ARTIK POU ÉTIDYÉ 18
Kouman nou pouvé fè progrè annan fason nou ka adoré Jéova
« Réfléchi asou sa bagaj-ya, mété tout to fòrs annan sa, pou tout moun pouvé wè to ka fè progrè » (1 TIM. 4:15).
KANTIK 84 Wi mo la !
KOUTWÉY ASOU SA NOU KÉ WÈ a
1. Ki kalité òbjèktif èspirityèl nou pouvé gen ?
KOU nou sa dé vré krétyen, nou kontan Jéova bokou. Nou lé bay li sa nou gen ki miyò. Mé, pou nou fè tousa nou pouvé pou Jéova, nou divèt gen òbjèktif èspirityèl b, kou parèkzanp travay pou gen kalité krétyen-yan divèt gen, anprann fè nouvo bagaj ouben chaché kouman nou pouvé idé nou frè ké sò-ya.
2. Poukisa nou divèt lé divini pi vayan annan fason nou ka adoré Jéova ?
2 Poukisa nou divèt lé divini pi vayan annan fason nou ka adoré Jéova ? Pou koumansé, paské nou lé fè nou Papa ki annan syèl-a é ki kontan nou plézi. Jéova kontan lò i ka wè nou sèrvi tousa nou konnèt fè pou adoré l’. É osi paské nou toujou lé idé nou frè ké sò pi byen ankò (1 Thess. 4:9, 10). Ki i gen lontan ki i pa gen lontan nou annan lavérité-a, nou tout pouvé fè progrè. Annou wè kouman.
3. Dapré 1 Timothée 4:12-16, kisa apot Pòl ankourajé Timoté fè ?
3 Lò apot Pòl ékri Timoté so prémyé lèt, Timoté té jenn mé i té ja roun ansyen ki té gen bokou èspéryans. Pourtan, apot-a ankourajé l’ kontinyé fè progrè (li 1 Timothée 4:12-16). Si to ka réfléchi asou sa Pòl di, to ké wè ki i té lé Timoté fè progrè annan dé bagaj : i té divèt travay pou gen kalité krétyen-yan divèt gen kou lanmou ké lafwa é i té divèt mennen roun lavi ki pròp. I té divèt osi vin pi vayan annan zafè li douvan tout moun é annan zafè ankourajé ké ansényé moun. Nou ké gadé èkzanp Timoté pou nou wè kouman, lò nou gen òbjèktif ki rézonab, sa pouvé idé nou fè progrè. Nou ké wè osi kouman nou pouvé fè plis annan prédikasyon-an.
TRAVAY POU TO GEN KALITÉ KRÉTYEN-YAN DIVÈT GEN
4. Dapré Philippiens 2:19-22, poukisa Timoté té itil pou Jéova ?
4 Poukisa Timoté té itil pou Jéova ? I té gen bèl kalité krétyen (li Philippiens 2:19-22). Dapré sa Pòl ka di asou Timoté, nou ka wè ki i té gen imilité, i té fidèl, i té ka byen fè so travay é moun té pouvé konté asou li. Kou i té janti é i té ka sousyé so kò di so frè ké sò-ya, a pou sa Pòl té kontan li bokou é i pa ézité bay li fè travay ki pa té fasil (1 Cor. 4:17). Si nou menm osi nou ka chaché gen kalité Jéova kontan, i ké kontan nou é nou ké pi itil ankò annan asanblé-a (Ps. 25:9 ; 138:6).
Réfléchi asou ki kalité krétyen to té ké lé travay ankò plis (gadé paragraf 5-6).
5. a) Kisa ki pouvé idé to wè ki kalité krétyen to divèt chaché gen ? b) Asou zimaj-a, kouman sò-a ki ka chaché gen plis konpasyon ka travay pou rivé fè sa ?
5 Chwazi roun òbjèktif ki prési. Priyè épi réfléchi asou ki bagaj to bézwen chanjé annan to pèrsonalité. Chwazi roun kalité èspésyalman. Parèkzanp, ès to pouvé chaché gen plis konpasyon ouben chaché gen plis anvi idé to frè ké to sò-ya ? Ès to pouvé chaché fè lapè ankò plis épi pardonnen plis ? Pitèt sa ké idé to si to ka doumandé roun bon zanmi bay to konsèy (Prov. 27:6).
6. Kouman to pouvé fè pou gen roun kalité ?
6 Travay pou to rivé fè sa to prévwè. Kouman to pouvé rivé fè sa ? To pouvé pran tan pou to byen étidyé kalité to chwazi-a. Parèkzanp, si to ka désidé anprann pardonnen ròt-ya pi fasilman, pou koumansé to pouvé li épi réfléchi asou èkzanp moun annan Labib-a ki pardonnen ròt-ya fasilman. To pouvé fè menm bagaj-a ké èkzanp ròt moun ki pa pardonnen. Réfléchi asou èkzanp Jézi ki té ka pardonnen fasilman (Luc 7:47, 48). Pasé i rété asou sa moun té ka fè ki pa té bon, i té ka rété asou sa yé té pouvé fè. A pa sa farizyen-yan annan so lépòk té ka fè. Yé té ka « gadé ròt-ya kousidiré yé pa té anyen » (Luc 18:9). Lò to fini réfléchi asou sa èkzanp-ya, doumandé to kò : « Kisa mo ka wè koté ròt-ya ? Asou ki bagaj annan yé pèrsonalité mo ka désidé rété ? » Si sa rèd pou to pardonnen roun moun, éséyé marké asou roun papyé tout bèl kalité to rémarké koté li. Épi doumandé to kò : « Kouman Jézi ka wè sa moun-an ? Ès i té ké pardonnen l’ ? » Si roun krétyen ka fè sa, sa pouvé idé l’ chanjé fason i ka pansé. O koumansman, si nou gen pou pardonnen roun moun ki fè nou lapenn sa pouvé rèd. Mé si nou ka kontinyé fè éfòr, piti piti, nou ké rivé fè sa pi fasilman.
ANPRANN FÈ NOUVO BAGAJ
Di to paré lò yé ka doumandé volontèr pou fè travay annan sal Rwayonm-an e (gadé paragraf 7).
7. Dapré prensip ki annan Proverbes 22:29, jòdla, kouman Jéova ka sèrvi moun ki ka travay byen ?
7 To pouvé osi désidé anprann fè roun bagaj ki itil. Lò nou ka gadé kantité moun ki ka vini pou konstrwi Bétèl, sal asanblé, ké sal di Rwayonm, kisa nou ka wè ? Nou ka wè ki bokou annan yé anprann yé travay òbò frè ké sò ki gen èspéryans. Kou nou ka wè l’ asou zimaj-a, frè kou sò ka anprann fè bagaj pou okipé di sal asanblé-ya ké sal di Rwayonm-yan. A konsa ké ròt fason ankò, Jéova, « sa-la ki Rwa pou tout-tan », ké Jézi Kris, « Rwa sa-ya ki ka dirijé », ka sèrvi moun ki ka travay byen pou fè roun patché bèl bagaj (1 Tim. 1:17 ; 6:15 ; li Proverbes 22:29). Nou lé travay rèd é sèrvi sa nou konnèt fè ; si nou ka fè sa, a pa pou nou rousouvwè lònò mé a pou glorifyé Jéova (Jean 8:54).
8. Kisa ki pouvé idé to wè ki bagaj to divèt anprann fè ?
8 Chwazi roun òbjèktif ki prési. Ki bagaj to pouvé désidé anprann fè ? Doumandé ansyen-yan annan to asanblé é pitèt to rèsponsab sirkonskripsyon bay to konsèy. Si yé ka konséyé to vin pi vayan annan zafè palé douvan tout moun ouben ansényé moun, doumandé yé idé to wè ki kalité ouben ki tèknik to divèt travay. Épi fè sa to divèt fè pou fè progrè. Kouman to pouvé fè sa ?
9. Kisa to pouvé fè pou to rivé anprann fè roun nouvo bagaj ?
9 Travay pou to rivé fè sa to prévwè. Si to ka désidé vin pi vayan annan zafè ansényé moun, to pouvé pran tan byen étidyé ti liv Applique-toi à la lecture et à l’enseignement. Si to gen roun sijè pou fè annan réinyon-an ki ka fèt an mitan simenn-an, to pouvé doumandé roun frè ki gen èspéryans kouté to épi di to kouman to pouvé vin pi fò. Préparé to sijè bònò, konsa yé ké pouvé wè ki to ka travay rèd é ki yé pouvé konté asou to (Prov. 21:5 ; 2 Cor. 8:22).
10. Bay roun èkzanp ki ka montré kouman nou pouvé fè progrè.
10 Kisa to pouvé fè si to ka désidé travay asou roun bagaj ki pa fasil pou to ? Pa lagé ! Roun frè yé ka aplé Garry té gen problèm ké zafè li-a. I ka sonjé kouman i té jennen lò i té ka éséyé li douvan tout moun annan réinyon asanblé-a. Mé i pa janmen arété fè éfòr. I ka di ki jòdla, gras a fòrmasyon i rousouvwè-a, i pouvé fè diskour annan asanblé-ya, asanblé sirkonskripsyon-yan, ké asanblé réjyonal-ya !
11. Kou Timoté, kisa ki ké idé nou fè plis pou Jéova ?
11 Ès Timoté divini bon menm annan zafè ansényé-a ouben annan zafè palé douvan tout moun ? Labib-a pa ka di nou tousa. Mé nou pouvé sir ki piti piti Timoté divini pi vayan annan sa i té gen pou fè paské i swiv konsèy Pòl (2 Tim. 3:10). Menm fason-an, si nou ka chaché vin miyò annan sa nou konnèt fè, nou ké pouvé fè plis pou Jéova.
CHACHÉ KOUMAN TO POUVÉ IDÉ RÒT-YA
12. Kouman ròt krétyen idé to ?
12 Nou tout kontan lò ròt krétyen-yan ka idé nou. Lò nou lopital, nou kontan lò roun ansyen ki annan roun comité de liaison hospitalier ouben annan roun group ki ka vizité moun malad ka vin wè nou. Lò nou gen roun problèm, nou kontan lò roun ansyen ka pran tan pou kouté nou ké konsolé nou. Lò nou bézwen roun moun idé nou pou fè roun léson biblik, nou byen kontan lò roun pyonyé ki gen èspéryans ka vin ké nou annan léson biblik-a é ka bay nou déztrwa konsèy. Sa krétyen-yan ka pran plézi idé ròt-ya. Nou menm osi nou pouvé gen sa menm lajwa-a lò nou ka randé nou frè ké nou sò-ya sèrvis. Jézi di : « Nou tchò kontan plis lò nou ka bay ki lò nou ka rousouvwè » (Actes 20:35). Si to lé fè plis pou Jéova annan sa domenn-an ouben ròt domenn ankò, kisa ki ké idé to ?
13. Kisa nou divèt sonjé lò nou ka chwazi roun òbjèktif ?
13 Pa pran roun òbjèktif ki pa prési. Parèkzanp, si to ka désidé fè plis bagaj annan asanblé-a, kou sa òbjèktif-a pa prési, pitèt to pa ké wè lò to rivé fè l’. Alòr chwazi roun òbjèktif ki klè é ki prési. To jis pouvé pran roun papyé épi marké sa objèktif-a é fason to ké fè pou to rivé fè sa.
14. Poukisa nou divèt paré pou chanjé déztrwa bagaj lò nou ka chwazi roun òbjèktif ?
14 Lò nou ka chwazi roun òbjèktif, a pou nou paré fè déztrwa chanjman si roun bagaj rivé. Poukisa ? Paské détan roun bagaj pouvé rivé é nou pa pouvé fè anyen pou sa. Annou pran roun èkzanp : Apot Pòl té idé fòrmé asanblé-a ki té annan vil Tésalonik é pitèt i té désidé rété annan sa vil-a pou idé sa nouvo krétyen-yan. Mé akoz di moun ki pa té kontan sa i té ka fè, i té blijé pati (Actes 17:1-5, 10). Si i té rété, i té ké mété lavi so frè ké sò-ya an danjé. Mé i pa arété éséyé idé yé. I adapté so kò ké so nouvo sitiasyon. A sa nou ka wè paské pita, Pòl voyé Timoté Tésalonik pou i té ankourajé asanblé-a ki té fin fèt (1 Thess. 3:1-3). Sa krétyen-yan té divèt byen kontan ki Timoté té paré pou sèrvi Bondjé nenpòrt ki koté yé té bézwen li.
15. Kouman sèrten bagaj pouvé fè nou chanjé òbjèktif ? Bay roun èkzanp.
15 Fason Pòl adapté so kò ka anprann nou bokou bagaj. Pitèt nou chwazi roun òbjèktif, épi nou sitiasyon chanjé é sa ka anpéché nou fè sa nou té désidé (Eccl. 9:11). Si a sa ki rivé to, a pou to paré pou pran rounòt òbjèktif ki ka alé ké to sitiasyon. A sa Ted ké Hiedi fè. Yé té divèt lésé Bétèl-a akoz di roun problèm santé. Mé yé lanmou pou Jéova fè yé chaché rounòt fason pou fè plis pou li annan prédikasyon-an. Pou koumansé, yé pran sèrvis pyonyé pèrmanan. Apré sa yé divini pyonyé èspésyal é Ted rousouvwè roun fòrmasyon pou ranplasé rèsponsab sirkonskripsyon-an. Pita, laj pou rété rèsponsab sirkonskripsyon chanjé. Ted ké Hiedi konprann ki yé té tro vyé pou kontinyé annan sa sèrvis-a. Menm si yé té tris, yé té savé ki yé té pouvé sèrvi Jéova rounòt fason. Ted ka di : « Nou anprann pa mété nou lidé asou rounsèl fason pou sèrvi Jéova. »
16. Kisa Galates 6:4 ka anprann nou ?
16 Nou pa pouvé kontrolé tousa ki ka rivé nou annan nou lavi. A pou sa, nou pa divèt krè ki nou valò ka dépann di travay nou ka fè pou Jéova, ni konparé sa nou ka fè ké sa ròt-ya ka fè. Hiedi ka di : « Lò to ka konparé to lavi ké sa ki ka pasé annan lavi ròt moun, to pa gen lapè ankò » (li Galates 6:4). Pi enpòrtan-an, a chaché fason pou nou sèrvi Jéova é pou nou sèrvi nou frè ké sò-ya c.
17. Kisa to pouvé fè pou to rousouvwè ròt rèsponsabilité ?
17 Pran désizyon ki ké pèrmèt to asèpté fè plis bagaj pou Jéova. Parèkzanp, kontinyé gen roun lavi ki senp é pa alé chaché pyès dèt pou to kò. Anplis di sa, chwazi piti òbjèktif ki ké idé to rivé fè pi gran bagaj. Parèkzanp, si to lé divini pyonyé pèrmanan, ès to pouvé koumansé ké sèrvis pyonyé òksilyèr chak mwa dipi aprézan ? Si to lé divini asistan, ès to pouvé pasé plis tan annan prédikasyon-an ouben alé wè frè ké sò-ya annan to asanblé ki malad ou ki ja gen yé ti laj ? Èspéryans to ké trapé ké pèrmèt to gen plis rèsponsabilité pita (Rom. 12:11).
Chwazi roun òbjèktif ki prési é ki alé ké to sitiasyon f (gadé paragraf 18).
18. Kisa èkzanp Beverley ka anprann nou ? (gadé zimaj-a osi)
18 Nou pa janmen tro vyé pou nou vin pi vayan annan fason nou ka adoré Jéova. A sa nou ka anprann ké èkzanp Beverley, roun sò ki gen 75 an. Akoz di roun problèm santé i té gen ki té grav, i pa té pouvé byen maché. Mé i té lé partisipé annan kanpagn pou Mémoryal-a. Donk, i chwazi plizyèr òbjèktif ki té prési é i rivé fè sa i té prévwè. I té kontan toubonnman. Anplis di sa, lò ròt krétyen wè balan i té gen, sa bay yé anvi fè plis annan prédikasyon-an. Menm si nou frè ké sò ki ja granmoun pa pouvé fè tousa yé lé akoz di yé laj, Jéova kontan tousa yé ka fè (Ps. 71:17, 18).
19. Ki kalité òbjèktif èspirityèl nou pouvé désidé gen ?
19 Chwazi òbjèktif ki ka alé ké to sitiasyon. Travay pou to gen kalité ki ka fè Jéova plézi. Anprann fè bagaj ki ké pèrmèt to pi itil pou nou Bondjé ké so òrganizasyon. Épi chaché kouman to pouvé idé to frè ké sò-ya ankò plis d. Konsa, kou Timoté, gras a bénédiksyon Jéova-a, ‘tout moun ké pouvé wè to ka fè progrè’ (1 Tim. 4:15).
KANTIK 38 Jéova ké fè to vin fò
a Timoté té vayan annan zafè préché bon nouvèl-a. Magré sa, apot Pòl ankourajé l’ kontinyé fè progrè. Si Timoté té ka swiv sa konsèy-a, i té ké pi itil ankò pou Jéova é i té ké pouvé idé so frè ké sò-ya ankò pi byen. Kou Timoté, ès to menm osi to anvi fè plis ankò pou Jéova ké pou to frè ké to sò ? Asiré pa pitèt ! Ki òbjèktif ké idé to fè sa ? É kisa to divèt fè pou to chwazi sa òbjèktif-ya é pou to rivé fè sa to prévwè ?
b POU BYEN KONPRANN : Annan òbjèktif èspirityèl, i gen tousa nou ka fè pou sèrvi Jéova pi byen é pou fè li plézi.
c Gadé annan liv Organisés pour faire la volonté de Jéhovah parti « Servir là où il y a besoin de renfort » (chapit 10, paragraf 6-9).
d Gadé léson 60, « Continuez vos progrès », annan liv Viv ké tchò kontan pou tout-tan !
