HAʼETÉPA ndéve rehasahareína Guillermo térã Raquel ohasáva? Mokõivéva oñemongetase, péro nosẽporãi jepi hikuái. Mbaʼérepa?

Kuimbaʼe ha kuña nopensái peteĩcha, idiferénte ojuehegui omombeʼu jave hemiandu. Kuñanguéra omombeʼu porãse umi mbaʼe oñandúva ha pyʼỹive avei. Umi kuimbaʼe katu oñehaʼãnte pyaʼe osolusiona umi provléma oiko porã jey hag̃ua ha noñeʼẽséi umi mbaʼe ijetuʼuvévare. Upéicharõ, mbaʼépa ikatu pejapo ani hag̃ua koʼã mbaʼe pendejoko peñemongeta hag̃ua? Upearã tekotevẽ mokõivéva pejorrespeta.

Umi opororrespetáva omombaʼe hapichakuérape ha oñehaʼã ontende mbaʼéichapa oñeñandu. Ikatu nde tuvakuéra nemboʼerakaʼe nemitãme rerrespetavaʼerãha umi orekóvape autorida térã ijedavévape ndehegui. Péro remenda vove rerrespetamavaʼerã peteĩ ndeichaguápe, ha upéva sapyʼánte ijetuʼu. Linda, ojapómava ocho áño omenda hague omombeʼu: “Felipe ningo ohendukuaa ha imbaʼerechakuaa ambue hapichándi. Che aipotánte avei upéicha chetrata”. Ikatuhína nde rehendukuaa ha reñatende erévare ne amigokuérape térã umi reikuaaʼỹvape jepe. Péro retratapareína upéicha ne rembiayhúpe?

Umi ndojorrespetáiva hogapýpe ndaipyʼaguapýi ha pyʼỹinte oiko vai. Peteĩ mburuvicha iñarandúva ohaivaʼekue: “Iporãve mandiʼo nandi jeiko porã reheve, tembiʼu hetágui, ñorairõ reheve” (Proverbios 17:1). Ñandejára Ñeʼẽ heʼi ména omombaʼe térã orrespetavaʼerãha hembirekópe (1 Pedro 3:7). Upéicha avei, “tembireko tomombaʼe iménape” (Efesios 5:33, ÑÑB).

 Upéicharõ, mbaʼéichapa ikatu ména ha tembireko ojorrespeta oñemongeta jave? Jahechamína mbaʼe konséhopa omeʼẽ la Biblia.

Mbaʼe provlémapa oĩ jepi?

Oĩ nohendukuaáiva hapichápe, haʼénte oñeʼẽse. Ndépa ndahaʼéi upeichagua hína? La Biblia heʼi “umi oporombohováiva ohendu mboyve” ivyroitereiha (Proverbios 18:13). Mbaʼérepa tekotevẽ ñahendu raẽ ñande rapichápe ñañeʼẽ mboyve? Katia, ojapómava veintiséis áño omenda hague heʼi: “Che ndaipotái che ména osolusiona upepete umi mbaʼe chepyʼapýva, nahaʼarõi opensa che apensahaichaite ni oheka mbaʼéichapa oñepyrũraʼe umi provléma. Aipotánte cherendumi ha ontende mbaʼépa añandu”.

Avei oĩ heta kuimbaʼe térã kuña otĩva ha noñeʼẽséiva ojejopy jave chupekuéra. Peteĩ kuñakarai omenda ramóva hérava Lorena, ohechakuaa iména mbeguekatúpe omombeʼuha oñandúva. Haʼe heʼi: “Chepasiénsia ha ahaʼarõvaʼerã haʼeténte omombeʼu mbaʼéichapa oñeñandu”.

Mbaʼéichapa oñesolusionakuaa?

Peñeʼẽta jave umi mbaʼe helikádovare, penetrankílo ha mokõivéva peime porã vaʼerã. Mbaʼépa ikatu pejapo peteĩvape hasýramo omombeʼu oñandúva? Penemanduʼavaʼerã la Biblia heʼívare: “Ñande pyʼapypeguáva ku y hypýicha hína, iñakãporãvamante oguenohẽkuaa” (Proverbios 20:5). Pór ehémplo, reguenohẽramo pyaʼeterei y váldepe peteĩ pósogui, oñehẽmba léntota og̃uahẽ mboyve. Upéicha avei reapuráramo ne rembiayhúpe omombeʼu hag̃ua peteĩ mbaʼe, ikatu okyhyje ha ndeʼisevéima mbaʼeve, ha ndereikuaamoʼãi mbaʼépa oĩ ipyʼapýpe. Upévare iporãvéta nepasiénsiaramo ha rembaʼeporandu hendápe porã. Péicha rehechaukáta remombaʼeha chupe.

Ne ména térã ne rembireko oñeʼẽ jave ‘nekyreʼỹvaʼerã rehendu hag̃ua, ha nembeguevaʼerã reñeʼẽ ha ndepochy hag̃ua’ (Santiago 1:19). Umi ohendukuaáva ndahaʼéi ojapysaka reínteva, síno ontende avei hapichápe. Upévare reñehaʼãvaʼerã rehechakuaa ne rembiayhu oñandúva. Avei rehendukuaáramo haʼe ohecháta remombaʼeha chupe.

Jesús ohechauka mbaʼéichapa jajapovaʼerã upéva. Pór ehémplo, peteĩ kuimbaʼe hasýva oñembojárõ guare hendápe oipotágui oipytyvõ chupe, haʼe nomonguerái upepete pe karaípe. Ñepyrũrã ojapysaka hese, ohechakuaa mbaʼéichapa oñeñandu ha upe rire omonguera chupe (Marcos 1:40-42). Ejapókena avei koʼã mbohapy mbaʼe. Nemanduʼavaʼerã ne rembiayhu ndoipotaiha resolusiona upepete voi iprovléma, síno oikotevẽnteha rentende chupe. Upéicharõ, rehendukuaavaʼerã, upéi reñemoĩ ilugárpe ha upe rire ae repensa mbaʼépa ikatu rejapo. Péicha rehechaukáta rerrespetaha chupe.

Mbaʼe provlémapa oĩ jepi?

Linda heʼi avei: “Télepe jahecha jepi mbaʼéichapa ména ha tembireko otaky ha oñembohory ojuehe térã ojoapoʼi hikuái”. Heta hénte okakuaa peteĩ ogapy avave ndojorrespetaihápe. Koʼãichagua tapicha omenda ha ifamília vove, otratase avei péicha hogayguakuérape. Vivian, oikóva Canadápe heʼi: “Akakuaavaʼekue peteĩ ogapýpe oĩháme oñembohorýva ojuehe, ojoguerosapukáiva ha oñomomarkantepáva”.

Mbaʼéichapa oñesolusionakuaa?

Reñeʼẽ jave ne ména térã ne rembirekóndi, tekotevẽ nemanduʼa reiporuvaʼerãha “ñeʼẽ iporãva omombaretéva umi oikotevẽvape, ha oipytyvõva opa ohendúvape” (Efesios 4:29). Upéva heʼise erevaʼerãha umi mbaʼe omomýitava ambue tapichápe orrespeta hag̃ua chupe.

 Peime jave peneaño jepe peñatendevaʼerã ani peñeʼẽ pohýi ojupe. Yma Israélpe, Mical ipochy iména David ndive, ha oapoʼi chupe heʼívo ‘ojoguaha umi tekove otĩʼỹvape’ térã umi iñembotavývape. Otratávo péicha iménape ohechauka ndorrespetaiha chupe ha ombopochy avei Ñandejárape (2 Samuel 6:20-23). Mbaʼépa ñanemboʼe upéva? Ñañemongeta jave ñane rembiayhúndi ñañatendevaʼerãha mbaʼépa jaʼe (Colosenses 4:6, nóta). Felipe, ojapómava ocho áño omenda hague, omombeʼu koʼág̃a peve ojoavy mimiha hembirekóndi. Ko karai ohecha umi mbaʼe heʼíva sapyʼánte ombyaiveha pe provléma. Haʼe heʼi: “Ahechakuaa peteĩva ‘oganáramo’ rojodiskuti jave, mokõivéva tuicha roperde. Ikuentave ñañehaʼãnte jajapo ikatúva guive jajogueraha porã hag̃ua”.

Peteĩ kuñakarai viúda yma guare heʼivaʼekue umi imemby kariaʼy rembirekorépe: ‘Ñandejára tomeʼẽ peẽme pytuʼu pene ména rógape’ (Rut 1:9, ÑÑB). Ména ha tembireko ojotrata porãramo oĩta “pytuʼu” hogapýpe.

Mbaʼe provlémapa oĩ jepi?

La Biblia heʼi umi omendávagui ‘oikoha peteĩntema’. Upéicha rupi heta omenda ramóva oimoʼã mokõivéva opensavaʼerãha peteĩcha ha ojojoguavaʼerãha opa mbaʼépe (Mateo 19:5). Péro ndohopukúi ohechakuaa hag̃ua upéva ndaupeichaiha ha oiko vaíma katu hikuái. Linda heʼi: “Felipe ha che tuicha orediferénte peteĩ mbaʼépe. Pór ehémplo, sapyʼánte haʼe ni michĩmi ndojapurái, ha che katu chetarova potaitéma. Péicha jave chepochyeterei, haʼete ndoúi ni ndohóiva voi chupe mbaʼeve”.

Mbaʼéichapa oñesolusionakuaa?

Jaguerohoryvaʼerã ñane rembiayhúpe umi mbaʼe porã orekóva ha idefékto reheve ha jarrespeta chupe jajoavýramo jepe heta mbaʼépe. Upéva ikatu ñambojoja ñande resa ha ñande apysáre: mokõivévante ideprovécho idiferénteramo jepe ojuehegui. Pór ehémplo, jahasáta jave peteĩ kálle, mokõivéva jaiporu ani hag̃ua ochoka ñanderehe veíkulo. Adriana, ojapómava treinta áño omenda hague, heʼi: “Ndorojoavýima guive Ñandejára Ñeʼẽ heʼívandi ningo oĩ porã, roikuaa voi ikatuha orediferénte heta mbaʼépe. Ore ningo romendáva, péro upéva ndeʼiséi rojojoguavaʼerãha opaite mbaʼépe”.

Ne rembiayhu opensa térã ojapóramo peteĩ mbaʼe nandegustáiva, eñehaʼã entende mbaʼépa oñandu ha emboykeʼimínte ndéve ndegustáva (Filipenses 2:4). Fabian, Adriana ména, omombeʼu: “Heta vése nantendéi térã ndachegustái che rembireko opensáva, péro chemanduʼa iñimportanteveha ahechauka ahayhuha chupe aiko rangue añemohatã che haʼévapente. Haʼe ovyʼáramo che avyʼa avei”.

Ikatu hag̃uáicha akóinte jaiko porã ha javyʼa ñande rogapýpe, tekotevẽ jajorrespeta. Linda heʼi: “Ména ha tembireko oñomombaʼéramo, oikóta vyʼápe ha osẽ porãta chupekuéra opa mbaʼe. Upévare mokõivéva oñehaʼãvaʼerã”.