Kaainjalashi wanee wayuu sükajee tü suchuntakat naaʼin jee tü jülüjakat naaʼin, nnojorüle pansaain shia sümaa tü keeʼireekat naaʼin Maleiwa (1 Juan 3:4; 5:17). Süküjain tü Bibliakat maʼaka waaʼinrüle tü kasa mojusükat noʼuluʼu Maleiwa, kaainjalashii waya (Santiago 4:17).

 Suluʼu tü pütchikat hebreo sümaa griego «kaainjalaa» shia wanaa sümaa nuʼtchejaale wanee wayuu sümaa wanee kasa. Jamüsüjaʼa suluʼu tü Bibliakat ashajünüsü nachiki waneinnua surulaat chejeʼewalii Israel atüjakana maʼin süpüleerua tü junaayakat nnojotpuʼusü kasain noʼtchejaain süka neʼitaapa wanee kasa. Suluʼu waneirua ashajuushi müsü «maainjalapuʼushii naya» (Jueces 20:16, Nueva Biblia Española). Müsüjeseʼe kaainjalashi wanee wayuu nuʼtchejaale sümaa tü nuluwataakalü anain Maleiwa.

 Nia neʼe Maleiwa aküjaka tü waaʼinrajatkat süka niain chi Kakumajalakai waya (Alateetkat Mapeena [Apocalipsis] 4:11). Asouteena waya nümüin saaʼujee waneʼewai sukua tü kasa waaʼinrakat (Roma 14:12).

¿Eesüche süpüla maainjalain wanee wayuu?

 Nnojo. Saashin tü Bibliakat «kaainjalain wayuu ütamüinreʼeya nuulia Maleiwa je sükatalaain suulia tü kasa anasü nüchekakat süpüleerua» (Roma 3:23; 1 Reyes 8:46; Eclesiastés 7:20; 1 Juan 1:8). ¿Jamüsü kaainjalaka wayuu süpüshuaʼa?

 Sümaiwa paala nnojoishi kaainjalain Adán sümaa Eva süka anakuwaʼipaliin maʼin naya maʼaka naaʼin Maleiwa (Génesis 1:27). Nnojotpejeʼe müin nakuwaʼipa waneepia süka nnojoluin noonooin nümaa Maleiwa (Génesis 3:5, 6, 17-19). Sutumajee naleʼeruʼuin süchiki kaainjalaa nalatirüin shia namüin na nachonniikana (Roma 5:12). Maʼaka nüküjain shia chi aluwataaikai David «joʼuujiraashi taya sümaa kaainjalaa» (Salmo 51:5).

¿Jamüsü mojuleeka naainjala wanee wayuu nuulia wane?

 Suluʼu tü Bibliakat süküjain nachiki na wayuu chajanakana suluʼu tü mmakat Sodoma «wayuu mojulaashaatasü maʼi, wayuu kaainjarat waneepia nuʼupala Jehová» (Génesis 13:11; 18:20). Wekirajaa sünain apünüinsü kasa mojuka nümüin Jehová kaainjalaka atuma wanee wayuu.

1.   ¿Kasa mojuka maʼin? Saashin tü Bibliakat nnojoluinjana waya sünainpünaain tü amaʼüjirawaakalü akuwaʼipaa, kamaleiwaseyaa, aʼluwajaa, epeʼruwaa, emeejaa sukorolo wayuu, oʼutaa saaʼin wayuu jee ooʼulakiraa (1 Corinto 6:9-11; Alateetkat Mapeena 21:8). Aküjünüsü suluʼu tü Bibliakat eeshi süpüla kaainjalain wanee wayuu sümaa nnojoluin nücheküin shia maʼaka saaʼin mojule nünüiki nümüin waneʼeya (Proverbios 12:18; Éfeso 4:31, 32). Süküjain tü Bibliakat nnojoluinjatüin anajüin wamüin tü kaainjalakat süka eein süpüla waaʼinrüin wanee kasa eeka mojuin maʼin (Mateo 5:27, 28).

2.   Müleka aleree naaʼin. Eeshii wayuu kaainjalaka sutuma nnojoluin neʼraajüin tü nuluwataakalü anain naya Maleiwa (Aluwataaushikana 17:30; 1 Timoteo 1:13). Süküjain tü Bibliakat süsaleenain naainjala na wayuu eekana kaainjalain nayaleekajaʼa na wayuu kaainjalaka sümaa natüjaain saaʼu tü nnojotkalü anain nümüin Maleiwa (Números 15:30, 31). Süküjain tü Bibliakat chi wayuu aaʼinraka wanee kasa mojusü sümaa nütüjaain saaʼu mojuin shiaʼala nia wanee wayuu mojulaashi (Jeremías 16:2).

3.   Jeʼratuain sukua. Saashin tü Bibliakat nnojotsü wanaawain nukuwaʼipa chi wayuu kaainjalaka uwatua nuulia chi wayuu nnojoika ooʼulaweein suulia kaainjalaa (1 Juan 3:4-8). Eere wanee wayuu atüjaakai saaʼu tü kasa anasükat jee kaainjarale niaʼala süsaleechi nia nutuma Maleiwa (Hebreokana 10:26, 27).

 Mojushaanasü maʼin naaʼin na wayuu aaʼinrakana wanee kasa eekai mojuin maʼin. Jamüshijaʼa chi aluwataaikai David müshi nia: «Jülüjasü maʼin taaʼin tü taainjalakat müsü aka saaʼin wanee tachise eeka jawatüin maʼin tamüin» (Salmo 38:4). Aneetpejeʼe waaʼin sutuma pütchikat tüü: «Acheküshi nuʼwanajaain nukuwaʼipa chi eekai mojulaain otta nuuyantaain nüchikuaʼa nünainmüin Jehová, amüliajüneechi nia nutuma chi Wamaleiwasekai süka motuin naaʼin saainjala wayuu» (Isaías 55:7).