JEZUK don choram modem khambear umkallaun jivexim marlo mhunn Bible-ant sanglam tem zaito lok patietat. (Mt. 27:35-38) Punn Jezu melea uprant, tachi kudd mornnak toiar keli ani ti somadhint guttlaun dovorli mhunn Bible-ant sangloli hi mahiti sarki asa kai na mhunn zaite lok dubhavtat.—Marku 15:42-46.

Khambear umkallaun marlolea opradiak sarke toren purunk, zoxem somadhint ghalunk dinasle, punn chodd korun tankam veglle toren moronk soddttale, mhunn Bible-ache thodde khodd kaddpi sangtat. Thoddim zannam oxem kiteak patietat tea vixim Ariel Sabar nanvachea eka riportteran, Smithsonian mhunnttlolea magazine-ant oxem boroilem: “Somazantlea ekdom vaitt munxank khast lavunk khursar khillaitale. Ani oslea lokank Romi lok somadhint ghalunk ditole mhunn chintop pixemponnachem zaun asa oxem thodde zannar sangtat.” Romi lok opradiank lojechem moronn moronk soddttale. Tem mhunnttlear, ranvotti zonvarank khaunk, te ti melʼli kudd khambearuch umkallaun dovortale. Ani uprant, te melʼle kuddichem jem kitem urlam, tem her melʼlim moddim asat thoim vhoron te uddoitale.

Punn pornea vostuncho sodh korpeank khambear umkallaun marlolea thoddea Judevam vixim anikui kitem kollon ailam. 1968-ant, Jerusalem-a lagim eka Judev familichea somadhint, khambear umkallaun marlolea eka munxachim haddam mellʼllim. Hea munxak poilea xekddeant jivexim marlolo ani tachim haddam eka fatrache pettient dovorlolim. Osle pettiek ‘ossuary’ mhunnttat. Hea pettient tankam 11.5 centimeter (4.5 inch) lamb khillean khillailolem khonttechem hadd mellʼllem. Hea vixim Sabar sangta: “Hem khonttechem hadd Yehochanan nanvachea eka munxachem aslem. Hantuntlean Jezuk somadhint ghatlolo mhunn Bible-ant sangloli mahiti ghoddie sarki zaunk xokta mhunn puravo melltta. Toxench, Jezuchea disamnim khursar khillailolea thoddea Judevank, Romi lok somadhint ghalunk ditale mhunn kollon ieta.”

Yehochanan-achea haddak lagon, Jezuk koso khillailʼlo tea vixim lokanchem chintop veg-vegllem asa. Tori astana, umkallaun marlolea sogleach Judevank her moddim asat thoim uddoinasle, punn thoddeank somadhint ghaltale mhunn puravo melltta. Tor Jezuchi khambear umkallailʼli kudd, mornnak toiar kelʼli ani somadhint ghatloli mhunn Bible-ant sangloli mahiti patieupa sarki asa mhunn amkam khatri melltta.

Ani sogleam-von chodd mhotvachem mhunnttlear, Jezuk eka girest munxachea somadhint purtole mhunn Jehovan bhasaunni kelʼli. Ani Jehova sangta tem sodanch ghoddon ieta!—Iz. 53:9; 55:11.