Sɛ́n E Mawu Na Dó Wǔfifɛ́ Wu É Yì Jǐ Hú Ee Tíìn Hwenɛnu lɛ É flaflá Tɔn
É ko bló xwè 3 500 dìn, bɔ hwenu e togun Izlayɛli tɔn na byɔ Akpádídó Yikúngban ɔ jí é kpò kpɛɖé é ɔ, Mawu ɖɔ nú ye ɖɔ emi na cyɔn alɔ ye jí sín “awě baɖabaɖa” ɖěɖee ye tuùn ɖò Ejipu lɛ é sí. (Sɛ́nflínmɛ 7:15) Ali e nu é wà mɔ̌ ɖè lɛ é ɖokpo wɛ nyí alixlɛ́mɛ e zawě lɛ é nina ye dó lee ye na ɖu ɖò azɔn lɛ jí gbɔn é kpo lee ye na fɛ́wǔ gbɔn é kpo wu. Ði kpɔ́ndéwú ɔ:
Togun ɔ sín sɛ́n lɛ byɔ ɖɔ è ni nɔ lɛwǔ bo nɔ lɛ́ nya avɔ mɛtɔn lɛ.—Levíi ví lɛ 15:4-27.
Nú nǔ e kúnkplá gbɛtɔ́ sin sɔnǔɖa é ɔ, Mawu ɖɔ: “Mi na ɖó fí ɖé, bɔ é na ɖò zɔ nú fí e mi ɖó gɔnu ɖó é kpɛɖé, bo na nɔ yì afɔ jí ɖè. Mɛ ɖokpo ɖokpo na ɖó nǔɖe, bɔ nú é sɛ̀ yì zɔ ɔ, é na nɔ dó kun dò, bɔ nú e yì afɔ jí ɔ kpé ɔ, é na zé dó dɔn kɔ́ d’eji.”—Sɛ́nflínmɛ 23:12, 13.
È nɔ sɔ́ azinzɔnnɔ e è mɔ ɖɔ azɔn tɔn na jɛ mɛ ɖevo wu lɛ é ɖó zɔ nú mɛ lɛ nú táan ɖé. Cobonu mɛ e sín azɔn gbɔ lɛ é na lɛkɔ wá ɔ, ye ɖó na nya avɔ yetɔn lɛ bo lɛwǔ ɖò sin mɛ hwɛ̌ cobo na huzu “mɛ mímɛ́.”—Levíi ví lɛ 14:8, 9.
È nɔ sɔ́ mɛɖebǔ e ɖ’alɔ nǔ kúkú wu é ɖó zɔ nú togun ɔ.—Levíi ví lɛ 5:2, 3; Kɛ́nsísɔ́ 19:16.
Sɛ́n Izlayɛli tɔn lɛ cí linlin dotóozɔ́wiwa kpo wǔfifɛ́ kpo tɔn ɖɔhun bo yì jǐ hú sɛ́n ee tíìn ɖò hwe yetɔn nu lɛ é flaflá tɔn.
Ðò fí ɖevo lɛ ɔ, lee mɛ lɛ nɔ fɛ́wǔ gbɔn é bú vo dó mɛ lɛ ǎ. Ði kpɔ́ndéwú ɔ:
È nɔ kɔn zunkɔ́ dó ali lɛ jí. Sin kwijikwiji lɛ, nǔɖuɖu gblégblé lɛ kpo nǔ ɖevo lɛ kpo nɔ hɛn ayǐ ɔ jí gblé bo nɔ zɔ́n bɔ azɔn nɔ sukpɔ́ bɔ yɔkpɔvu gegě nɔ kú.
Dotóo hwexónu tɔn lɛ tuùn nǔ kaka ɖé alǒ nǔ ɖebǔ dó azɔnkwín kpo wǔjɔnú ɖěɖee sixu dó azɔn mɛ lɛ é kpo wu ǎ. Amasin enyíì ɖé lɛ, ɖi kanlin alɔ̌tlɔ́ ɖɔhun sín hun, tɔkpákpá pélican sín mǐ syɛnsyɛn, ajaka kúkú lɛ, aɖɔ̌, kpo wɔxúxú e funhwa lɛ é kpo wɛ Ejipunu lɛ nɔ zán. Ye nɔ lɛ zán sɔnǔɖa gbɛtɔ́ kabǐ kanlin tɔn ɖò dotóozɔ́wiwa yetɔn hwenu.
Nǔvínúví ɖěɖee ɖò tɔsisa Nilu kpo sindo tɔn lɛ kpo mɛ lɛ é nɔ dó azɔn Ejipunu hwexónu tɔn lɛ. Mɔ̌ ɖokpo ɔ, yɔkpɔvu e ɖò Ejipu lɛ é gegě nɔ kú ɖó xomɛslá alǒ nǔ mɔhun ɖevo e nǔɖuɖu e ma mɛ́ ǎ lɛ é nɔ dɔn wá lɛ é wu.
Amɔ̌, Izlayɛli-ví lɛ ɖó lanmɛ syɛn hunsin ɖagbe, ɖó alixlɛ́mɛ e ɖò Mawu Sɛ́n ɔ mɛ bɔ ye nɔ xwédo lɛ é wu.