Kɛ́ mɔ ko gbo lɛ, ejeee tɔmɔ akɛ wɔɔbi wɔhe akɛ, ‘Mɛni hewɔ mɛi gboiɔ?’ Ebaa lɛ nakai, titri lɛ, kɛ́ wɔsuɔlɔ ko gbo. Biblia lɛ kɛɔ akɛ: “Tsɛ̃mɔ ni kɛ gbele baa ji esha.”—1 Korintobii 15:56.

Mɛni hewɔ akɛɔ akɛ adesai fɛɛ efee esha ni amɛgboiɔ lɛ?

 Klɛŋklɛŋ adesai, ni ji Adam kɛ Hawa lɛ, gboi ejaakɛ amɛfee esha amɛshi Nyɔŋmɔ. (1 Mose 3:17-19) Nyɔŋmɔ ji ‘wala jɛɛhe,’ no hewɔ lɛ gbele ji nɔ ni sa Adam kɛ Hawa yɛ ehiɛ atua ni amɛtse lɛ hewɔ.—Lala 36:9; 1 Mose 2:17.

  Adam kɛ esha lɛ tsɛŋe eshwie fɛɛ. Biblia lɛ kɛɔ akɛ: “Gbɔmɔ kome nɔ esha tsɔ kɛba je lɛ mli, ni gbele tsɔ esha nɔ kɛba, ni no hã gbele tsɛŋe gbɔmɛi fɛɛ, ejaakɛ amɛ fɛɛ amɛfee esha.” (Romabii 5:12) Gbɔmɛi fɛɛ gboiɔ ejaakɛ amɛ fɛɛ amɛfeɔ esha.—Romabii 3:23.

Bɔ ni abaafee ajie gbele kɛya

 Nyɔŋmɔ ewo shi akɛ, be ko baaba ni ‘ebaami gbele kɛya naanɔ.’ (Yesaia 25:8) Kɛ́ Nyɔŋmɔ baajie gbele kɛya lɛ, ehe baahia ni efã nɔ ni kɛ gbele ba lɛ, ni ji esha, shishi kwraa. Ebaafee enɛ kɛtsɔ Yesu Kristo, mɔ “ni wóɔ je lɛ he esha lɛ kɛyaa” lɛ nɔ.—Yohane 1:29; 1 Yohane 1:7.