Waaʼinrajatka süpüla talatüin waaʼin
Talateesü waaʼin wapüshuaʼa jaʼitainna maʼwayuusein, kaʼwayuusein, tepichin jee laülaayuuin waya. Keeʼireesia shia naaʼin Maleiwa wapüleerua. Makalaka nüküjain wamüin tü waaʼinrajatkat süpüla talatüin waaʼin.
Tütü waya sünain aʼyatawaa
«Anashi müleka niʼyataale [wanee wayuu] süpüla tü niküinjatkat aaʼu je süpüla tü nümüliajiainjatkat wayuu eekai müliain» (ÉFESO 4:28).
Nüküjain wamüin chi Kakumajalakai waya anainjatüin tü jülüjakat waaʼin süchiki tü waʼyataainkat. Talatüsü naaʼin wanee wayuu eekai tütüin sünain aʼyatawaa süka nütüjaain saaʼu niʼyataain nüpüleerua jee süpüleerua nüpüshi. Eeshia nia süpüla nükaalinjain na waneinnua sükajee niʼyataain. Kojuteechi nia nümüin chi nülaamainkai otta nnojoleechi nia ojutunuin suulia niʼyataain. Saashin tü Nünüikikat Maleiwa nüsülajala wamüin Maleiwa tü waʼyataainkat (Eclesiastés 3:13).
Loto wakuwaʼipa
«Anasü saaʼin wamüin tü waaʼinrapüʼükat, süka waaʼinreein waneepia tü kojutkat atüma Maleiwa» (HEBREOKANA 13:18).
Lotule wakuwaʼipa, kojutujiraashii waya wamüinjiraa otta anasü waaʼin. Nnojotsü shapaakuʼu müin waaʼin sünainjee waaʼinrüin kasa mojusü. Neʼitaain naaʼin na waneinnua wanain jee kojutushii waya namüin. Chi wayuu nnojoikai lotuin akuwaʼipa, eʼreechi kasa mojusü sünainjee. Mojeerü naaʼin otta jülüjeerü naaʼin eein süpüla sütüjaanüin aaʼu mapa tü kasa mojusü naaʼinrakat.
Nnojo sülanaʼaleein wamüin sujutu tü nneetkat
«Anakaja müleka nnojoliire keeʼireein jaaʼin washirüü. Shia anaka aluʼu müleka talatüle neʼe jaaʼin waneʼewai jukua sümaa tü eekai eein jümaʼana» (HEBREOKANA 13:5).
Choʼujaasü nneerü wamüin süpüla wayaʼlajüin tü weküinjatkat otta tü kasa choʼujaakat wamüin. Keeʼireere waaʼin wainmeein kasa wamaʼana, eesü süpüla nnojoluin süpütaain kaʼi wapüla, mapüsain waya, ayuulin waya, sumojujaain wakuwaʼipa sümaa waʼwayuuse otta nnojoluin walatirüin kaʼi namaa wachonnii (1 Timoteo 6:9, 10). Wanee wayuu eekai keeʼireein naaʼin wainmeein kasa nümaʼana, eesü süpüla nnojoluin lotuin nukuwaʼipa sünainjee. Anuu nünüiki wanee wayuu kekiikai maʼin: «Chi wayuu waneepiakai nümaa Maleiwa, aapüneechi amüin kasa anasü, akaajasaʼa chi wayuu keeʼireekai aaʼin washirüü, aaʼinreechi kasa mojusü sünainjee» (Proverbios 28:20).
Wekirajaa sünain tü aneetkalü atuma wakuwaʼipa
«Kojuta pümüin tü kekiwaakat otta piyaawata saaʼu tü paaʼinrüinjatkat» (PROVERBIOS 3:21).
Anasüyaajee tü ekirajawaakat suluʼu koleejia, süka jamüin, eein süpüla wousütüin sünain aʼyatawaa wepijaainjatka aaʼu otta tü shipijaainjatkalü aaʼu wachonnii. Nnojoleetpejeʼe shiain neʼe anain atuma wakuwaʼipa jee talatüin atuma waaʼin. Süpüla anainjatüin wakuwaʼipa choʼujaasü wamüin nikirajüinjanain waya Maleiwa. Anuu nünüiki Maleiwa nüchiki chi wayuu oonookai sümaa nünüiki: «Aneerü sukuwaʼipa süpüshuaʼa tü kasa naainjakat» (Salmo 1:1-3).
Eesüjaʼa kamalainjeerüle pümüin aashajeʼeraa tüü
AAPIRIA WAYUU
¿Kasa talateetka atuma paaʼin sünain piʼyataain?
Pikirajaa sünain piamasü kasa aküjünaka suluʼu tü Wiwüliakat süpüla talatüinjachin pia sünain piʼyataain.
¡EEJA WAAʼIN!
Wopu talataka atuma waaʼin: Talatüinjatü waaʼin sümaa tü eekat wamaʼana otta asülajüliinjana waya
Naashin wainma wayuu, talateerü waaʼin otta aneerü wakuwaʼipa washirüle waya. ¿Shiache talateetka maʼin atuma waaʼin tia? ¿Jamüsü nakuwaʼipa na kachiiruakana aaʼin tü washirüükat?
