Howhinwhẹn lẹ 19:1-29
19 E pọnte nado yin wamọnọ bo nọ zinzọnlin to tenọgli mẹ+
Hú nado yin nulunọ bo nọ dolalo.+
2 Mẹhe* ma tindo oyọnẹn ma yin mẹdagbe,+Podọ mẹhe nọ yinuwa aplà* to ylando wà.
3 Nulú mẹde tọn wẹ nọ hẹn aliho etọn gẹdẹ,Bọ ahun etọn nọ wá gblehomẹ sinsinyẹn do Jehovah go.
4 Adọkun nọ hẹnmẹ tindo họntọn susu,Ṣigba, mẹsusu nọ họ̀nna wamọnọ, etlẹ yin họntọn etọn.+
5 Kunnudetọ lalonọ ma na nọma yin yasana,+Podọ mẹhe nọ to lalodo mapote ma na họ̀ngán.+
6 Mẹsusu wẹ nọ dín nukundagbe omẹ nukundeji* de tọn,Mẹlẹpo wẹ sọ nọ jihọntọn hẹ mẹhe nọ nanúmẹ.
7 Nọvisunnu wamọnọ tọn lẹpo wẹ nọ gbẹwanna ẹn;+Nẹmunẹmu wẹ họntọn etọn lẹ ma nado nọ dapana ẹn!+
Ewọ nọ to godo na yé po obiọ etọn lẹ po, ṣigba mẹde ma nọ kẹnù demẹ na ẹn.
8 Mẹdepope he tindo zinzin* yiwanna ede.*+
Mẹdepope he yí wuntuntun whlá na tindo kọdetọn dagbe.*+
9 Kunnudetọ lalonọ ma na nọma yin yasana,Podọ mẹhe nọ to lalodo mapote na dọ̀n.+
10 E ma jẹ dọ nulunọ ni zan gbẹzan fẹẹmẹninọ tọn;Mọjanwẹ e ma jẹ dọ devizọnwatọ de ni dugán do ahọvi lẹ ji do niyẹn!+
11 Ayihaawe ma tin dọ zinzin mẹde tọn na hẹn ẹn whleawu nado gblehomẹ,+Podọ gigo wẹ e yin na ẹn nado nọ miọnnukundo* nuṣiwa.*+
12 Adi ahọlu tọn taidi hùnhlún kinnikinni* de tọn,+Ṣigba, nukundagbe etọn taidi ahun to ogbé lẹ ji.
13 Visunnu nulunọ nọ hẹn nugbajẹmẹji wá otọ́ etọn ji,+Podọ asi whẹgbènọ* taidi họta he nọ to osin kùn mapote.+
14 Ogú he otọ́ lẹ nọ namẹ wẹ owhé po adọkun po,Ṣigba, Jehovah wẹ nọ namẹ asi nuyọnẹntọ.+
15 Adidọ nọ hẹnmẹ damlọn yìkànmẹ,Podọ huvẹ na hù mẹhe* nọ dán lẹkàn-lẹkàn.+
16 Mẹhe nọ yìn gbedide nọ whlẹn ogbẹ̀* ede tọn;+Mẹhe nọ dovọ́na aliho etọn lẹ na kú.+
17 Mẹhe nọ do nukundagbe hia agbátọnọ to yinyan na Jehovah,+Ewọ nasọ suahọ ẹ na nuhe e wà.+
18 Domẹplọnlọ visunnu towe go to whenue todido gbẹ́ tin,+A dike okú etọn yin hihia dokọna we blo.*+
19 Mẹhe nọ yawu gblehomẹ na jiya etọn;Eyin a tẹnpọn nado whlẹn ẹn, be a dona nọ to mọwà mapote.+
20 Nọ dotoaina ayinamẹ bo nọ kẹalọyi mẹplọnlọ,+Na hiẹ nido yọnnuin to sọgodo.+
21 Tito he to ahun gbẹtọ tọn mẹ lẹ sù,Ṣigba, ayinamẹ* Jehovah tọn wẹ na hẹnai.+
22 Nuhe nọ dọnmẹdogo to gbẹtọ dè wẹ owanyi nugbo etọn;+Podọ e pọnte nado yin wamọnọ hú nado yin lalonọ.
23 Budisi Jehovah nọ namẹ ogbẹ̀;+Mẹhe tindo e na vò fẹẹ bọ nude ma na gbleawuna ẹn.+
24 Adidọnọ nọ ylọn alọ etọn do agbán daho mẹ,Ṣigba, e ma tlẹ nọ tẹnpọn nado hẹn ẹn gọwá onù.+
25 Hò mẹṣankotọ,+ na wunvinọ nido lẹzun zinzintọ,+Podọ wọhẹ mẹhe tindo nukunnumọjẹnumẹ, na ewọ nido yọnnuin dogọ.+
26 Mẹhe nọ ylanhùn do otọ́ etọn go bo nọ yàn onọ̀ etọn jẹgbonuWẹ visunnu he nọ hẹn winyan po flumẹjijẹ po wá.+
27 Visunnu ṣie, eyin hiẹ masọ nọ dotoaina mẹplọnlọ ba,Hiẹ na danbú sọn ohó nuyọnẹn tọn lẹ kọ̀n.
28 Kunnudetọ nuvọ́nọ nọ ṣàn whẹdida dodo kò,+Onù mẹylankan tọn sọ nọ ze nuylankan mì.+
29 Whẹdida wẹ to tepọn mẹṣankotọ lẹ,+Bọ obá to tepọn nẹgbé nulunọ lẹ tọn.+
Nudọnamẹ Odò Tọn
^ Kavi “Alindọn he.”
^ To paa mẹ, “nọ hẹn afọ etọn yá.”
^ Kavi “alọtlútọ.”
^ Kavi “alindọn etọn.”
^ To paa mẹ, “na mọ dagbe.”
^ To paa mẹ, “ahun.”
^ To paa mẹ, “jugbọn.”
^ Kavi “sẹ́nhẹngba.”
^ Kavi “kinnikinni winyanwinyan.”
^ Kavi “nutlọtọ.”
^ Kavi “alindọn he.”
^ Kavi “alindọn.”
^ Kavi “A dín okú etọn blo.” To paa mẹ, “A ze alindọn towe daga hlan okú etọn blo.”
^ Kavi “lẹndai.”
