Bibliai ni Aprinti yɛ Japan
Akɛni mɛi babaoo miitao amɛná Bibliai ni sɛɛ tilɛ kɛ nɔ ni akɛ wolo kpakpa ni tsɛɔ fee lɛ hewɔ lɛ, Yehowa Odasefoi lɛ ehé mashiŋ wulu ko ni akɛprintiɔ woji amɛwo amɛwoji aprintimɔ nitsumɔhe ni yɔɔ Ebina, yɛ Japan lɛ.
Shishijee mli lɛ, wɔhao waa ejaakɛ shikpɔŋhosomɔ kɛ tsunami ni ba Japan yɛ March 11, afi 2011 lɛ hã ilɛktrisiti he ba naagba, ejaakɛ afɔɔ kane gbee waa.
Fɛɛ sɛɛ lɛ, aje nitsumɔ lɛ shishi yɛ September afi 2011. Eyeee nyɔji etɛ ni akɛ mashiŋ hee nɛɛ printi Jeŋ Hee Shishitsɔɔmɔ lɛ klɛŋklɛŋ nɔ ni afee yɛ Chinese mli lɛ.
Mashiŋ hee nɛɛ kɛlɛ aaafee mitai 400, ni ato he gbɛjianɔ bɔ ni kɛ́ eetsu nii lɛ, ehe ehiaa ni mɔ ko akudɔ lɛ. Mashiŋ lɛ diɛŋtsɛ printiɔ woji lɛ, ehaa woji lɛ asɛɛ, etoɔ, ekɛwoɔ adekai amli, esiiliɔ naa, kɛkɛ lɛ eto eshwie tsei anɔ.
Akɛ Ekomefeemɔ Tsu, ni Eye Omanye
Nibii ahe gbɛjianɔ ni ato jogbaŋŋ kɛ ekome ni afee lɛ ji nɔ ni hã nitsumɔ lɛ ye omanye lɛ. Akɛ nɔkwɛmɔnɔ lɛ, ehe bahia ni asiili mashiŋ lɛ fãi srɔtoi lɛ fɛɛ anaa, akɛwo tso adekai loo kret amli, ato awo kɔntenai 34 amli, koni akɛshi Yuropa kɛya Japan.
Mɛi nyɔŋma, ni ji hii kɛ yei ni tsuɔ nii yɛ Yehowa Odasefoi anitsumɔhe nine ni yɔɔ United States lɛ fã gbɛ kɛtee Japan ni amɛyaye amɛbua kɛto tsɔne lɛ he gbɛjianɔ. Amɛteŋ mɛi komɛi hi Japan nyɔji ekpaa kɛtsɔɔ nitsulɔi ni yɔɔ jɛmɛ lɛ bɔ ni akɛ mashiŋ lɛ baatsu nii ahã kɛ bɔ ni amɛbaakura lɛ.
Nitsumɔhei ni yɔɔ Japan lɛ, ni amɛprintiɔ woji lɛ ahiɛ sɔ Yehowa Odasefoi lɛ amashiŋ hee ni akɛprintiɔ woji lɛ waa. Yɛ March 19, 2012 lɛ, mɛi oha kɛ sɛɛ ni jɛ nitsumɔhei nɛɛ tee amɛyashara shi yɛ Odasefoi lɛ woji aprintimɔ nitsumɔhe nɛɛ. Amɛhiɛ sɔ nibii ni amɛna lɛ waa.
Dani amɛbaashi lɛ, ahã amɛteŋ mɔ fɛɛ mɔ Jeŋ Hee Shishitsɔɔmɔ Biblia lɛ ni akɛ mashiŋ hee lɛ printi lɛ ekomekomei.
Kulɛ wɔnitsumɔhe niji ni yɔɔ United States kɛ Brazil lɛ pɛ ni printiɔ Biblia ni sɛɛ ti kɛhãa Yehowa Odasefoi yɛ je lɛŋ fɛɛ lɛ, shi amrɔ nɛɛ, Japan nitsumɔhe nine lɛ hu ebafata he.
‘Nitsumɔ ni Baanyiɛ Sɛɛ lɛ Tsumɔ Baawa Waa’
Odasefoi lɛ kɛ mɛi ni jɛ nitsumɔhei krokomɛi amli kɛbaye amɛbua kɛtsu mashiŋ hee lɛ he nii lɛ kɛ ekomefeemɔ tsu nii kɛ miishɛɛ. Nitsulɔi lɛ ateŋ mɔ kome ni ejeee Odasefonyo lɛ kɛɛ akɛ: “Minaa nyɛ tamɔ weku kome mli bii.”
Gbi ni agbeɔ nitsumɔ lɛ naa lɛ, nitsulɔ ko, ni lɛ hu ejeee Odasefonyo lɛ wie akɛ: “Kɛ́ wɔgbe nitsumɔ nɛɛ naa lɛ, ekroko ni mayatsu lɛ baawa waa kɛhã mi, ejaakɛ ebafeŋ miishɛɛ tamɔ bɔ ni eji yɛ Watchtower lɛ!”
Ekolɛ Obaasumɔ Enɛ Hu
WOJI KƐ NIBII NI WƆFEƆ
Aatsu Hiamɔ Nii ko He Nii
Kwɛmɔ vidio nɛɛ koni ona bɔ ni akɛ wɔwoji akalamɔhe ni yɔɔ Japan lɛ tsuɔ nii kɛkalaa Biblia lɛ koni mɛi ni yɔɔ je lɛŋ hei fɛɛ lɛ nine anyɛ ashɛ Biblia lɛ nɔ.