¿Mbaʼéichapa Ñandejára oñeñandu jahasa asy jave? ¿Ojepyʼapýpa ñanderehe? La Biblia heʼi Ñandejára añetehápe ojepyʼapyha ñanderehe ha oipotaha javyʼa. ¡Ajépa ñanembopyʼaguapyete jaikuaávo upéva! Ñandejára ningo hetaiterei mbaʼe porã omeʼẽ enterovépe káda día, tahaʼe umi ivuéno térã iñañávape. Jahechamína apóstol Pablo heʼi vaʼekue. (Elee Hechos 14:16, 17.)

Lístrape oĩ vaʼekue heta hénte ndoservíriva Ñandejárape, ha Pablo heʼi chupekuéra: “Yma [Ñandejára] oheja vaʼekue umi tetãnguérape ojapo ojaposéva, upéicharamo jepe, añetehápe umi mbaʼe porã ojapóvare oikuaauka peẽme mávapa haʼe, omboúvo ama yvágagui ha omeʼẽvo peẽme hetaiterei kóga. Haʼe hetaiterei tembiʼu omeʼẽ peẽme ha penembopyʼarory”. ¿Mbaʼéichapa ontende hikuái ko téxto heʼíva?

Umi oikóva Lístrape natekotevẽi oho puku ohecha hag̃ua mbaʼépa heʼise raʼe Pablo. Haʼekuéra ningo oiko vaʼekue peteĩ lugár osẽ porãitereihápe umi kóga. Pablo omomanduʼa chupekuéra Ñandejára ombouha pe ama ha Haʼe rupínte osẽ porãha umi kóga. Upévare, osẽ porã jave chupekuéra ikosécha térã hoʼu jave umi tembiʼu hepa jepéva, heʼi chupekuéra ohechakuaa hag̃ua Ñandejára ipyʼaporã rupínte ohupytyha hikuái umi mbaʼe.

Pe téxto jahecha vaʼekue ñanemboʼe heta mbaʼe iñimportánteva Jehovágui:

Jehová oheja ñandéve jadesidi mbaʼépa jajapóta. Jahechaháicha pe téxtope, Ñandejára oheja umi “tetãnguérape ojapo ojaposéva”. Upéva heʼise ohejaha chupekuéra odesidi pe tape iporãvéva chupekuéra g̃uarã. Jehová nañandejopýi jajapo hag̃ua hembipota, upéva rangue oheja ñandéve jadesidi mbaʼépa jajapóta (Deuteronomio 30:19).

Jehová oipota jaikuaa chupe. Pablo heʼi: “Umi mbaʼe porã ojapóvare, [Ñandejára] oikuaauka peẽme mávapa haʼe”. Añetehápe, “ndaikatúiramo jepe ojehecha Ñandejárape, [...] hembiapokuére” jahechakuaa iñarandu, imbaʼeporã, ipoderóso ha ñanderayhuha (Romanos 1:20, NM). Avei la Biblia rupive Ñandejára oikuaauka ñandéve mbaʼeichaguápa haʼe (2 Timoteo 3:16, 17). ¿Ndohechaukáipa upéva Ñandejára oipotaha jaikuaa porã chupe?

Jehová oipota javyʼa. Pablo heʼi avei: “[Ñandejára] hetaiterei tembiʼu omeʼẽ peẽme ha penembopyʼarory”. Umi hembiapo vai ha idesagradesídova jepe ikatu hoʼu hoʼuséva ha ovyʼa sapyʼami. Péro Ñandejára Jehová ndoipotái sapyʼamínte javyʼa, síno oipota javyʼa opa árare. Upévare jaikuaa porã vaʼerã chupe ha jajapo hembipota (Salmo 144:15; Mateo 5:3).

Ára ha ára ningo Ñandejára ohechauka imbaʼeporãha ñanendive. ¿Reikuaasépa mbaʼéichapa ikatu rehechauka reagradeseha chupe umi mbaʼe porãita omeʼẽvare ndéve?