Menmsi ou ka fè tousa ou pouvé pou ou kontinyé gen tchò kontan annan ou maryaj é annan ou fanmi, malò pouvé tonbé. Annan sa sitiasyon-an, sa ké pitèt rèd pou ou kontinyé gen tchò kontan (Ecclésiaste 9:11). Bondjé ka idé nou ké lanmou lò nou ka trapé traka. Aprézan nou ké wè plizyèr prensip ki annan Labib-a. Si ou ka swiv sa prensip-ya ou ké ou fanmi ké pouvé tchenbé doubout douvan pi mové éprèv-ya.

SA LABIB-A KA DI : « Jité tout zòt traka asou li paské i ka pran swen di zòt » (1 Pierre 5:7). Pa bliyé a pa janmen Bondjé ki ka fè si ou gen malò (Jacques 1:13). Si ou ka vini pròch di li, i ké idé ou pi byen pasé pésonn (Isaïe 41:10). « Di li tousa ou gen ofon ou tchò » (Psaume 62:8).

Ou ké trapé soulajman osi si ou ka étidyé Labib-a chak jou. Ou ké wè ki Jéova « ka konsolé [ou] annan tout [ou] tribilasyon » (2 Corinthiens 1:3, 4 ; Romains 15:4). I ka promèt ou bay ou so « lapè », « ki ka dépasé tousa nou pouvé konprann » (Philippiens 4:6, 7, 13).

SA OU POUVÉ FÈ :

• Priyè Jéova pou ou rété kalm é pou anyen pa anpéché ou byen kalkilé ou zafè.

• Byen gadé tout posibilité ou gen douvan ou é chwazi sa-la ki pi bon pou ou.

SA LABIB-A KA DI : « Tchò moun entélijan-an ka trapé konésans-a, é zorè moun saj-a ka chaché gen konésans-a » (Proverbes 18:15). Chaché byen konprann sa moun annan ou fanmi gen annan yé tchò ké sa yé bézwen. Palé ké yé. Kouté yé (Proverbes 20:5).

É si ou pédi roun moun ou kontan ? Pa pè montré sa ou gen annan ou tchò. Sonjé ki menm Jézi « pléré » (Jean 11:35 ; Ecclésiaste 3:4). A pou ou pran tan pozé é a pou ou dronmi (Ecclésiaste 4:6). Sa enpòrtan pou tchenbé anba malò.

SA OU POUVÉ FÈ :

• Pa antann malò rivé pou pran labitid palé ké ou fanmi. Si problèm ka rivé, yé pa ké pè palé ké ou.

• Palé ké moun ki ja pasé annan menm sitiasyon ké ou.

SA LABIB-A KA DI : « A tout-tan roun bon zanmi ka montré so lanmou, é a roun frè ki fèt pou jou malò-ya » (Proverbes 17:17). Ou zanmi lé idé ou, mé yé pitèt pa savé kouman pou yé fè. Pa pè èspliké yé sa ou vréman bézwen (Proverbes 12:25). Alé osi wè moun ki ka konprann Labib-a pou yé idé ou annan domenn èspirityèl. Yé ké bay ou konsèy ki ka vini di Labib-a ki ké itil pou ou (Jacques 5:14).

Ou ké trapé fòrs ou bézwen-an si ou ka frékanté sa ki gen vré lafwa annan Bondjé é ki ka krè annan so promès-ya. Ou ké jwenn bokou soulajman osi si ou ka ankourajé ròt moun ki bézwen. Fè yé konnèt ou lafwa annan Jéova ké so promès. Idé ròt-ya pou ou toujou gen roun bagaj pou fè, épi rété pròch ké sa ki kontan ou é ki ka enkyèt pou ou (Proverbes 18:1 ; 1 Corinthiens 15:58).

SA OU POUVÉ FÈ :

• Palé ké roun bon zanmi, é lésé li idé ou.

• Pa pè louvri ou tchò é di tousa ou bézwen.