1. ¿Jamüsü mojushaataka saaʼin wayuu chaa Siló?

NIʼRÜIN Samuel mojushaatain saaʼin wayuu chaa Siló. Malaaka joo outuin 30.000 israeliita natuma na filisteokana. Noʼuta aaʼinna 4.000 israeliita na filisteokana süpülapünaa tia. Iralamuʼulaashii na wayuu chajanakana Siló. Aʼyalajüshii na tepichikana nachiirua nashi, eesü jieyuu aʼyalajaka nachiirua naʼwayuuse, eeshii eekai naʼyalajüin nachiirua nawalayuu jee nachonnii. Süpülajanataaya neʼra nachikuaʼa (1 Sam. 4:1, 2, 10).

2, 3. ¿Jamüsü sajaʼttaka saʼanasia Siló?

² Tü alatakat soʼu tia, süpüshi neʼe tü kasa mojusü alatakat namüin na israeliitakana. Niajaʼa kasitka tü alatakat Hofní nümaa Finehás, na nüchonniikana Elí, mojulaajüshii maʼin naya. Nalüʼüjain sünain atkawaa tü jurasükeet kalujutkat tü pütchi aapünakat nümüin Moisés, nalüʼüjain shia suluʼujee tü aʼwaajüleekat. Nakanajüinjanaʼaya naʼünüü na israeliitakana naaʼinruʼu sutuma nalüʼüjain tü jurasükeetkat. Nnojotpejeʼe müin aka saaʼin wanee lania tia jurasükeetkat. Ayamuluushii na israeliitakana natuma na filisteokana otta nalüʼüjain tü jurasükeetkat sümaa noʼutaleein naaʼin na nüchonniikana Elí (1 Sam. 4:3-11).

³ Kakalia yalajatüin Siló tü Jurasükeetkat, makalaka kojutuin amüinyüü tia pueulokot. Müshiijeseʼe nuʼnnajaain Elí saaʼujee niinase sümaa outaleein nia nütüjaapa saaʼu nalüʼüjain na filisteokana tü Jurasükeetkat. 98 nuuyase Elí soʼu tia. Shiasaʼa soʼuleʼeya tia, outusü nuʼwayuuse Finehás sünain jemeyulaa. Anuu sünüiki süpülapünaa outaa: «Alüʼüjünüsü saʼanasia Israel suluʼumüin wanee mma naatajatü». Ajaʼttüsü saʼanasia Siló, jama sülüʼüjünüin tü jurasükeetkat (1 Sam. 4:12-22).

4. ¿Kasa wekirajaainjatka anain sünain ekirajaayakat tüü?

⁴ Mojukajasaʼa naaʼin Samuel sutuma tü alatakat. ¿Ichesüche maʼin nunoula süpüla eejirawaa sümaa tü alatakat jee süpüla nükaaliinjain na israeliitakana sünain anajirawaa nümaa Jeʼwaa nachikuaʼa? Süka eein süpüla sülatüin kasa mojusü wamüin otta eein süpüla seemiajaain wanoula sutuma tia, anashii wekirajaale sooʼomüin süchiki nukuwaʼipa Samuel.

5, 6. ¿Kasa saashajaaka achiki tü Wiwüliakat süchikijee tü alatakat chaa Israel? ¿Kasa naaʼinraka Samuel suʼunnaa tia 20 juya?

⁵ Süchikijee tia alatakat, shia saashajaaka achiki tü Wiwüliakat süsalain na filisteokana saaliijee nalüʼüjain tü Jurasükeetkat otta süküjain naleʼejirüin shia süchikuaʼa namüin na israeliitakana. Alatüsü 20 juya suʼunnaa tia otta nnojotsü süküjain tü Wiwüliakat nüchiki Samuel (1 Sam. 7:2). ¿Kasaka naaʼinrüin Samuel suʼunnaa tü 20 juya alatakat? Nnojotsü mochoojüin woʼu tü naaʼinrakat.

⁶ Saashin tü Wiwüliakat, süpülapünaa tü atkawaakat, «ayatüsü antüin nünüiki Samuel namüin napüshuaʼa na wayuu Israelkana». Shiiʼiyatüin tia nikirajapuʼuin waneepia Samuel na israeliitakana (1 Sam. 4:1). 20 juya süchikijee tü alatakat Israel, ayatüshi Samuel sünain ekirajaa na israeliitakana saashin tü Wiwüliakat. Chaʼwaishi nia juyawai suluʼu tü pueulokot Betel, Guilgal otta Mizpá sünain akumajaa sukuwaʼipa tü mojujiraakalü anainjee wayuu chayaa jee sünain ekirajaa tü wayuukalüirua. Aleʼejaa müshijaʼa nia nipialuʼumüin chaa Ramá (1 Sam. 7:15-17). Watüjaaitpa aaʼu niʼyataain waneepia Samuel nümüin Jeʼwaa suʼunnaa tü 20 juya nnojotkalü achuntunüin oʼu nünülia suluʼu tü Wiwüliakat.

7, 8. (1) ¿Jamüsü nünüiki Samuel namüin na israeliitakana sülatapa 20 juya sünain nikirajashaanain naya? (2) ¿Kasa naaʼinraka na israeliitakana sutuma tü nümakat Samuel namüin?

⁷ Amatsüinjaasü nanoula na israeliitakana sutuma mojulaain jee namaʼüjiraain nakuwaʼipa na nüchonniikana Elí. Müshiijeseʼe wattain naalii na aʼwaajakana maleiwayaasü mapa. Shiasaʼa sülatapa 20 juya sünain nikirajashaanain naya Samuel, müshi nia namüin: «Niale juʼwaajüin Jeʼwaa nüchikuaʼa süka süpüshuaʼa jaaʼin, jüsünneʼera tü maleiwayaasüirua eekat jümaʼana otta tü shiyaakuakat Astoret otta nia jiʼitaa anain jaaʼin Jeʼwaa. Nia jiʼyataa amüin niakai nümüiwaʼa otta jiʼreerü nükaaliinjeenain jia noulia na filisteokana» (1 Sam. 7:3).

⁸ Müliashaanashii na israeliitakana natuma na filisteokana. Sutuma najaʼttataainnain na surulaat israeliitakana natuma na filisteokana, jooweeshii naya napüla. Nüküjaka Samuel namüin na israeliitakana eein süpüla naʼwaajüin Jeʼwaa nachikuaʼa otta taasheena naya nutuma. Oonooshii naya nümaa Samuel, nojutaka tü shiyaakua maleiwayaasü eejatkat namaʼana jee oʼttüshii naya sünain naʼwaajüin neʼe Jeʼwaa nümüiwaʼa. Nuutkajeʼerüinjeseʼe naya Samuel suluʼu tü pueulokot Mizpá, palaajeeruʼu sünain Jerusalén. Chajana naya aamajüin otta neeʼiyatüin mojuin maʼin naaʼin saaʼu naʼwaajüin maleiwayaasüirua (paashajeʼera 1 Samuel 7:4-6).

9. ¿Kasa naaʼinraka na filisteokana natüjaapa saaʼu noutkajaain na israeliitakana? ¿Kasaka naaʼinrüin na israeliitakana natüjaapa saaʼu nalüʼülaain na naʼünüükana nanainmüin?

 ⁹ Natüjaapa saaʼu na filisteokana süchiki tia outkajawaakat, oʼunushii naya sünain ashutaa naaʼu na israeliitakana. Mmotkalaka na israeliitakana natüjaapa saaʼu nalüʼülaain naʼünüü nanainmüin. Naashajaaka nümaa Samuel süpüla nuchuntuin kaaliinwaa nümüin Jeʼwaa. Naaʼinrüinjaʼa Samuel tia otta nuʼutuin saaʼin wanee anneerü nümüin Jeʼwaa. Nnojoluiwaʼaya kettaain naʼajüin chi anneetkai, ashutushii na filisteokana naaʼu. Asoutapajaʼa Jeʼwaa nümüin Samuel, katürülashaanasü maʼin nutuma chaa iipünaa nooʼomüin na filisteokana (1 Sam. 7:7-10).

10, 11. (1) ¿Jamüsü keemaka namüin na filisteokana katürülain chaa iipünaa nutuma Jeʼwaa? (2) ¿Kasa alataka nashutapa na filisteokana saaʼu tü pueulokot Mizpá?

¹⁰ Apantajaashii na filisteokana sutuma mmoluin naya. ¿Jamüshii mmotka maʼin naya? ¿Nnojoishiijasaʼa naya jashichin otta yalayalain sünain atkawaa? Nnojoishii naya müin aka saaʼin tepichi awataaka sünainmüin nei sutuma mmoluin seema sütürüla juya. Eesüjaʼa shiale nawataain anainjee keemain maʼin sütürüla chaa iipünaa jee sutuma sukutkajeʼerüin tü uuchikalüirua. Eesü shiyoʼujaale naaʼin sutuma neʼrüin jutatuulin tü sirumakat. Nayainnapa joo mmotka na filisteokana. Ojuʼitüshiijaʼa na israeliitakana suluʼujee tü pueulokot Mizpá, neipiijaka naya. Kamaʼashii neipiijüin süpüla najaʼlajeʼerüin naya, kettaʼaleeshiʼiya natuma nantapa uuchijeeruʼu sünain Jerusalén (1 Sam. 7:11).

¹¹ Anoutaasü nakuwaʼipa na israeliitakana soʼujeʼereʼeya tia. Niaichipa Samuel süsalakai atuma saainjala wayuu chaa Israel. Akaʼaya na israeliitakana, nasütüin süchikuaʼa tü noumain asütüüshikat noulia natuma na filisteokana (1 Sam. 7:13, 14).

12. ¿Jamüshi naʼakaka Samuel na «aaʼinrakana kasa anasü»? ¿Kasa akaaliinjaka nia süpüla nuuntuin tia?

¹² Kakalia mapa, nuchuntuin Pablo nanülia na wayuu nekiipüʼükana na israeliitakana waneepiaka nümaa Maleiwa otta aaʼinrakana kasa anasü. Noʼutku naya wayuukana nia Samuel (Heb. 11:32, 33). Naaʼinrapuʼuin Samuel waneepia tü kasa anasükat otta nütütüleʼerapuʼuin naaʼin na israeliitakana süpüla naaʼinrüinjanain kasa anasü. ¿Kasa akaaliinjaka nia süpüla nikeraajüin tia aʼyatawaakat? Palajana shia sutuma nnojoluin niyamuluuin aaʼin sutuma tü alatakat nümüin, ayatsia nikeraajüin tü aʼyatawaa aapünakat nümüin sümaa naʼatapajüin nunouteʼerüinjatüin Jeʼwaa tü alatakat. Müshia nia aapüshi analuʼut waneepia. Ichaʼasa niʼitaain wanee shiyaawase süpüla jülüjain naaʼin noʼtteʼennüin nutuma Jeʼwaa chaa Mizpá (1 Sam. 7:12).

13. (1) ¿Kasa akuwaʼipaa choʼujaaka wamüin süpüla müin waya maʼaka naaʼin Samuel? (2) ¿Jamüsü anaka ashataa nukuwaʼipa Samuel jimaʼaliiwaʼaya waya?

 ¹³ Loteere wakuwaʼipa noʼuluʼu Maleiwa, kaʼatapalainjana waya, nnojoluinjatü yaletüin waaʼin jee waapüinjatü analuʼut waneepia (paashajeʼera 1 Pedro 5:6). Choʼujaasü eeinjatüin wanain akuwaʼipaakat tia. Akalajasaʼa jülüjatüjülüin naaʼin Samuel akuwaʼipaakat tia jimaʼaliiwaʼaya nia, süka jamüin, wainmain kasa alataka nümüin laülaapa nia mojuka atuma naaʼin. Wekirajaa sünain tia.

14, 15. (1) ¿Kasa mojuka atuma naaʼin Samuel laülaapa nia? (2) ¿Jamüsü naatajatka nukuwaʼipa Samuel sümüin nüchonnii suulia nukuwaʼipa Elí?

¹⁴ Wanaa sümaa suchuntunüin nünülia Samuel nüchikuaʼa suluʼu tü Wiwüliakat, laülaaichipa nia. Müshiijeseʼe niʼitaain na piamashiikana nüchonnii, Joel otta Abías süpüla nakaaliinjain nia sünain anouteʼeraa tü eekai sülatüin chaa Israel. Nnojotpejeʼe kojutuin namüin tü aʼyatawaa niʼitaakat chi nashikai najapuluʼu. Nnojotsü nashatayaain nukuwaʼipa chi nashikai; müliasü wayuu natuma, nnojotsü lotuin nakuwaʼipa jee oikiraashii neʼe naya (1 Sam. 8:1-3).

¹⁵ Soʼu wanee kaʼi, jashichishii na laülaashiikana saaʼu Israel nümüin Samuel, müsü nanüiki: «Na püchonniikana, nnojotsü  nashatüin pukuwaʼipa» (1 Sam. 8:4, 5). ¿Jülüjasüche naaʼin Samuel tü naaʼinrakat na nüchonniikana? Nnojotsü aküjünüin achiki tia. Nütüjaapejeʼe saaʼu Samuel süsalainka Elí naainjala na nüchonniikana sümaa nayain kojutuleein nuulia Maleiwa nutuma. Jülüjasüjeseʼe naaʼin nukuwaʼipa suulia müin aka nia naaʼin Elí (1 Sam. 2:27-29). Nnojoishi aashajaain Jeʼwaa süchiki wanee kasa mojusü naaʼinraka Samuel.

16. ¿Jamüsü naaʼin wanee wayuu eʼrüliire wayumüin na nüchonniikana? ¿Kasa sükaaliinjeechika anain nia nukuwaʼipa Samuel?

¹⁶ Nnojotsü aküjünüin achiki jamüin naaʼin Samuel nütüjaapa saaʼu naainjala na nüchonniikana. Natüjaapejeʼe saaʼu na wayuu kachoinkana neʼrüin japülii, mojuin naaʼin otta alin namüin kaainjarale wanee nachon. Eʼrülii maʼin wayumüin maaʼulu yaa na tepichikana namüin nashi. Moonooinsalii naya otta mojutsat wayuu namüin. Maʼleesia tia sainküin mmakat süpüshuaʼa (paashajeʼera 2 Timoteo 3:1-5). Mojule paaʼin nutuma wanee püchon nnojoikai jaa müin pümüin püchiaapa nia, aneerü paaʼin pikirajaapa süchiki nukuwaʼipa Samuel. Mayaainjeʼe kaainjaraliin na nüchoinkana, ayatshia nia aʼyataain waneepia nümüin Maleiwa. Jülüja paaʼin eein süpüla naaʼinrüin wanee wayuu tü pümakat nümüin, shiapejeʼe nüshateerüin püchiirua tü paaʼinrakat. Müsüjeseʼe waaʼinmajüinjatüin tü wakuwaʼipakat sünain anoujaa süka eein süpüla nashatüin wanoula na wachonniikana. Jee müsia, talateechi maʼin Jeʼwaa, chi Washi iipünaajachikai jüüjüüle pia waneepia nümüin maʼaka naaʼin Samuel.

17. ¿Kasa nachuntaka nümüin Samuel na laülaashii chejeʼewaliikana Israel? ¿Jamüsü nümüin Samuel tü nachuntakat?

¹⁷ Eeyaai neʼe jülüjain naaʼin na nüchonniikana Samuel tü alatajatkat sutuma jülüjain naaʼin nakuwaʼipa neʼe namüiwaʼa jee sutuma kachiiruain naaʼin kamaʼanaa wainma korolo. Süchikijee naküjain na laülaashiikana mojuin tü naaʼinrakat na nüchonniikana Samuel, müshii naya nümüin: «Püneeka wanee wayuu aluwataainjachika waaʼu, süpüla niainjachin süsalain atuma waainjala maʼaka saaʼin tü wane pueulokalüirua». ¿Jamüsü naaʼin Samuel sutuma tü nachuntakat na israeliitakana? ¿Jashichishiche nia sutuma tia? Kakaliaichi nüneeküin nia Jeʼwaa süpüla nunoutuin sukuwaʼipa tü alatakat chaa Israel. Keeʼireepejeʼe naaʼin na israeliitakana eeinjachin wanee wayuu aluwataaka naaʼu maʼaka saaʼin tü wane pueulokalüirua. Nayoutuichipa chi nünüikimaajachikai Maleiwa süpüla niainjachin nekiipüʼüin. Saashin tü Wiwüliakat, mojushiisü nümüin Samuel tü nachuntakat (1 Sam. 8:5, 6).

18. ¿Kasa nümaka Jeʼwaa nümüin Samuel süchiki tü naaʼinrakat na israeliitakana?

¹⁸ Wekirajaa sünain tü nümakat Jeʼwaa nümüin Samuel, müshi nia: «Paaʼinra süpüshuaʼa tü nachuntakat na wayuukana; nnojoishi piain nayoutuin, taya nayoutaka süpüla aluwatawaa naaʼu». Naashin Jeʼwaa  niainjachi neʼe jashichika nümüiwaʼa saaliijee naaʼinrala na israeliitakana, nnojoishi niainjachin Samuel. ¡Eʼrüttaʼaleejaʼa maʼin wayumüin tia wayuukalüirua maka saaʼinrala nümüin chi Maleiwa Pülashikai maʼin! Nüküjainjeseʼe Jeʼwaa namüin naya wayuukana neʼreenain namüliala eere wanee wayuu aluwataaka naaʼu. Namakalaka na wayuukana: «Jaʼitairü, keeʼireesia neʼe waaʼin eeinjachin wanee wayuu aluwataaka waaʼu». Nüneekaka Maleiwa wanee aluwataai otta nüjütaka Samuel süpüla niʼyotuin seita saaʼu nikii. Oʼunushijaʼa nia süka matüjain ayoutajawaa sümaa nünüiki Maleiwa (1 Sam. 8:7-19).

19, 20. (1) ¿Oonooshiche Samuel mojusheeka wanaa sümaa nuluwataain nia Jeʼwaa sünain oʼyotoo seita saaʼu nikii Saúl? (2) ¿Kasa ayataka naaʼinrüin Samuel napüleerua na israeliitakana?

¹⁹ ¿Naaʼinrüinche Samuel mojusheeka tü nümakat Jeʼwaa? ¿Üttüsüche naaʼin sutuma tü alatakat? Nnojotsü üttüin naaʼin Samuel. Jamüshijaʼa nia, oʼunushi süpüla niʼyotuin seita saaʼu nikii Saúl sümaa nutuʼlüin nia süka nütüjaain saaʼu niain aneeküin Jeʼwaa. Sünainjee tia, niiʼiyatüin Samuel sünain talatüin nia nümaa Saúl otta waneepieechin nia nümaa. Müshi Samuel namüin na israeliitakana: «Anii chi wayuu nüneekakai Jeʼwaa, nnojoishi jaralin müin aka naaʼin saʼakajee tü pueulokot» (1 Sam. 10:1, 24).

²⁰ Jülüjasü naaʼin Samuel waneepia tü kasa anasükat. Jamüshijaʼa nia, shia neʼe jülüjaka naaʼin tü akuwaʼipaa anasü eekat nünain Saúl. Nnojotsü üttüin naaʼin sutuma niyoutunüin natuma na israeliitakana, shia jülüjaka naaʼin kakaliaichin niʼyataain waneepia nümüin Jeʼwaa (1 Sam. 12:1-4). Ayatüsü nikeraajüin tü niʼyataainkat, nüküjainjeseʼe namüin na israeliitakana tü eekat süpüla akayaleʼerüin naya nuulia Jeʼwaa otta nütütüleʼerüin naaʼin süpüla jüüjüüinjanain naya waneepia nümüin Jeʼwaa. Nayaawatapa saaʼu naya wayuukana mojuin tü naaʼinrakat, nachuntuin nümüin Samuel nuʼuraajüin napüleerua. Nümakalaka Samuel: «Jamataʼaleeshijaʼa nnojolinjachin toʼuraajüin jüpüleerua, kaainjaleechi taya noʼuluʼu Jeʼwaa nnojoire toʼuraajüin jüpüleerua; tayainjachi ekirajaka jia sünain tü wopu anasükat» (1 Sam. 12:21-24).

21. Nüneekünüle wanee wayuu süpüla wanee aʼyatawaa aapünüinjatiaaka wamüin, ¿jamüsü sükaaliinjeenaka waya nukuwaʼipa Samuel?

²¹ ¿Aneekünüichi wanee wayuu süpüla wanee aʼyatawaa aapünüinjatiaaka pümüin? ¿Jamüsü paaʼin sutuma tia? Washatüle nukuwaʼipa Samuel, nnojoleerü achumujain waaʼin jee nnojoleerü üttakuʼu müin waaʼin (paashajeʼera Proverbios 14:30). Jülüjeesü waaʼin wainmain aʼyatawaa anashaatasü suluʼu nupueulose Jeʼwaa namüin napüshuaʼa na wayuu jüüjüükana nümüin waneepia.

22. ¿Jarat tü akuwaʼipaa anasü niʼrakat Samuel nünain Saúl?

²² Niʼrüin Samuel wayuuin anashi Saúl, yalayala aaʼinchi nia, kekiishi nia otta müleʼuseyuu maʼin. Nuʼttaiwaʼaya sünain aluwatawaa nnojotsü yaletayaain naaʼin jee nnojotsü kachiiruain naaʼin kamaʼanaa wainma korolo (1 Sam. 10:22, 23, 27). Akaʼaya nia, eeshi süpüla nüneeküin süka naaʼin nümüiwaʼa tü nukuwaʼipainjatkat jee tü kasa naaʼinreekalü amüin (Deut. 30:19). ¿Aneetche nutuma süneekia tü naaʼinrajatkat?

23. ¿Kasa akumajaaka suluʼu naaʼin Saúl? ¿Kasa naaʼinraka sutuma yaletajaain naaʼin?

²³ Amojujaasü nukuwaʼipa wanee wayuu laülaale nia atumawaa saaʼu wanee kasa, yaletajaasü naaʼin. Shiajaʼa alataka tia nümüin Saúl, yaletajaasü naaʼin sümaa niʼrüijaain wayumüin, nnojoishijeseʼe oonooin nia sümaa nünüiki Jeʼwaa nüküjaka Samuel nümüin. Soʼu wanee kaʼi, ashapajaasü naaʼin otta naʼajaka nümüin Maleiwa tü mürüt naʼajüinjatiaakat Samuel. Nüchiaain nia Samuel saaliijee tia jee nüküjaka nümüin nnojoliinjanain naluwataain na nüchonniikana nüchikumüin. Eeyaai neʼe nunouteʼerüin nukuwaʼipa Saúl, eʼrüireeshia maʼin wayumüin nümüin Jeʼwaa (1 Sam. 13:8, 9, 13, 14).

24. (1) ¿Kasa naaʼinraka Saúl sutuma nnojoluin noonooin nümaa Jeʼwaa soʼu nütkaain namaa na amalequitakana? (2) ¿Kasa naaʼinraka Saúl wanaa sümaa nüchiaanüin? ¿Kasa naaʼinraka Jeʼwaa sutuma tia?

²⁴ Nuluwataain Jeʼwaa Saúl süpüla nütkaainjachin namaa na amalequitakana. Najaʼlajeʼerüinjatü tü kasairua namaʼanakat otta nuʼutüinjachi aaʼin Agag, chi aluwataakai naaʼu na amalequitakana. Nnojoipejeʼe nuʼutüin Saúl naaʼin Agag otta naapaain tü koroloirua anajüsü namaʼanajatkat naya wayuukana. Shiasaʼa nüchiaapa nia Samuel, aʼülüjashi neʼe Saúl nümüin, naya nüliʼrajakana na wane wayuukana sünain nayain kasirüin tü naainjakat. Nnojotsü naapaain amaa tü nümakat Samuel nümüin soʼu nüchiaain nia. Naashin Saúl, naapaain saʼanasia namüʼlüin na amalequitakana süpüla naʼajüinjatüin shia nümüin Jeʼwaa. Nümaka Samuel nümüin: «Shia anaka aluʼu noonoole wanee wayuu nümaa Maleiwa suulialeʼeya naʼajüin mürüt nümüin». Nüküjainjaʼa Samuel nümüin Saúl nuuʼuleʼerüinjachin nia Jeʼwaa suulia aluwatawaa otta niainjachin eʼitaanüin nüchikumüin wanee wayuu anaʼleekai nuulia (1 Sam. 15:1-33). *

25, 26. (1) ¿Jamüshi niʼyalajaka Samuel naaʼu Saúl? ¿Jamüsü nünüiki Jeʼwaa nümüin? (2) ¿Kasa nütüjaka Samuel wanaa sümaa chejeein nia nipialuʼujee Jesé?

 ²⁵ Sutuma mojushaatain naaʼin Samuel saaliijee kaainjalain Saúl, nülatirüin wanee ai sünain nuchuntashaanain nümüin Jeʼwaa. Saashin tü Wiwüliakat, aʼyalajashaanashi nia naaʼu Saúl. Mojusü naaʼin Samuel saaliijee yaletüin naaʼin Saúl sümaa moonooin nia nümaa Maleiwa. Anapuʼuyaakai nia paala... Nnojoluichipa niʼreein nia Samuel nüchikuaʼa. Niasaʼa Jeʼwaa saaʼu niʼrüin mojuin maʼin naaʼin Samuel, müsü nünüiki nümüin: «¿Joujaleeika puuʼulaaka suulia aʼyalajaa naaʼu Saúl sümaa tayoutuin nia süpüla aluwatawaa saaʼu Israel? Pipiraja seita türa suʼuwakat paaʼa, puʼuneechika nümaʼanamüin Jesé chi betlemitakai, taneeküichipa wanee nüchon süpüla aluwatawaa» (1 Sam. 15:34, 35; 16:1).

²⁶ Nnojotsü choʼujaain wayuu nümüin Jeʼwaa süpüla nikeraajüin tü nünüikikat. Süka naleʼeruʼuin na wayuukana tü kaainjalaakat, eeshii süpüla moonooloin naya nümaa Maleiwa süchikijee paala jüüjüüin naya nümüin. Niʼrüire wayumüin wanee wayuu eekai nüneeküin Maleiwa süpüla wanee aʼyatawaa, nüchajaain wanee niiʼiraka. Müshijeseʼe nuuʼulaain suulia aʼyalajaa chi laülaakai Samuel naaʼu Saúl jee oʼunushi nia Belénmüin nipialuʼumüin Jesé süpüla niʼyotuinjatüin seita saaʼu nikii chi aluwataainjachikai. Niʼrakalaka kojuyain na nüchonniikana Jesé sümaa anapüijüin naya, jaʼyasü naaʼu anain naya süpüla aluwatawaa. Nüküjapejeʼe Jeʼwaa nümüin Samuel nnojoluinjatüin shiain jülüjain naaʼin tü kasa niʼrakat (paashajeʼera 1 Samuel 16:7). Nüntinnakalaka joo David, chi nüshalenkai Jesé, ¡niainjaʼa nüneeküin Jeʼwaa chii!

27. (1) ¿Kasa kooʼomüinka atumaa nunoula Samuel wanaa sümaa laülaachon nia? (2) ¿Kasa kamalainka pümüin sünain nukuwaʼipa Samuel?

²⁷ Laülaachonpa Samuel niʼrüin anain maʼin tü naaʼinrakat Maleiwa soʼu niʼitaain David niiʼiraka Saúl. Nuuʼulaain Saúl sumojujaain nukuwaʼipa sutuma achumujaaka, nuʼuteein saaʼin wayuu otta akaaʼinraashi nuulia Jeʼwaa. Naatajatsa nukuwaʼipa David süka yalayalain naaʼin, kanoulashi nia otta waneepiashi nia nümaa Maleiwa. Akaʼaya Samuel, katchinsü maʼin nunoula laülaapa nia. Niʼrüin eein süpüla nükaaliinjain waya Jeʼwaa mojule waaʼin jee sülatüle wanee kasa wamüin. Anakuwaʼipaleena waya nutuma Jeʼwaa jaʼitairü weʼrüin wamüliala paala. Aʼyalajüsü maʼin tü wayuukalüirua wanaa sümaa outuin Samuel, malaaka joo anain maʼin tü kasa naaʼinrakat, eeshi maʼaka 100 juya nia sünain anain maʼin tü niʼyataainkat nümüin Jeʼwaa. Anasü maʼin wasakireʼerüle waaʼin sünain tüü: «¿Tashateetche sukuwaʼipa nunoula Samuel?».