Wolo Ni Akɛmaje Efesobii Lɛ 5:1-33
5 No hewɔ lɛ, akɛ bii ni asumɔɔ lɛ, nyɛfea nyɛhe mɛi ni kaseɔ Nyɔŋmɔ,+
2 ni nyɛyaa nɔ nyɛnyiɛa yɛ suɔmɔ mli,+ tamɔ bɔ ni Kristo lɛ hu sumɔ wɔ,*+ ni ekɛ ehe hã yɛ wɔhewɔ* akɛ nikeenii, kɛ afɔle, ni ji nibii ni jeɔ ŋma jogbaŋŋ ni akɛhã Nyɔŋmɔ lɛ.+
3 Ajwamaŋbɔɔ* kɛ muji nii srɔtoi fɛɛ kɛ amimyeli lɛ, akatsĩ tã po yɛ nyɛteŋ,+ ejaakɛ enɛ esaaa mɛi krɔŋkrɔŋi;+
4 ni akatsĩ hiɛgbejianifeemɔ kɛ kwashiai awiemɔ kɛ yakayaka wiemɔ ni akɛyeɔ fɛo+—nibii ni esaaa nyɛ lɛ—tã yɛ nyɛteŋ, shi moŋ, shidaa.+
5 Ejaakɛ nyɛle enɛ, ni nyɛ diɛŋtsɛ nyɛkpɛlɛɔ nɔ akɛ, ajwamaŋbɔlɔ*+ loo mɔ ni kɛ ehe woɔ muji nii amli loo amimyelɔ,+ ni yɛ gbɛ ko nɔ lɛ eji amagajalɔ lɛ, bɛ gbɛfaŋnɔ ko yɛ Kristo lɛ Maŋtsɛyeli lɛ kɛ Nyɔŋmɔ Maŋtsɛyeli lɛ mli.+
6 Nyɛkahãa mɔ ko mɔ ko kɛ wiemɔi foji lakaa nyɛ, ejaakɛ nibii nɛɛ ahewɔ ni Nyɔŋmɔ mlifu lɛ miiba toigbele bii lɛ anɔ lɛ.
7 No hewɔ lɛ, nyɛkɛ amɛ akafea nɔ ko nɔ ko;
8 ejaakɛ be ko ni eho lɛ, duŋ ji nyɛ, shi amrɔ nɛɛ, nyɛtsɔmɔ la+ yɛ Nuŋtsɔ lɛ mli.+ Nyɛyaa nɔ nyɛnyiɛa akɛ la bii,
9 ejaakɛ yibii ni la lɛ woɔ ji ekpakpafeemɔ kɛ jalɛ kɛ anɔkwale fɛɛ.+
10 Nyɛyaa nɔ nyɛkaa nyɛkwɛa ni nyɛna nɔ ni sa+ Nuŋtsɔ lɛ hiɛ;
11 ni nyɛkanáa gbɛfaŋnɔ ko yɛ duŋ nitsumɔi ni wooo yibii lɛ amli dɔŋŋ;+ shi moŋ, nyɛhãa anaa nɔ ni amɛji diɛŋtsɛ.
12 Ejaakɛ nibii ni amɛfeɔ yɛ teemɔŋ lɛ, eyɛ hiɛgbele akɛ aaatsĩ tã po.
13 Agbɛnɛ, nibii fɛɛ ni aajie amɛ kpo faŋŋ* lɛ, aatsɔ la lɛ nɔ aahã amɛmiije kpo faŋŋ, ejaakɛ nɔ fɛɛ nɔ ni aahã eeje kpo faŋŋ lɛ, la ni.
14 No hewɔ lɛ, akɛɔ akɛ: “Bo mɔ ni owɔɔ, ohiɛ atsɛ̃, ni ote shi kɛjɛ gbohii ateŋ,+ ni Kristo lɛ baatso ahã bo.”+
15 No hewɔ lɛ, be fɛɛ be lɛ, nyɛhiɛ ahia nyɛhe nɔ jogbaŋŋ koni nyɛkanyiɛ akɛ mɛi ni hiɛ kãaa shi, shi moŋ akɛ hiɛshikalɔi,
16 koni nyɛkɛ nyɛbe atsu nii jogbaŋŋ,*+ ejaakɛ gbii nɛɛ, gbii fɔji ni.
17 Enɛ hewɔ lɛ, nyɛkafea nyɛhe mɛi ni bɛ jwɛŋmɔ dɔŋŋ, shi moŋ, nyɛyaa nɔ nyɛyɔsea nɔ ni ji Yehowa* suɔmɔnaa nii.+
18 Agbɛnɛ hu, nyɛkayaa nɔ nyɛtɔrɔa dãa,+ nɔ mli ni basabasafeemɔ* yɔɔ lɛ, shi moŋ nyɛyaa nɔ nyɛyimɔa obɔbɔ kɛ mumɔ lɛ.
19 Nyɛkɛ nyɛhe awiewiea* yɛ lalai, Nyɔŋmɔ yijiemɔ lalai, kɛ Nyɔŋmɔjamɔ lalai amli, ni nyɛláa+ ni nyɛtswaa lala+ nyɛhãa Yehowa* yɛ nyɛtsuii amli,+
20 ni nyɛdaa wɔ-Nyɔŋmɔ kɛ wɔ-Tsɛ lɛ shi+ be fɛɛ be yɛ nɔ fɛɛ nɔ hewɔ, yɛ wɔ-Nuŋtsɔ Yesu Kristo gbɛ́i mli.+
21 Nyɛteŋ mɔ fɛɛ mɔ aba ehe shi awo enyɛmi shishi+ yɛ Kristo gbeyeishemɔ mli.
22 Ŋamɛi aba amɛhe shi amɛwo amɛwumɛi ashishi,+ tamɔ bɔ ni amɛbaa amɛhe shi amɛwoɔ Nuŋtsɔ lɛ shishi lɛ,
23 ejaakɛ wu lɛ ji eŋa lɛ yitso,+ tamɔ bɔ ni Kristo lɛ hu ji asafo lɛ yitso,+ ni lɛ nɔŋŋ ji gbɔmɔtso nɛɛ yiwalaherelɔ lɛ.
24 Anɔkwa, bɔ ni asafo lɛ baa ehe shi ewoɔ Kristo lɛ shishi lɛ, nakai nɔŋŋ ŋamɛi hu aba amɛhe shi amɛwo amɛwumɛi ashishi yɛ nɔ fɛɛ nɔ mli.
25 Wumɛi, nyɛyaa nɔ nyɛsumɔa nyɛŋamɛi,+ tamɔ bɔ ni Kristo lɛ hu sumɔ asafo lɛ, ni ekɛ ehe hã yɛ asafo lɛ hewɔ lɛ,+
26 bɔ ni afee ni ekɛ hejuu nu ni ji wiemɔ lɛ ahã asafo lɛ he atse, ni ehã efee krɔŋkrɔŋ,+
27 koni ekɛ asafo lɛ ahã lɛ diɛŋtsɛ ehe akɛ nɔ ko ni yɔɔ nyam, ni muji ko loo kuamɔ ko loo nɔ ko ni tamɔ nakai bɛ he,+ shi moŋ efee krɔŋkrɔŋ, ni kpa ko bɛ he.+
28 Yɛ nakai gbɛ nɔŋŋ nɔ lɛ, wumɛi asumɔ amɛŋamɛi tamɔ amɛ diɛŋtsɛ amɛgbɔmɔtsei. Nuu ni sumɔɔ eŋa lɛ, lɛ diɛŋtsɛ ehe esumɔɔ,
29 ejaakɛ gbɔmɔ ko gbɔmɔ ko enyɛko lɛ diɛŋtsɛ egbɔmɔtso* dã, shi moŋ elɛɔ lɛ ni edɔɔ he, tamɔ bɔ ni Kristo lɛ feɔ asafo lɛ pɛpɛɛpɛ lɛ,
30 ejaakɛ wɔji egbɔmɔtso lɛ henii.+
31 “Enɛ hewɔ lɛ, nuu baashi epapa kɛ emami ni ebaakpɛtɛ eŋa he,* ni amɛyi enyɔ lɛ fɛɛ amɛbaatsɔ heloo kome.”+
32 Nɛkɛ teemɔŋ sane krɔŋkrɔŋ+ nɛɛ he miihia waa. Agbɛnɛ, miiwie Kristo kɛ asafo lɛ he.+
33 Shi esa akɛ nyɛteŋ mɔ fɛɛ mɔ asumɔ eŋa+ tamɔ lɛ diɛŋtsɛ ehe; ni esa akɛ ŋa lɛ aná bulɛ ni mli kwɔ ehã ewu.+
Shishigbɛ Niŋmaa
^ Shishitsɔɔmɔi komɛi kɛɔ akɛ, “nyɛ.”
^ Shishitsɔɔmɔi komɛi kɛɔ akɛ, “nyɛhewɔ.”
^ Greek mli lɛ, por·neiʹa. Kwɛmɔ Wiemɔi Titrii Amligbalamɔ lɛ.
^ Kwɛmɔ Wiemɔi Titrii Amligbalamɔ lɛ, “Ajwamaŋbɔɔ.”
^ Loo “aajaje amɛ.”
^ Greek sht. ŋm., “nyɛhéa be ni ato lɛ.”
^ Kwɛmɔ Saji Krokomɛi A5 lɛ.
^ Loo “jeŋba fɔŋ.”
^ Shishitsɔɔmɔi komɛi kɛɔ akɛ, “nyɛkɛ nyɛ diɛŋtsɛ nyɛhe awiea.”
^ Kwɛmɔ Saji Krokomɛi A5 lɛ.
^ Greek sht. ŋm., “eheloo.”
^ Loo “ebaahi eŋa masɛi.”
