Fii kala on wakkiloto fii heɓugol dewgal moƴƴal e ɓeynguure weltiinde, on heɓay satteendi ko on miijaaki ko ɗuytata weltaare mon nden (Waajotooɗo on 9:11, TMN). E hoore giggol, Allah wallay on si on heɓii satteendi. Si on huutorike tugaale Deftere Allah nden, onon e ɓeynguure mon nden waaway yonndinaade satteendeeji mon ɗin.

KO DEFTERE ALLAH NDEN WI’I KON : « Fawee anndeeji mon ɗin fow e hoore makko, ko fii o kippay fii mon » (1 Petruusu 5:7). Annditee, wonaa Allah woni sabu satteendeeji mon ɗin (Yaaquuba 1:13). Si on ɓadike mo, o wallay on no moƴƴiri (Isaaya 41:10, TMN). « Yewtee mo kala ko woni ka ɓerɗe mon » (Zabuura 62:8, TMN).

Si on janngii Deftere Allah nden ɲannde woo ɲannde, on heɓay ɓuttu ɓernde. Ontuma on annday honno Yahuwah wallirta en « e nder kala tampereeji men ». (2 Korenti 1:3, 4 ; Roomu 15:4.) Himo fodi on « ɓuttu ngu Alla yeɗata, feƴƴitungu kala faamu ». (Filipii 4:6, 7, 13.)

KO HAANUƊON KON WAƊUDE :

• Toree Yahuwah fii no waawiron hoore mon e miijitoɗon moƴƴa

• Miijitee moƴƴa e suɓoɗon ko ɓuri moƴƴande on kon

KO DEFTERE ALLAH NDEN WI’I KON : « Ɓernde aaden faamuɗo heɓay ganndal, e nowru mokobaa ɗaɓɓay fii no heɓira ganndal » (Tindi 18:15, TMN). Anndee goonga on. Etee anndon faale mo kala ka ɓeynguure mon. Yewtidee e maɓɓe. Jentoɗon ɓe (Tindi 20:5, TMN).

Si goɗɗo ka ɓeynguure mon maayii goy ? Wota on hulu hollugol muuseendi mon. Annditee hay annabi Iisaa wulluno (Yuuhanna 11:35 ; Waajotooɗo on 3:4, TMN). Hino hitti ka fowtoɗon e ɗaanoɗon moƴƴa (Waajotooɗo on 4:6, TMN). Ɗun wallay on no gerdiron fii satteendi mon.

KO HAANUƊON KON WAƊUDE :

• Ɗoo yo satteendi arude, etee wowton yewtidugol e ɓeynguure mon nden. Onsay si on heɓii satteendi, ɓe waaway yewtidude e mon

• Yewtidee e woɓɓe goo heɓuɓe sifa on alhaali

KO DEFTERE ALLAH NDEN WI’I KON : « Giɗo moƴƴo ko holloowo giggol saa’iiji ɗin fow, e ko musiɗɗo heɓaaɗo fii ɲannde maapere » (Tindi 17:17, TMN). Njaatigiiɓe mon ɓen faalete on wallude, kono ɓe anndataa no ɓe gerdira. Wota on suuɗu ɓe, haalanee ɓe ko faalaɗon kon (Tindi 12:25, TMN). Lanndee kadi ballal yimɓe faamuɓe Deftere Allah nden moƴƴa. Waajuuji ɓaagitiiɗi Deftere Allah nden ko ɓe jonnata on kon, wallay on (Yaaquuba 5:14).

On heɓay ballal moƴƴal si on jokkondiri e gomɗinɓe Allah ɓen soono woo e hoolii ɓe ko o fodi kon. On heɓay ɓutu ɓernde si on wallii woɓɓe goo faalaaɓe wakkilannde. Yewtee ɓe fii gomɗinal mon ngal e Yahuwah e fii fodoore makko nden. Wallee yimɓe goo faalaaɓe ballal hara on wedditaaki e yimɓe yiɗuɓe on e faalaaɓe on wallude (Tindi 18:1, TMN ; 1 Korenti 15:58).

KO HAANUƊON KON WAƊUDE :

• Yewtidee e njaatigiiɓe mon ɓen e accon ɓe walla on

• Laaɓanee ɓe e yewton ɓe ko faalaɗon kon