Pe áño de servísio 2021-pe a hetaiterei hénte ko múndo tuichakuére ohasaʼasyeterei kuri pe COVID-19 káusare. Ojeʼe haguéicha pe artíkulo héravape “Ajúda oñemeʼẽva ko pandémia aja”, oñembohovái hag̃ua ko situasión ijetuʼuetéva ojegasta millones de dólares b ha avei ojejapo mas de 950 Komite de Sokórro.

 Pe pandémia aja oiko avei heta ótro sarambi, tahaʼe umi desástre naturál térã umi yvyporakuéra káusare oikóva. Ha umíva avei ohupyty ñane ermanokuérape. Upévare pe Komite de Koordinadór del Kuérpo Governánte oaprova ojepuru hag̃ua avei 8 millón de dólar oñembohovái hag̃ua umi mas de 200 sarambi oiko vaʼekue ko múndo tuichakuére. Jahechamína mbaʼéichapa ojepuru umi kontrivusión mokõi sarambi ramoite oiko vaʼekuépe.

 El 22 de mayo de 2021 pe volkán Nyiragongo oĩva República Democrática del Cóngope oñepyrũ okapu, pe láva osyrýva pe volkángui ombyai hetaiterei óga, eskuéla ha peteĩ lugár y oñeñongatuhápe. Péro upépe ndopái, síno heta díare pe volkán opoi tanimbu oporombyaíva pe siuda hérava Goma ári. Ha avei oĩ kuri heta yvyryrýi. Upévare, alamita rasa oĩ vaʼekue upe siudápe osẽ vaʼerã kuri upégui, ha oĩ voi og̃uahẽva Ruanda peve.

 Umi osẽ vaʼekue pe suidágui apytépe oĩ voi 5000 testígo de Jehová rupi. Upépe oĩ vaʼekue umi ermáno operdéva hóga pe volkán okapu rire, ha oĩ avei umi oñemondapa vaʼekue chugui ikosakuéra ndaipóri aja hikuái hógape. Umi Komite de Sokórro oĩva Ruanda ha República Democrática del Cóngope ombaʼapo oñondive. Pe Sukursál Congopegua oñeʼẽ peteĩva umíva umi Komitére: “Sarambikuépe oĩramo jepe pe siuda, ha ojeʼe mboyve oñesẽ vaʼerãha upégui, pe Komite oñepyrũma orreparti tembiʼu, y, savana ha ao”. Peteĩ siudápe oho voi vaʼekue mas de 2000 ermáno, upépe pe Komite de Sokórro omoĩ umi óga kárpa, omeʼẽ chupekuéra tapavóka, ha heʼi chupekuéra mbaʼépa ojapokuaa ani hag̃ua ojagarra chupekuéra pe COVID-19 térã cólera.

 Tres mésepente umi ermanokuéra orrepartíma 6 toneláda arrós, 6 toneláda avati kuʼi, 8000 lítro ári aséite ha 8000 lítro ári y. Ha ani hag̃ua ojegasta hetaiterei pláta pe Sukursál ojogua umi tembiʼu heta heta upe paísgui ani hag̃ua ogastaiterei oguerúvo ótro ládogui.

 Peteĩ ermána heʼi: “Ore ningo rohasa asyeterei kuri”, haʼe ningo operde kuri hóga pe volkán káusare péro ifamíliape ha chupe oñepytyvõ kuri pyaʼe, físika ha espirituálmente. Koʼág̃a haʼe heʼi: “Jehová rupive ningo koʼág̃a roguerekóma umi mbaʼe roikotevẽva, rohecha porãiterei mbaʼéichapa haʼe ore pytyvõ ikatu hag̃uáicha ifasilve oréve rombohovái hag̃ua koʼã situasión ijetuʼuetéva”.

 Heta áñorema ningo Venezuélape ipoʼi hague la pióla. Ofaltapa la tembiʼu ha hetave umi delinkuénte ha ñane ermanokuérape g̃uarã ijetuʼueterei upéva. Péro Jehová organisasión ndohejareíri chupekuéra.

 Pe áño de servísio ohasa vaʼekuépe, ojegasta mas de 1 millón imédio de dólar ojejogua hag̃ua tembiʼu ha havõ, ikatu hag̃uáicha oñepytyvõ umi família oikotevẽvape. Pe sukursál Venezuelapegua oexplika: “Ijetuʼueterei ningo ojegueraha hag̃ua 130 toneláda tembiʼu káda mes pe país tuichakuére ikatu hag̃uáicha oñemog̃uahẽ umi ermanokuéra oikotevẽvape”. Umi ermanokuéra oguerahaka umi tembiʼu noñembyaipyaʼéiva. Ha pe Sukursál heʼive: “Umi tembiʼu ojejoguáva ningo haʼe umi ojeprodusíva upe épokape, ha ojejogua heta heta ikatu hag̃uáicha osẽ varatove oréve. Upéi rogueraha umi tembiʼu ivaratoveháicha oréve”.

 Leonel, oservíva pe Komite de Sokórro oĩva Venezuélape heʼi ogustaitereiha chupe la iñasignasión, Haʼe omombeʼu: “Ambaʼapo jave umi lavór de sokórrope, haʼe peteĩ mbaʼe iñimportantereíva chéve g̃uarã. Chepytyvõ ikatu hag̃uáicha añeñandu porãve che rembireko omano rire COVID-19 káusare. Siémpre areko rupi álgo ajapo vaʼerã. Añandu ikatuha aipytyvõve umi ermáno oikotevẽvape. Ahecha cheresa teérupi mbaʼeichaitépa Jehová okumpli pe promésa ojapo vaʼekue ndohejareimoʼãiha ipuévlope”.

 Peteĩ ermáno yma ombaʼapo vaʼekue pe Komite de Sokórrope omombeʼu: “Koʼág̃a ningo cheháma aikotevẽ chepytyvõ vaʼerã. Umi ermanokuéra ndahaʼéi kósa materiálpente la ore pytyvõ kuri. Síno avei oipytyvõ che rembirekópe ha avei chéve ikatu hag̃uáicha roime pyʼaguapýpe. Haʼekuéra oñatende ore rehe, orekonsola ha oremokyreʼỹ”.

 Oĩ ningo umi sarambi oikóva derrepentete, upéicharõ jepe Jehová organisasión pyaʼe okonsegi ha omeʼẽ umi provísta ha upéva ojehupytykuaa umi kontrivusión peẽ pemeʼẽva rupive pe óvra mundiálpe g̃uarã. Pe páhina donate.mt711.com-pe ikatu petopa mbaʼéichapa pe kontrivuikuaa. Roagradeseterei ningo peẽme pende pojera haguére.