Anasü maʼin tü outkajawaakat miyoʼu aainjünaka soʼu 2020. Akürawaajünüsü shia jee eʼitaanüsü shia suluʼu Internet. Nnojotpuʼusü maajüin shia. Na wawalayuu kepiakana chaa Malaui otta Mozambique, naapajüin otta neʼrüin tü outkajawaakat miyoʼu mayaainjeʼe nnojoluin eein Internet namaʼana. ¿Jamüsü sukuwaʼipa natuma?

 Anasü namüin na wawalayuu aʼyataakana suluʼu Comité de Coordinadores otta Comité de Enseñanza sülatinnüin tü outkajawaakat miyoʼu suluʼupünaa telewisoot jee raawia. Tia süpülajatü naapajüin shia na wawalayuu kepiakana chaa Malaui otta Mozambique. Aainjünüsü tia süka kojutuin maʼin tü Internetkat chaa Malaui, palit na wawalayuu eekana süpüla nawalaajüin shia. Anuu nünüiki chi wawalakai William Chumbi, jülüjakai aaʼin tü aʼyatawaakat suluʼu tü Weteet chakat Malaui: «Shia neʼe suluʼupünaa telewisoot jee raawia eeka süpüla sülatinnüin tü pütchi akatchinrüinjatkalü atuma nanoula na wawalayuukana». Anuu joo tü nümakat chi wawalakai Luka Sibeko, wanee jülüjakai aaʼin tü aʼyatawaa aainjünakat suluʼu tü Weteet chakat Malaui: «Palitchonjeena neʼe na wawalayuu aapajakana tü outkajawaakat miyoʼu yaa Malaui nnojorüle sülatinnüin suluʼupünaa telewisoot jee raawia». Müsia nee tü alatakat namüin na wawalayuu chakana Mozambique, wainma na nnojoliikana eein Internet namaʼana jee serulaat anaka süpüla nanajüin tü outkajawaakat miyoʼu apünüinka kaʼi.

 Sutuma tü ayuuliikat COVID-19, akumajünüsü sukuwaʼipa süpüla sülatinnüin suluʼupünaa telewisoot jee raawia tü outkajawaa aainjünakat semaanawai. a Süpüla sülatinnüin tü outkajawaakat miyoʼu suluʼupünaa telewisoot jee raawia, aashajaashii na wawalayuukana namaa na wayuu aʼyataakana suluʼu.

 Eesü wanee kasa kapüleeka maʼin namüin na wawalayuu chakana Malaui. Jamüsüjaʼa niʼitaale wanee wayuu wanee pütchi suluʼupünaa raawia jee telewisoot, nnojotsü alatüinjatüin shia suulia wanee oora, süka jamüin, eein süpüla sukulajaain naaʼin na aapajakana shia kamaʼale maʼin shia. Naküjainjeseʼe na wawalayuukana namüin na aʼyataakana suluʼu raawia jee telewisoot, aneerüin nakuwaʼipa na wayuukana sutuma tü pütchi alatinnajatkat. Süka müitpain joo wakuwaʼipa sünain süttüin waya, waküjain namüin na wayuukana wanee pütchi suluʼuka tü Bibliakat anaka atuma nakuwaʼipa jee talataka atuma naaʼin sümaa napüshi. Naapapa shia na wayuu aʼyataakana suluʼu, anasü namüin sülatinnüin tü outkajawaakat miyoʼu suluʼupünaa telewisoot jee raawia.

 Anajünüsü tü outkajawaakat miyoʼu chaa Malaui suluʼupünaa telewisoot jee aapajünüsü shia suluʼupünaa wanee misoora, wainma maʼin na wayuu aapajakana shia. Müsia nee sukuwaʼipa chaa Mozambique, anajünüsü tü outkajawaakat miyoʼu suluʼupünaa telewisoot jee aapajünüsü shia suluʼupünaa 85 misoora.

 Süpüla sülatinnüinjatüin suluʼupünaa telewisoot tü outkajawaakat miyoʼu chaa Mozambique jee Malaui, awalaajünüsü 28.227 dólar. b Süpüla sülatinnüinjatüin suluʼu kojuyasü misoora awalaajünüsü maʼaka 20.000 dólar. Awalaajünüsü 15 dólar süpüla sülatinnüinjatüin tü outkajawaakat miyoʼu suluʼupünaa waneirua pueulo otta 2.777 dólar süpüla sülatinnüinjatüin suluʼupünaa wanee misoora aapajünaka sainküin tia mmakat.

 Anasü maʼin sukuwaʼipa natuma na wawalayuukana tü nneerü asülajünakat. Jamüsüjaʼa chaa Malaui aashajaashii na wawalayuukana namaa na aʼyataakana suluʼu raawia jee telewisoot süpüla nnojoluinjatüin wainmain nachekajüin. Sutuma tia, apütaasü napüla 1.711 dólar. Nnojotsü wainmain nneerü achekajünaka namüin na wawalayuukana chaa Mozambique, süka jamüin, anain maʼin nakuwaʼipa otta nawalaajamaatüin süliapala wanee kasa.

 Talatüshii maʼin na wawalayuukana süka nanajüin tü outkajawaakat miyoʼu suluʼupünaa telewisoot jee naapajüin suluʼupünaa raawia. Anuu nünüiki Patrick, wanee laülaashi suluʼu wanee outkajaalee chaa Malaui: «Waapüin analuʼut namüin na Laülaashii Jülüjakana Aaʼin na Aküjaliikana pütchi saaʼu tü kasa anasü naainjakat wapüleerua soʼunnaa ayuuliikat tüü». Anuu nünüiki Isaac, chejeʼewai nia Malaui: «Sutuma nnojoluin eein wamaʼana serulaat, talatüshii maʼin waya watüjaapa saaʼu eein süpüla waapajüin tü outkajawaakat miyoʼu suluʼupünaa raawia. Süka müin sukuwaʼipa natuma na wawalayuukana, saapajüin tapüshi süpüshuaʼa tü outkajawaakat miyoʼu. Wayaawata aaʼu sükajee tüü, aishaatain maʼin waya nüpüla Jeʼwaa».

 Anuu sünüiki wanee wayuu palajatka sukua sünain tü outkajawaakat miyoʼu aainjünaka soʼu 2020 chaa Mozambique: «Sutuma wanajüin tü outkajawaakat miyoʼu suluʼupünaa telewisoot, tayaawata aaʼulu niain Jeʼwaa chi Maleiwa Pülashikai maʼin, nnojotsü kasain isain nüchiki. Mayainjee eein tü ayuuliikat ayatüsia naapüin wamüin Jeʼwaa tü katchinjatkalü atuma wanoula. Tatüjaa aaʼulu shiimain alin nüpüla Jeʼwaa na wayuu aʼyataakana nümüin. Tayaawata aaʼu tüü shiain tü nupueulosekat Jeʼwaa».

 Anuu nünüiki Wyson, wanee laülaashi suluʼu tü outkajaaleekat: «Taapüin analuʼut namüin na Laülaashii Jülüjakana Aaʼin na Aküjaliikana pütchi saaʼu jülüjain waya naaʼin soʼunnaa ayuuliikat tüü. Mayainjee nnojoluin wainmain nneerü wamaʼana, wanajüin tü outkajawaakat miyoʼu suluʼupünaa telewisoot jee waapajüin shia suluʼupünaa raawia. Wountuin tia sutuma tü naainjakat na wawalayuukana wapüleerua. Anasü maʼin wakuwaʼipa sutuma tü waapajakat».

 Na wawalayuu aʼyataakana suluʼu Comité de Coordinadores otta Comité de Enseñanza, nakumajüin sukuwaʼipa süpüla nanajüin na wawalayuukana suluʼupünaa telewisoot jee naapajüin suluʼu waneirua misoora tü outkajawaakat miyoʼu süpülajatka 2021. ¿Jalejeekuwat tü nneerü nawalaajakalü aka tia? Shia süpüshi tü nneerü nasülajakat na wawalayuukana sainküinpünaa tü mmakat. Aluwataanüsü shia suluʼupünaa donate.mt711.com. ¡Anasia müin jutuma jüsülajüin nneerü!