Nɔ Ni Luka Ŋma 1:1-80

TSWAA

Ebɔ Teofilo amaniɛ (1-4)
Gabriel gba Yohane Baptisilɔ lɛ fɔmɔ lɛ efɔ̃ shi (5-25)
Gabriel gba Yesu fɔmɔ lɛ efɔ̃ shi (26-38)
Maria yasara Elizabet (39-45)
Maria wó Yehowa nɔ gojoo (46-56)
Yohane fɔmɔ kɛ egbɛ́iwoo (57-66)
Zakaria gbalɛ lɛ (67-80)

1 Akɛni mɛi pii ekɔ efɔ̃ amɛnɔ akɛ amɛbaabua anɔkwa saji ni wɔheɔ wɔyeɔ akɛ amɛba mli* lɛ anaa,+ ² tamɔ bɔ pɛ ni mɛi ni kɛ amɛhiŋmɛii na+ kɛjɛ shishijee ni amɛji sane lɛ he sɔɔlɔi lɛ kɛ enɛɛmɛi hã wɔ lɛ hewɔ lɛ,+ ³ mi hu akɛni mitao nibii fɛɛ amli fitsofitso kɛjɛ shishijee hewɔ lɛ, mikpɛ mli akɛ mato naa jogbaŋŋ ni maŋma mahã bo, anunyamtsɛ Teofilo,+ ⁴ bɔ ni afee ni oná ole akɛ nibii ni akɛ naabu wie atsɔɔ bo lɛ ji anɔkwale shiishi.+ ⁵ Yudea maŋtsɛ Herode*+ gbii lɛ amli lɛ, osɔfo ko hi shi ni atsɛɔ lɛ Zakaria ni jɛ Abiya+ osɔfoiaku lɛ mli. Eyɛ ŋa ni jɛ Aaron biyei lɛ ateŋ, ni egbɛ́i ji Elizabet. ⁶ Amɛyi enyɔ lɛ fɛɛ lɛ, jalɔi ji amɛ yɛ Nyɔŋmɔ hiɛ ni shwamɔ ko bɛ amɛhe, ejaakɛ amɛnyiɛɔ yɛ Yehowa* kitãi lɛ kɛ emla naa taomɔ nii lɛ fɛɛ anaa. ⁷ Shi amɛbɛ bi ko, ejaakɛ Elizabet lɛ, kene ni, ni amɛyi enyɔ lɛ fɛɛ lɛ, amɛdara yɛ afii amli. ⁸ Shi be ni shɛ ekuu lɛ nɔ,+ ni eetsu enitsumɔ akɛ osɔfo yɛ Nyɔŋmɔ hiɛ lɛ, ⁹ tamɔ bɔ ni osɔfoyeli kusum ni ato lɛ yɔɔ lɛ, eba mli akɛ eshɛ enɔ akɛ ebote Yehowa* jamɔhe+ lɛ ni eyashã tsofa-kɛ-ŋma.+ ¹⁰ No mli lɛ, maŋbii lɛ fɛɛ miisɔle yɛ agbó lɛ naa yɛ ŋmɛlɛtswaa ni ashãa tsofa-kɛ-ŋma lɛ nɔ. ¹¹ Yehowa* bɔfo jie ehe kpo etsɔɔ lɛ, no mli lɛ bɔfo lɛ damɔ tsofa-kɛ-ŋmashãa latɛ lɛ ninejurɔgbɛ. ¹² Shi be ni Zakaria na lɛ lɛ, ehao, ni gbeyei mɔ lɛ. ¹³ Shi bɔfo lɛ kɛɛ lɛ akɛ: “Kaashe gbeyei, Zakaria, ejaakɛ abo fai ni okɛ hiɛdɔɔ kpaa lɛ toi, ni oŋa Elizabet lɛ, ebaafɔ binuu ehã bo, ni obaawo lɛ gbɛ́i akɛ Yohane.+ ¹⁴ Obaaná miishɛɛ, ni omli baafili bo waa, ni mɛi babaoo baanya yɛ efɔmɔ lɛ hewɔ,+ ¹⁵ ejaakɛ ebaatsɔ mɔ ko ni he hiaa waa yɛ Yehowa* hiɛ.+ Shi esaaa akɛ enuɔ wain ko loo dãa ni wa ko kwraa,+ ni mumɔ krɔŋkrɔŋ baayi lɛ obɔ dani abaafɔ lɛ po,*+ ¹⁶ ni ebaahã Israelbii pii aku amɛsɛɛ kɛba Yehowa,* amɛ-Nyɔŋmɔ lɛ ŋɔɔ.+ ¹⁷ Agbɛnɛ hu, ekɛ Elia mumɔ lɛ kɛ ehewalɛ+ lɛ baatsɔ Nyɔŋmɔ hiɛ ni ebaahã tsɛmɛi atsuii aku sɛɛ kɛba bii ahe,+ ni toigbolɔi baaku sɛɛ kɛba jalɔi ahiɛshikamɔ lɛ he koni ekɛsaa mɛi eto Yehowa.”*+ ¹⁸ Zakaria kɛɛ ŋwɛibɔfo lɛ akɛ: “Te mafee tɛŋŋ maná nɔmimaa yɛ enɛ he lɛ? Ejaakɛ migbɔ, ni miŋa hu eda yɛ afii amli.” ¹⁹ Ŋwɛibɔfo lɛ here nɔ ekɛɛ lɛ akɛ: “Miji Gabriel+ ni damɔɔ Nyɔŋmɔ hiɛ lɛ,+ ni atsu mi ni mikɛ bo abawie koni majaje sane kpakpa nɛɛ matsɔɔ bo. ²⁰ Shi naa! obaatɔ mu, ni onyɛŋ owie kɛyashi gbi nɔ ni nibii nɛɛ baaba mli, ejaakɛ oheee miwiemɔi ni baaba mli yɛ amɛbe ni ato lɛ mli lɛ oyeee.” ²¹ Ni nakai be lɛ mli fɛɛ lɛ, maŋbii lɛ miimɛ Zakaria, ni amɛhiɛ fee amɛ yaa ejaakɛ esɛɛ etsɛ tsɔ yɛ jamɔhe lɛ. ²² Be ni eje kpo lɛ, enyɛɛɛ ekɛ amɛ awie, ni amɛkɔ sɛɛ akɛ eyana nii* yɛ jamɔhe lɛ. Nɔ pɛ ni efeɔ ji akɛ, ekɛ enine feɔ okadi etsɔɔ amɛ, shi enyɛɛɛ ewie. ²³ Be ni esɔɔmɔ krɔŋkrɔŋ* gbii lɛ ba naagbee lɛ, eyiŋ etee eshĩa. ²⁴ Gbii komɛi asɛɛ lɛ, eŋa Elizabet ná musu, ni etee ehe nyɔji enumɔ, ni ekɛɛ: ²⁵ “Nɛkɛ ji bɔ ni Yehowa* kɛ mi eye yɛ gbii nɛɛ amli. Egbala ejwɛŋmɔ kɛba minɔ koni ejie mihiɛgbele lɛ yɛ gbɔmɛi ateŋ kɛya.”+ ²⁶ Be ni emusu lɛ ná nyɔji ekpaa lɛ, Nyɔŋmɔ tsu bɔfo Gabriel+ kɛtee Galilea maŋ ko ni atsɛɔ lɛ Nazaret lɛ mli, ²⁷ koni eya oblayoo fro+ ko ŋɔɔ, no mli lɛ ayabi nakai oblayoo lɛ shi ahã nuu ko ni atsɛɔ lɛ Yosef ni jɛ David shĩa lɛ, oblayoo fro lɛ gbɛ́i ji Maria.+ ²⁸ Ni be ni ŋwɛibɔfo lɛ bote mli lɛ, ekɛɛ oblayoo fro lɛ akɛ: “Miiŋa bo, bo mɔ ni adro bo babaoo, Yehowa* kɛ bo yɛ.” ²⁹ Shi ŋwɛibɔfo lɛ wiemɔi lɛ hã ehao waa, ni ejwɛŋ nɔ ni ŋamɔ nɛɛ tsɔɔ lɛ he. ³⁰ No hewɔ lɛ, ŋwɛibɔfo lɛ kɛɛ lɛ akɛ: “Kaashe gbeyei, Maria, ejaakɛ ohiɛ eba nyam yɛ Nyɔŋmɔ hiɛ. ³¹ Ni naa! obaaná musu* ni obaafɔ binuu,+ ni obaawo lɛ gbɛ́i akɛ Yesu.+ ³² Ebaatsɔ mɔ ko ni he hiaa waa,+ ni abaatsɛ lɛ Mɔ Ni Nɔ Kwɔ Fe Fɛɛ lɛ Bi,+ ni Yehowa* Nyɔŋmɔ kɛ etsɛ David maŋtsɛ sɛi lɛ baahã lɛ,+ ³³ ni ebaaye Yakob shĩa lɛ nɔ Maŋtsɛ kɛya naanɔ, ni e-Maŋtsɛyeli lɛ baŋ naagbee.”+ ³⁴ Shi Maria kɛɛ bɔfo lɛ akɛ: “Te enɛ baafee tɛŋŋ aba mli lɛ, akɛni mikɛ nuu náko bɔlɛ dã nɛɛ?”+ ³⁵ Ni bɔfo lɛ hã lɛ hetoo akɛ: “Mumɔ krɔŋkrɔŋ baaba onɔ,+ ni Mɔ Ni Nɔ Kwɔ Fe Fɛɛ lɛ hewalɛ lɛ baaha onɔ. No hewɔ lɛ, abaatsɛ mɔ ni abaafɔ lɛ lɛ akɛ krɔŋkrɔŋ,+ Nyɔŋmɔ Bi.+ ³⁶ Ni naa! owekunyo Elizabet, mɔ ni atsɛ lɛ kene lɛ hu hiɛ binuu musu, yɛ egbɔlɛ be nɛɛ mli, ni enyɔɔŋ ni ji ekpaa mli eyɔɔ lɛ; ³⁷ ejaakɛ Nyɔŋmɔ gbɛfaŋ lɛ, wiemɔ ko* bɛ ni nyɛŋ aba mli.”+ ³⁸ Kɛkɛ ni Maria kɛɛ: “Naa! Yehowa* nyɔŋ yoo ji mi! Bɔ ni owie lɛ, aba mli nakai ahã mi.” Kɛkɛ ni ŋwɛibɔfo lɛ shi lɛ etee. ³⁹ No hewɔ lɛ, nakai gbii lɛ amli lɛ, Maria te shi ni ekɛ oyaiyeli fã gbɛ kɛtee Yuda maŋ ko mli, yɛ kpokpaa ni gɔji yɔɔ nɔ lɛ nɔ, ⁴⁰ ni eyabote Zakaria shĩa lɛ, ni eŋa Elizabet. ⁴¹ Ni be ni Elizabet nu Maria ŋamɔ lɛ, abifao lɛ ni yɔɔ emusuŋ lɛ tumɔ, ni mumɔ krɔŋkrɔŋ yi Elizabet obɔ, ⁴² ni ebo kɛ gbee ni wa ekɛɛ: “Ajɔɔ bo yɛ yei ateŋ, ni ajɔɔ omusuŋ bi lɛ! ⁴³ No hewɔ lɛ, te fee tɛŋŋ ni miná hegbɛ nɛɛ, akɛ mi-Nuŋtsɔ lɛ mami eba miŋɔɔ nɛɛ? ⁴⁴ Ejaakɛ naa! be ni oŋamɔ lɛ gbɛɛ yɛ mitoiiaŋ nɔŋŋ lɛ, abifao lɛ ni yɔɔ mimusuŋ lɛ tumɔ kɛ miishɛɛ. ⁴⁵ Bo yoo ni ohe oye, oyɛ miishɛɛ, ejaakɛ nakai nibii ni jɛ Yehowa* ŋɔɔ, ni awie atsɔɔ bo lɛ fɛɛ baaba mli.” ⁴⁶ Ni Maria kɛɛ: “Misusuma* miiwó Yehowa* nɔ gojoo,+ ⁴⁷ ni mimumɔ mli miifili lɛ waa yɛ Nyɔŋmɔ, mi-Yiwalaherelɔ lɛ hewɔ,+ ⁴⁸ ejaakɛ ebakwɛ enyɔŋ yoo lɛ gbɛhe ni baa shi lɛ.+ Ejaakɛ naa! kɛjɛ be nɛɛ nɔ kɛyaa lɛ, yinɔi fɛɛ baajaje akɛ miyɛ miishɛɛ,+ ⁴⁹ ejaakɛ Hewalɛtsɛ lɛ efee nibii wuji ehã mi, ni krɔŋkrɔŋ ji egbɛ́i,+ ⁵⁰ ni emɔbɔnalɛ yɛ mɛi ni sheɔ lɛ gbeyei lɛ anɔ kɛjɛ yinɔ kome nɔ kɛtee yinɔ kroko nɔ.+ ⁵¹ Ekɛ enine etsu hewalɛ nitsumɔ; egbɛ mɛi ni wóɔ amɛhe nɔ yɛ amɛtsuiiaŋ yiŋtoi amli lɛ eshwã.+ ⁵² Ekpa hii ni yɔɔ hegbɛi kpelei kɛjɛ maŋtsɛ sɛii anɔ,+ ni ewó mɛi ni bɛ yelikɛbualɔ lɛ anɔ;+ ⁵³ ehã mɛi ni hɔmɔ yeɔ amɛ lɛ etɔrɔ kɛ nibii kpakpai,+ ni eshwie niiatsɛmɛi lɛ kɛ amɛdɛ̃ folo. ⁵⁴ Eye ebua etsulɔ Israel, ekai shi ni ewo akɛ ebaajie mɔbɔnalɛ kpo+ ⁵⁵ etsɔɔ Abraham kɛ eseshi*+ lɛ kɛya naanɔ, tamɔ bɔ ni ekɛɛ wɔtsɛmɛi lɛ.” ⁵⁶ Maria kɛ lɛ hi shi aaafee nyɔji etɛ, kɛkɛ ni eku esɛɛ kɛtee lɛ diɛŋtsɛ eshĩa. ⁵⁷ Agbɛnɛ, Elizabet fɔmɔ be shɛ, ni efɔ binuu. ⁵⁸ Ni akutsoŋbii lɛ kɛ ewekumɛi lɛ nu akɛ Yehowa* ena lɛ mɔbɔ babaoo, ni amɛkɛ lɛ nya.+ ⁵⁹ Gbi ni ji kpaanyɔ lɛ nɔ lɛ, amɛba gbekɛ bibioo lɛ ketiafoo,+ ni kulɛ amɛkɛ epapa gbɛ́i Zakaria lɛ yaawo lɛ. ⁶⁰ Shi emami here nɔ ekɛɛ: “Dabida! abaatsɛ lɛ Yohane moŋ.” ⁶¹ Kɛkɛ ni amɛkɛɛ lɛ akɛ: “Mɔ ko bɛ owekumɛi lɛ ateŋ ni atsɛɔ lɛ nakai.” ⁶² Kɛkɛ ni amɛkɛ amɛnine fee okadi kɛbi epapa bɔ ni esumɔɔ akɛ atsɛ lɛ. ⁶³ No hewɔ lɛ, ebi ni ahã lɛ tao, ni eŋma akɛ: “Yohane ji egbɛ́i.”+ Ni enɛ fee amɛ fɛɛ naakpɛɛ. ⁶⁴ Amrɔ lɛ, enaabu gbele, ni elilɛi fɛne ni ebɔi wiemɔ,+ ni ejie Nyɔŋmɔ yi. ⁶⁵ Ni gbeyei mɔmɔ amɛkutsoŋbii lɛ fɛɛ, ni abɔi nibii nɛɛ fɛɛ ahe wiemɔ yɛ Yudea gɔji lɛ anɔ fɛɛ. ⁶⁶ Ni mɛi ni nu lɛ fɛɛ kɛto amɛtsuii amli amɛkɛɛ: “Mɛɛ gbɔmɔ nɛkɛ gbekɛ nɛɛ baatsɔ?” Ejaakɛ Yehowa* nine kã ehe lɛɛlɛŋ. ⁶⁷ Kɛkɛ ni mumɔ krɔŋkrɔŋ yi etsɛ Zakaria obɔ, ni egba ekɛɛ: ⁶⁸ “Ajie Yehowa,* Israel Nyɔŋmɔ lɛ yi,+ ejaakɛ egbala ejwɛŋmɔ kɛba emaŋ lɛ nɔ ni ekpɔ̃ amɛ.+ ⁶⁹ Ni etee yiwalaheremɔ akolonto*+ shi yɛ etsulɔ David shĩa lɛ ehã wɔ,+ ⁷⁰ tamɔ bɔ ni etsɔ egbalɔi krɔŋkrɔŋi ni hi shi kɛjɛ blema lɛ anɔ ewie+ ⁷¹ yiwalaheremɔ kɛmiijɛ wɔhenyɛlɔi kɛ mɛi fɛɛ ni he tsɛ̃ɔ wɔ lɛ adɛŋ lɛ he lɛ;+ ⁷² koni ena mɔbɔ yɛ wɔtsɛmɛi lɛ ahewɔ, ni ekai ekpaŋmɔ krɔŋkrɔŋ lɛ,+ ⁷³ kitã ni ekã wɔtsɛ Abraham lɛ,+ ⁷⁴ koni kɛ́ ajie wɔ kɛje henyɛlɔi adɛŋ lɛ, ehã wɔ hegbɛ ni wɔkɛ sɔɔmɔ krɔŋŋ ahã lɛ ni wɔsheee gbeyei ⁷⁵ yɛ anɔkwayeli kɛ jalɛ mli yɛ ehiɛ wɔgbii fɛɛ. ⁷⁶ Shi bo, gbekɛ nɛɛ, abaatsɛ bo Mɔ Ni Nɔ Kwɔ Fe Fɛɛ lɛ gbalɔ, ejaakɛ obaatsɔ Yehowa* hiɛ oyasaa egbɛi lɛ oto,+ ⁷⁷ koni okɛ yiwalaheremɔ he nilee ahã emaŋ lɛ kɛtsɔ amɛhe eshai ni akɛbaake amɛ lɛ nɔ,+ ⁷⁸ yɛ wɔ-Nyɔŋmɔ lɛ musuŋtsɔlɛ lɛ hewɔ. Musuŋtsɔlɛ nɛɛ hewɔ lɛ, jetsɛremɔ ni jɛ ŋwɛi baaba abasara wɔ, ⁷⁹ koni ehã la akpɛ ahã mɛi ni tara duŋ kɛ gbele hɔɔŋ mli lɛ,+ ni ekudɔ wɔnaji kɛya toiŋjɔlɛ gbɛ lɛ nɔ.” ⁸⁰ Ni gbekɛ lɛ bada, ni ehe bawa yɛ mumɔ mli, ni etee nɔ ehi shia ŋa nɔ kɛyashi gbi nɔ ni ejie ehe kpo faŋŋ etsɔɔ Israel.