Wolo Ni Akɛmaje Filipibii Lɛ 1:1-30
1 Paulo kɛ Timoteo, Kristo Yesu nyɔji, kɛ wolo nɛɛ miimaje mɛi krɔŋkrɔŋi ni kɛ Kristo Yesu efee ekome, ni yɔɔ Filipi+ lɛ fɛɛ, kɛ agbɛnɛ hu, nɔkwɛlɔi kɛ asafoŋ sɔɔlɔi lɛ:+
2 Dromɔ kɛ toiŋjɔlɛ ni jɛ Nyɔŋmɔ, wɔ-Tsɛ lɛ, kɛ Nuŋtsɔ Yesu Kristo dɛŋ lɛ ahã nyɛ.
3 Be fɛɛ be ni mikaiɔ nyɛ lɛ, midaa mi-Nyɔŋmɔ lɛ shi
4 yɛ sɔlemɔ fɛɛ sɔlemɔ ni mikɛ hiɛdɔɔ kpaa fai yɛ mli mihãa nyɛ lɛ fɛɛ mli. Yɛ sɔlemɔ ni mikɛ hiɛdɔɔ kpaa fai yɛ mli mihãa nyɛ lɛ ateŋ eko fɛɛ eko mli lɛ, mikɛ miishɛɛ feɔ,+
5 yɛ yelikɛbuamɔ ni nyɛkɛhã yɛ sane kpakpa lɛ gbɛfaŋ* kɛjɛ klɛŋklɛŋ gbi lɛ nɔ kɛbashi amrɔ nɛɛ hewɔ.
6 Ejaakɛ miyɛ nɔmimaa yɛ enɛ nɔŋŋ mli, akɛ, mɔ ni je nitsumɔ kpakpa shishi yɛ nyɛmli lɛ, lɛ nɔŋŋ ebaakã he kɛyashi ebaagbe naa+ yɛ Kristo Yesu gbi lɛ nɔ.+
7 Akɛni nyɛkã mitsui nɔ hewɔ lɛ, eja jogbaŋŋ akɛ mijwɛŋɔ enɛ yɛ nyɛ fɛɛ nyɛhe, nyɛ ni nyɛkɛ mi náa gbɛfaŋnɔ yɛ dromɔ lɛ mli lɛ yɛ tsein ni awo mi+ nɛɛ kɛ sane kpakpa lɛ ni mifãa he, ni mimaa nɔ mi yɛ mla naa lɛ fɛɛ mli lɛ.+
8 Ejaakɛ Nyɔŋmɔ ji midasefonyo akɛ mihiɛ tseɔ nyɛ fɛɛ waa akɛni midɔɔ nyɛhe tamɔ Kristo Yesu feɔ lɛ hewɔ.
9 Ni enɛ ji nɔ ni miyaa nɔ misɔleɔ yɛ he, akɛ nyɛsuɔmɔ lɛ aya nɔ afa ni eteke nɔ fe tsutsu lɛ,+ kɛ nilee krɔŋŋ+ kɛ sanesɛɛkɔmɔ ni hi kɛwula shi;+
10 koni nyɛkaa nyɛkwɛa ni nyɛna nibii ni he hiaa waa lɛ,+ koni nyɛfee krɔŋŋ, ni nyɛkatɔ̃tɔ mɛi anane,+ kɛyashi Kristo gbi lɛ nɔ;
11 ni jalɛ yibii ni atsɔɔ Yesu Kristo nɔ awoɔ lɛ ayimɔ nyɛ obɔbɔ+ ni akɛwo Nyɔŋmɔ hiɛ nyam ni akɛjie eyi hu.
12 Agbɛnɛ, nyɛmimɛi, miisumɔ ni nyɛle akɛ, yɛ anɔkwale mli lɛ, shihilɛ ni miyɔɔ mli lɛ ehã sane kpakpa lɛ miishwere moŋ,
13 ni no ehã Roma Maŋtsɛ lɛ Bulɔi* lɛ fɛɛ kɛ mɛi ni eshwɛ lɛ fɛɛ ená ele tsein ni awo mi+ yɛ Kristo hewɔ lɛ faŋŋ.+
14 Agbɛnɛ, tsein ni awo mi nɛɛ ewaje nyɛmimɛi ni yɔɔ Nuŋtsɔ lɛ mli lɛ ateŋ mɛi babaoo, ni amɛkɛ ekãa babaoo miijaje Nyɔŋmɔ wiemɔ lɛ fe tsutsu lɛ ni amɛsheee gbeyei.
15 Eji anɔkwale akɛ, hetsɛ̃ kɛ béi hewɔ mɛi komɛi shiɛɔ Kristo lɛ, shi mɛi komɛi hu kɛ jwɛŋmɔ kpakpa miishiɛ.
16 Mɛi ni kɛ jwɛŋmɔ kpakpa shiɛɔ lɛ jɛɔ suɔmɔ mli amɛshiɛɔ Kristo lɛ, ejaakɛ amɛle akɛ ahala mi koni mifã sane kpakpa lɛ he;+
17 shi mɛi ni shiɛɔ yɛ hetsɛ̃ kɛ béi hewɔ lɛ, naataamɔ* hewɔ amɛfeɔ nakai, shi jeee kɛ tsui krɔŋŋ, ejaakɛ amɛmiitao amɛtee naagba shi amɛwo mi yɛ tsein ni awo mi lɛ mli.
18 Mɛni ejɛ mli kɛba? Sane lɛ kɛkɛ ji akɛ, yɛ gbɛ fɛɛ gbɛ nɔ lɛ, osatofeemɔ naa jio, anɔkwale naa jio, aajaje Kristo aatsɔɔ, ni mináa miishɛɛ babaoo yɛ enɛ hewɔ. Anɔkwa, maya nɔ maná miishɛɛ babaoo hu,
19 ejaakɛ mile akɛ kɛtsɔ fai ni nyɛkɛ hiɛdɔɔ sɔleɔ kɛkpaa lɛ nɔ,+ kɛ agbɛnɛ hu, yɛ Yesu Kristo mumɔ lɛ yelikɛbuamɔ naa lɛ,+ enɛ baatsɔ miyiwalaheremɔ.
20 Enɛ kɛ gbɛ ni mikwɛɔ kɛ miishɛɛ, kɛ hiɛnɔkamɔ ni miyɔɔ lɛ kpãa gbee, akɛ mihiɛ akagbo yɛ gbɛ ko kwraa nɔ, shi moŋ, akɛni miwieɔ kɛ nɔmimaa babaoo hewɔ lɛ, matsɔ migbɔmɔtso nɔ, yɛ wala mli jio, gbele mli jio, mawó Kristo nɔ gojoo amrɔ nɛɛ, tamɔ bɔ ni mifeɔ daa lɛ.+
21 Ejaakɛ yɛ migbɛfaŋ lɛ, kɛ́ mihiɛ kã lɛ, mihiɛ kã koni masɔmɔ Kristo,+ ni kɛ́ migbo hu lɛ, sɛɛnamɔ ni.+
22 Agbɛnɛ, kɛ́ maya nɔ mahi shi yɛ heloo lɛ mli hu lɛ, enɛ ji minitsumɔ lɛ yibiiwoo; shi mihãŋ ale nɔ ni mahala lɛ.
23 Mileee nibii enyɔ nɛɛ ateŋ nɔ ni mihala, ejaakɛ miishwe jiemɔ lɛ kɛ Kristo ni mikɛaahi shi ni ekã shi faŋŋ akɛ,+ no ji nɔ ni hi fe fɛɛ lɛ.+
24 Shi nyɛ hewɔ lɛ, heloo mli ni maya nɔ mahi shi yɛ lɛ he miihia mi fe no.
25 No hewɔ lɛ, akɛni miyɛ nɔmimaa yɛ enɛ mli hewɔ lɛ, mile akɛ mahi shi, ni mi kɛ nyɛ fɛɛ baaya nɔ ahi shi yɛ nyɛhiɛyaa hewɔ, kɛ agbɛnɛ hu, yɛ nyɛmiishɛɛnamɔ yɛ hemɔkɛyeli lɛ mli lɛ hewɔ,
26 koni kɛ́ miba nyɛŋɔɔ ekoŋŋ lɛ, nyɛmlifilimɔ lɛ ateke nɔ yɛ Kristo Yesu mli yɛ mihewɔ.
27 Nɔ kome kɛkɛ ji akɛ, nyɛbaa nyɛjeŋ* bɔ ni sa Kristo lɛ he sane kpakpa lɛ,+ koni kɛ́ miba ni mibana nyɛ jio, mibɛ nyɛŋɔɔ jio, manu nyɛhe sane, ni maná male hu akɛ nyɛdamɔ shi shiŋŋ yɛ mumɔ kome mli, kɛ susuma kome,*+ ni nyɛfee ekome kɛmiibɔ nyɛhe mɔdɛŋ waa kɛhã sane kpakpa lɛ hemɔkɛyeli lɛ,
28 ni nyɛhãaa nyɛhenyɛlɔi lɛ awo nyɛhe gbeyei yɛ gbɛ ko kwraa nɔ. Enɛ nɔŋŋ ji odase kɛhã amɛ akɛ abaakpãtã amɛhiɛ,+ shi nyɛ lɛ, eji odase kɛhã nyɛ akɛ abaahere nyɛyiwala;+ ni enɛ jɛ Nyɔŋmɔ dɛŋ.
29 Ejaakɛ akɛ hegbɛ lɛ ehã nyɛ yɛ Kristo hewɔ, jeee koni nyɛhe enɔ nyɛye kɛkɛ, shi moŋ, koni nyɛna nɔ hu yɛ ehewɔ.+
30 Ejaakɛ nakai nɔmɔ kome too lɛ ni nyɛna ni miinɔ, ni amrɔ nɛɛ nyɛnuɔ akɛ miinɔ lolo lɛ, no nɔŋŋ mli nyɛ hu nyɛhiɛ nɛɛ.+
Shishigbɛ Niŋmaa
^ Loo “yɛ nɔ ni nyɛfeɔ koni sane kpakpa lɛ ashwere.”
^ Loo “Pritoriɔm Bulɔi.”
^ Loo “mansɔ̃tsɔɔ.”
^ Loo “nyɛyaa nɔ nyɛfea nyɛnii akɛ maŋbii.”
^ Loo “kɛ jwɛŋmɔ kome.”
