Anasüjeʼe sukuwaʼipa wayuu süpüshuaʼa eere wanee aluwataakai saaʼu mmakat süpüshuaʼa. Jamüsüjaʼa maaʼulu yaa, eeshii na müliakana otta eeshii na anakana. Müleka eere wanee aluwataai eekai nümülialaain aaʼin saalin wayuu süpüshuaʼa, naapüinje süpüshuaʼa tü kasa choʼujaakat sümüin wayuu. ¿Nounteetche makat aka tia na aluwataashiikana saaʼu mmakat maaʼulu yaa? (Paashajeʼera Jeremías 10:23.)

Nnojoyülia anain sukuwaʼipa wayuu natuma na aluwataashiikana saaʼu mmakat. Ayatüsia maʼletsein wayuu. Otta müsia, eeshii aluwataashii eekai müliain wayuu natuma (Eclesiastés 4:1; 8:9). Aluʼujasaʼa chi aluwataai nüküjakai achiki Maleiwa, naaʼinmajeerü wayuu otta najaʼttireerü süpüshuaʼa tü aluwataaya eekat maaʼulu. (Paashajeʼera Isaías 11:4 otta Daniel 2:44.)

Nüneeküin Jeʼwaa Jesukürisüto, chi Nüchonkai süpüla aluwatawaa. Süka jamüin, niain neʼe anain süpüla aluwatawaa (Lucas 1:31-33). Jamüshijaʼa wanaa sümaa yaajachin nia yaa mmapaʼa, nükaaliinjain wayuu. Süka Nuluwataaichipain maaʼulu yaa, paaʼinwajiraajeerü wayuu nutuma otta najaʼttireerü tü müliakalü atuma saaʼin wayuu. (Paashajeʼera Salmo 72:8, 12-14.)

Nnojotsü sücheküin wayuu süpüshuaʼa niainjachin Jesuu aluwataain. Mayaapejeʼe müin nakuwaʼipa naya makana, naʼatapajüin Jeʼwaa nayaawajaainjanain suulia naainjala (2 Pedro 3:9). Alüʼütsü maʼin sükalia süpüla najaʼlajeʼerüinjanain Jesuu na mojulaashiikana otta süpüla eeinjatüin wanee anaa nutuma suluʼu mmakat süpüshuaʼa. (Paashajeʼera Miqueas 4:3, 4.)