NUEVE áño pevénte akakuaa vaʼekue, koʼág̃a arekóma 43 áño ha un métronte areko. Upéva chedesanima vaʼekue, upéicha rupi che tuvakuéra heʼi chéve aheka hag̃ua algún traváho ani hag̃ua apensaiterei che situasiónre. Upémarõ añepyrũ avende frúta che róga fréntepe, ha che lokál siémpre ipotĩ asy rupi, chekliénte heta vaʼekue.

Péro ambaʼapóramo jepe, nokambiái la che situasión. Heta mbaʼe ijetuʼu chéve chemichĩeterei rupi. Por ehémplo, aha jave ambaʼejogua ndahupytýi ni pe mostradór. Opa mbaʼe oĩva haʼete voi ojejapóva umi hénte ijyvatévape g̃uarãnte, ha upéva chemoñeñandu vaieterei vaʼekue. Péro arekórõ guare 14 áño, oiko peteĩ mbaʼe okambia vaʼekue che rekove.

Peteĩ día, mokõi testígo de Jehová ohasakuévo og̃uahẽ ojogua chehegui frúta. Upéi oporandu chéve hikuái ndastudiaséipa la Biblia, ha che aasepta. Haʼekuéra chepytyvõ ani hag̃ua apensaiterei che situasiónre, ha chemboʼe iñimportanteveha añemoag̃ui Jehováre. Upéva tuicha cheanima. Pe téxto chegustavéva haʼe Salmo 73:28, pe primera párte heʼi: “Che añemoag̃ui Ñandejárare, ha ndaipóri iporãvéva upévagui”.

Upe tiémpope aiko che hentekuérandi Costa de Marfílpe, upépe che vesinokuéra chekuaapa ha ojepokuaáma cherecha. Péro rovárõ guare Burkina Fásope oĩvante omañamba cherehe chemichĩeterei haguére, ha upévare ni nasẽsevéi ógagui. Upéinte chemanduʼa mbaʼeichaitépa añeñandu porã vaʼekue aaprendérõ guare Jehovágui. Upémarõ amondo peteĩ kárta Betélpe, ha peteĩ día og̃uahẽ oúvo cherendápe móto ári peteĩ misionéra ikalidaitereíva hérava Nani.

Upe tiémpope, che róga rape yvy rei memete vaʼekue ha oky jave katu tujúmante oĩ opárupi. Nani heta vése hoʼa vaʼekue imóto árigui oukuévo ógape, upéicharõ jepe noñentregái voi. Peteĩ día cheinvita aha hag̃ua hendive Salónpe. Ndaikuaái kuri mbaʼépa haʼéta chupe, pórke atĩ oñemañambárõ g̃uarã cherehe, ha Nánipe ijetuʼúta kuri avei omaneha hag̃ua ahárõ ijapýri. Péro amo ipahápe haʼe chupe ahataha hendive. Pe téxto chegustavéva chembopyʼaguasu kuri upearã. Pe segúnda pártepe heʼi voi: “Che añemoag̃ui Jehováre cheprotehe hag̃ua”.

 Heta vése roʼámi tujúpe rohokuévo rreunionhápe, péro upéva ndahaʼéi vaʼekue mbaʼeve oréve g̃uarã, pórke romombaʼeterei umi rreunión. Kállere oñemañambámi cherehe chediferénte haguére, rreunionhápe katu ermanokuéra hory joa chéve. Upéva chemoñeñandu porãiterei ha nueve mése haguépe ajevautisa.

Pe téxto chegustavéva opakuévo heʼi: “Che amombeʼúta opa mbaʼe haʼe ojapo vaʼekue”. Péro che aikuaa ijetuʼutaha chéve asẽ hag̃ua apredika ogahárupi. Asẽrõ guare primera ves, umi mitã ha kakuaa omañamba cherehe, chesegi, cheraʼanga hikuái ha opuka cherehe. Upéva chemoñeñandu vaieterei. Péro aikuaa umi hénte oikotevẽha avei esperánsa, ha upéva chemokyreʼỹ jey asegi hag̃ua.

Ifasilve hag̃ua chéve asẽ predikasiónpe, ajogua peteĩ trisíklo ikatúva apedalea che pópe. Oĩ jave peteĩ arriváda, che kompañéra omyaña chéve la che trisíklo, ha vahádape katu ojupi che apýri. Ñepyrũrã ijetuʼu kuri chéve asẽ hag̃ua predikasiónpe, péro upéi chegustáma. Upémarõ, 1998 guive ajapo che prekursorádo rregulár.

Ambostudia vaʼekue la Biblia heta persónape, ha umívagui cuatro ojevautisa. Péro la chembovyʼave vaʼekue, peteĩ che ermánagui oiko avei Testígo. Sapyʼánte añedesanima jave, avyʼaiterei ha chemokyreʼỹ aikuaávo mbaʼéichapa hetave hénte oñemoag̃ui ohóvo Jehováre. Por ehémplo, añepyrũ vaʼekue ambostudia la Biblia hóga renondépe peteĩ mitãrusu ohóvape universidápe. Upéi ajerure peteĩ ermánope osegi hag̃ua ombostudia chupe. Tiémpo rire, ko mitãrusu ova Costa de Marfílpe. Peteĩ día cherasyetérõ guare akãnundu roʼýgui, og̃uahẽ chéve peteĩ kárta Costa de Marfílgui ha oñemombeʼu chéve upe mitãrusúgui oikomaha puvlikadór, ha chembovyʼaiterei upe notísia.

Peteĩ organisasión oipytyvõva umi orekóvape algúna diskapasida, chemboʼe ambaʼapo hag̃ua kostúrape ikatu hag̃uáicha chete voi añemantene. Peteĩ profesóra upepegua ohechakuaa cheguapaitereiha ha orrekomenda chemboʼe hag̃ua hikuái ajapo hag̃ua havón. Péicha añepyrũ ajapo havón de lavár ha havón de olór ha che rogaitépe voi ambaʼapo. Che klientekuérape ogustaiterei la havón ajapóva, upévare orrekomenda avei ótrope. Areko peteĩ móto de tres rruéda ha upévape arreparti umi pedído.

Upéi áño 2004-pe aju cherasykatu, che lómo rasyeterei ha ahejámante che prekursorádo. Ambyasyeterei ningo, péro siémpre añehaʼã ajapo la ikatumíva predikasiónpe.

Umi chekuaáva siémpre cherecha apukavyháre aikoha. Che ningo avyʼaiterei añemoag̃ui rupi Ñandejárare, ha chéve g̃uarã ndaipóri iporãvéva upévagui. (Omombeʼu Sarah Maiga.)