Durante o ano de servizo de 2021, a o mundo continuou sufrindo por culpa da pandemia da COVID-19. Como se explicou no artigo “Axuda mundial durante a pandemia”, gastáronse millóns de dólares b en axuda e formáronse máis de 950 Comités de Socorro.

 Mentres a pandemia seguía causando moito sufrimento, outros desastres, tanto naturais como provocados polo home, afectáronlle ós nosos irmáns por todo o mundo. O Comité de Coordinadores do Consello Reitor aprobou gastar 8 millóns a maiores das axudas destinadas á COVID-19. Estes cartos usáronse para axudar en máis de 200 desastres. Vexamos agora como se usaron estas doazóns para axudarlles ás vítimas de dous desastres recentes.

 O 22 de maio de 2021, o Monte Nyiragongo, un volcán da República Democrática do Congo, entrou en erupción. A lava destruíu casas, escolas e tamén un depósito de auga. Pero este non foi o único perigo. Durante os días seguintes á erupción, o po tóxico do volcán caeu sobre a cidade de Goma e rexistráronse ducias de terremotos. Ordenaron desaloxar a máis da metade da cidade. Centos de miles fuxiron, e algúns cruzaron a fronteira a Ruanda.

 Entre as persoas que tiveron que marchar, había unhas cinco mil testemuñas de Xehová. Algúns perderon os seus fogares por culpa da erupción e a outros roubáronlle na casa despois de fuxir. Os Comités de Socorro de Ruanda e da República Democrática do Congo, coordinaron tarefas de axuda. A sucursal congolesa comenta o seguinte sobre un Comité de Socorro: “A pesar da caótica situación da cidade e incluso antes da orde de desaloxo, o comité comezou a distribuír comida, auga, mantas e roupa”. Nunha cidade onde estaban reunidos máis de dous mil irmáns, un Comité de Socorro instalou tendas, repartiu máscaras e explicou como reducir o risco de contaxiarse da COVID-19 e da cólera.

 Nos tres meses seguintes ó desastre, os nosos irmáns distribuíron máis de seis toneladas de arroz, seis toneladas de fariña de millo, tres toneladas de aceite para cociñar e tres toneladas de auga. Para aforrar cartos, a sucursal fixo plans para mercar comida na zona en grandes cantidades, en vez de pedila máis cara ó estranxeiro.

 Unha irmá conta: “Estabamos moi desanimados e tristes”. O volcán acababa de destruír a súa nova casa, pero despois ela e a súa familia recibiron axuda física e espiritual. Agora di: “Coa axuda de Xehová, temos o que necesitamos. Puidemos ver como nos axuda a levar as nosas cargas e fai que sexan máis fáciles de soportar”.

 Durante anos, Venezuela sufriu unha grande crise económica. Os nosos irmáns están soportando unhas circunstancias moi difíciles. Faltan os alimentos e aumenta a delincuencia. Non obstante, a organización de Xehová non os abandona.

 Durante o último ano de servizo, gastáronse máis de 1,5 millóns de dólares en comprar e transportar comida e xabón para as familias que máis o necesitaban. A sucursal de Venezuela informa: “Non hai un xeito fácil de transportar cada mes 130 toneladas de comida por todo o país e facerllo chegar ós irmáns que máis o necesitan”. Para asegurarse de que a comida non se desaproveita, os irmáns envían artigos non perecedoiros. A sucursal engade: “Compramos a maioría da comida a granel e na tempada, cando os prezos están máis baixos. Despois buscamos o método de transporte máis económico”.

 Leonel, do Comité de Socorro de Venezuela, encántalle a súa asignación. El di: “As tarefas de axuda son especiais. Este privilexio fortaleceume moito despois de que morrera a miña querida muller pola COVID-19. Mantéñome ocupado e síntome útil ó axudarlles ós irmáns necesitados. Vin persoalmente como Xehová mantén a promesa de non abandonar o seu pobo”.

 Un irmán que no pasado formara parte do Comité de Socorro di: “Agora tocábame a min recibir axuda. Non só recibimos recursos materiais. Os irmáns axudáronnos á miña muller e a min a manter a calma. Coidaron de nós, animáronnos e consoláronnos”.

 Algúns desastres ocorren con pouco ou ningún aviso previo. Non obstante, a organización de Xehová pode obter e dar axuda rapidamente grazas ás túas doazóns para a obra mundial. Podes utilizar algún dos métodos dispoñibles en donate.mt711.com. Graciñas polas túas xenerosas doazóns.