɛ́ é bǐ ɖó ná nɔ ‘yí yěɖée lɛ́,’ é wɛ nyí ɖɔ yě ɖó ná nɔ nyɔ́ xomɛ dó yěɖée lɛ́ wú, alǒ nɔ yí jǒnɔ yěɖée lɛ́ tɔn ényí yě ná bo gosín fí ɖěbǔ ɔ nɛ́.—Hlɔ̌manu lɛ́ 15:7.