Nanemɛi kpakpai gbaa sane be fɛɛ be ni hegbɛ baaba. Amɛfeɔ nakai hiɛ kɛ hiɛ loo kɛtsɔ foŋ, e-mail, vidio loo woloŋmaa nɔ. No hewɔ lɛ, bɔ ni afee ni wɔbɛŋkɛ Nyɔŋmɔ lɛ, esa akɛ wɔ kɛ lɛ afɔ sanegbaa. Kɛ̃lɛ, mɛɛ gbɛ nɔ wɔɔtsɔ wɔfee nakai?

Wɔbaanyɛ wɔkɛ Yehowa awie kɛtsɔ sɔlemɔ nɔ. Sɔlemɔ ni wɔɔsɔle wɔhã Nyɔŋmɔ lɛ tamɔɔɔ sanegbaa ko kɛkɛ ni yaa nɔ yɛ wɔ kɛ wɔtipɛŋfoi ateŋ. Kɛ́ wɔmiisɔle lɛ, esa akɛ wɔhã ehi wɔjwɛŋmɔŋ akɛ wɔ kɛ wɔ-Bɔlɔ ni ji Mɔ ni nɔ Kwɔ yɛ jeŋ muu lɛ fɛɛ mli lɛ miiwie. Esa akɛ enɛ atsirɛ wɔ ni wɔjɛ bulɛ mli wɔsɔle wɔhã lɛ. Bɔ ni afee ni Nyɔŋmɔ abo wɔsɔlemɔi atoi lɛ, esa akɛ wɔfee nibii komɛi hu. Amɛteŋ etɛ nɛ.

Klɛŋklɛŋ lɛ, esa akɛ wɔsɔle wɔhã Yehowa Nyɔŋmɔ pɛ—jeee Yesu, “hetselɔ” ko, loo okadi ko. (2 Mose 20:4, 5) Biblia lɛ wieɔ faŋŋ akɛ: ‘Nɔ fɛɛ nɔ mli lɛ nyɛkɛ sɔlemɔ kɛ faikpamɔ kɛ shidaa atsĩa nyɛtutɔmɔi lɛ atã yɛ Nyɔŋmɔ hiɛ.’ (Filipibii 4:6) Nɔ ni ji enyɔ lɛ, esa akɛ wɔsɔle kɛtsɔ Nyɔŋmɔ Bi Yesu Kristo gbɛ́i amli. Yesu diɛŋtsɛ tsɔɔ mli akɛ: ‘Mɔ ko baaa tsɛ lɛ ŋɔɔ, akɛ ja etsɔ minɔ.’ (Yohane 14:6) Nɔ ni ji etɛ lɛ, esa akɛ wɔsɔlemɔi kɛ Nyɔŋmɔ suɔmɔnaa nii akpã gbee. Biblia lɛ kɛɔ akɛ: ‘Kɛji wɔba nɔ ko yɛ esuɔmɔ naa lɛ, eboɔ wɔ toi.’ *—1 Yohane 5:14.

Kɛ̃lɛ eji anɔkwale akɛ, wekukpaa ni kã mɛi enyɔ teŋ lɛ nyɛŋ akã he aya nɔ kɛ́ daanɛɛ mɔ kome sɔŋŋ ji mɔ ni wieɔ. Taakɛ eji yɛ nanemɛi enyɔ ni miigba sane lɛ ahe lɛ, esa akɛ wɔ hu wɔŋmɛ gbɛ ni Nyɔŋmɔ kɛwɔ awie, ní wɔbo lɛ toi kɛ́ eewie. Ani ole gbɛ ni Nyɔŋmɔ tsɔɔ nɔ ekɛ wɔ wieɔ?

Ŋmɛnɛ lɛ, Yehowa Nyɔŋmɔ tsɔɔ e-Wiemɔ ni aŋma lɛ, ni ji Biblia lɛ nɔ ekɛ wɔ “wieɔ.” (2 Timoteo 3:16, 17) Mɛni hewɔ wɔkɛɔ nakai? Akɛ nɔkwɛmɔnɔ lɛ: Ŋɔɔ lɛ akɛ onaanyo waa ko ŋma bo wolo. Kɛ́ okane ogbe naa lɛ, okɛ miishɛɛ baakɛɛ mɛi krokomɛi akɛ, “Bianɛ nɔŋŋ minu minaanyo lɛ he!” Kɛ̃lɛ, onuuu onaanyo lɛ gbee diɛŋtsɛ, shi ekɛbo wie kɛtsɔ woloŋmaa nɔ. Yɛ nakai gbɛ nɔŋŋ nɔ lɛ, kɛ́ okane Biblia lɛ, etsɔɔ akɛ ooŋmɛ gbɛ ni Yehowa kɛbo awie. No hewɔ lɛ, Gina ni atsi etã yɛ klɛŋklɛŋ sane ni yɔɔ wolo nɛɛ mli lɛ mli lɛ wie akɛ, “Misusuɔ akɛ, kɛ́ miitao ni Nyɔŋmɔ aná mi akɛ enaanyo lɛ, esa akɛ makane ‘wolo’ ni eŋma wɔ, ni ji Biblia lɛ.” Ekɛfata he akɛ “Biblia lɛ ni mikaneɔ daa gbi lɛ ehã mitsi mibɛŋkɛ Nyɔŋmɔ kpaakpa.” Ani oŋmɛɔ gbɛ ni Yehowa kɛbo awie daa gbi kɛtsɔ e-Wiemɔ ni ji Biblia lɛ ni oookane daa gbi lɛ nɔ? Nakai ni ooofee lɛ baahã onu he akɛ obɛŋkɛ Nyɔŋmɔ kpaakpa.