Man te moani kaongora n uaa te kaongora aei, ao ti reiakini iai baika a na buokira ni kaekaa te titiraki ae, Antai te Atua? Ti moan noria n te Baibara bwa bon Iehova arana ao aroarona ae rianako riki bon te tangira. Ti rinanon naba te baere e a tia ni karaoia ao te bae e na karaoia ibukini kabwaiaia aomata nako. E ngae ngke e rangi ni bati riki ae ko kona n reiakinna ibukin te Atua, ma ko bae n iangoia bwa ko na kangaa ni kakabwaia man reiakinan taekana.

E berita Iehova bwa “ngkana ko ukoukoria, ao ane e na kariaia bwa ko na kunea.” (1 Rongorongo 28:9) Iangoa te bwaintangira ae rangi ni kakawaki ae mena imwaim ngkai ko a reiakina ao n ataa te Atua, ae taekan “te iraorao ae kaan ma Iehova”! (Taian Areru 25:14) Tera kabwaiam n te aeka n iraorao aei?

Te kukurei ni koaua. E kabwarabwaraaki Iehova bwa “te Atua ae kukukurei.” (1 Timoteo 1:11) Kaanian Iehova ao te kakairi ni kawaina nako, e na karekea nakoim te kukurei ni koaua, ae kona ni kakabwaiako ni kaineti ma am namakin, am iango, ao arom n te itera n rabwata. (Taian Areru 33:12) Ko kona naba ni karekea te kukurei man arom ni kararoai anua ni maiu aika karuanikai, ni karikirakei anua aika raraoi, ao ni kateimatoa am iraorao ma tabemwaang. Ko na bae ni boraoi n iango ma are e taekinna te tia areru ae kangai: “Kaanian te Atua bon te bwai ae raoiroi ibukiu.”​—Taian Areru 73:28.

E tabeakinira n tatabemanira nako. E berita Iehova nakoia ana toro ni kangai: “N na anganiko taeka n reirei ao e na memena naba matau i aom.” (Taian Areru 32:8) Nanon anne bwa e tabeakinia ana toro Iehova n tatabemania nako ao e kakarekei kainnanoia. (Taian Areru 139:​1, 2) Ngkana e a reke am iraorao ni koaua ma Iehova, ao ko na noria bwa e bon tatauraoi n taai nako ibukim.

Taai aika kakukurei aika imwaim. E aki tii anganiko Iehova ae te Atua te maiu ae kakukurei ae ko na rauaki iai ngkai, ma e karekea naba te anga ae ko na nori iai taai aika kakukurei aika imwaim. (Itaia 48:​17, 18) E taku te Baibara: “Ibukini karekean te maiu are aki toki, a riai n ataiko ae tii ngkoe te Atua ae koaua, ao n ataa naba teuare ko kanakomaia ae Iesu Kristo.” (Ioane 17:3) N taai aika kangaanga aikai ao e kona n riki te kantaninga are e anga te Atua bwa kaanga te atinro ae kateimatoaira bwa ti na “nene ni matoa” iai.​—Ebera 6:19.

Aikai tabeua bukina ae kakawaki iai karekean ataan te Atua ao karikirakean te iraorao ma ngaia. Ko kona ni maroro ma temanna Ana Tia Kakoaua Iehova ke nakon jw.org ibukin rongorongona riki aika ibuobuoki.