Johanu 5:1-47
5 To ehe godo, hùnwhẹ+ Ju lẹ tọn de wá, Jesu sọ hẹji yì Jelusalẹm.
2 Todin, osindò de tin to Họngbo Lẹngbọ lẹ tọn+ ji to Jelusalẹm he nọ yin yiylọ to Heblugbe mẹ dọ Bẹtzata, he tindo agbà gaa* atọ́n.
3 Susugege mẹhe to azọ̀njẹ lẹ tọn, nukuntọ́nnọ lẹ, sẹkunọ lẹ po mẹhe afọ kavi alọ yetọn kúsẹ́ lẹ po mlọnai to yé mẹ.
4 ——*
5 Ṣigba, dawe de he ko to azọ̀njẹ na owhe 38 tin to finẹ.
6 Na Jesu mọ dawe ehe to aimimlọn to finẹ bo yọnẹn dọ e ko to azọ̀njẹ sọn ojlẹ dindẹn die wutu, e dọna ẹn dọmọ: “Be hiẹ jlo na jẹgangan ya?”+
7 Dawe he to azọ̀njẹ lọ gblọnna ẹn dọmọ: “Mẹdaho, n’ma tindo mẹde he na ze mi do osindò lọ mẹ to whenue osin lọ wlu, ṣigba eyin n’jei, mẹdevo nọ jẹnukọnna mi.”
8 Jesu dọna ẹn dọmọ: “Fọ́n! Ze ozàn* towe bo zinzọnlin.”+
9 Dawe lọ sọ jẹgangan to afọdopolọji bo ze ozàn* etọn bosọ jẹ zọnlinzin ji.
Gbọjẹzan de wẹ azán enẹ yin.
10 Enẹwutu, Ju lẹ jẹ didọna dawe he yin azọ̀nhẹngbọna lọ ji dọmọ: “Gbọjẹzangbe wẹ, podọ e ma sọgbe hẹ osẹ́n dọ hiẹ ni ze ozàn* towe gba.”+
11 Ṣigba, e gblọnna yé dọmọ: “Mẹlọ he hẹn mi jẹgangan wẹ dọna mi dọ, ‘Ze ozàn* towe bo zinzọnlin.’”
12 Yé kanbiọ ẹ dọmọ: “Mẹnu wẹ mẹlọ he dọna we dọ, ‘Ze ozàn* towe bo zinzọnlin’?”
13 Ṣigba, dawe he yin azọ̀nhẹngbọna lọ ma yọ́n mẹlọ, na Jesu ko biọ gbẹtọgun he to finẹ lọ ṣẹnṣẹn.
14 To onú ehelẹ godo, Jesu mọ ẹn to tẹmpli mẹ bo dọna ẹn dọmọ: “Pọ́n, hiẹ ko jẹgangan. A sọ waylando ba blo, na nuhe ylanhu de nikaa jọ do gowe.”
15 Dawe lọ tọ́nyi bo dọna Ju lẹ dọ Jesu wẹ hẹn ẹn jẹgangan.
16 Na ehe tọn wutu, Ju lẹ jẹ homẹkẹndo Jesu ji, na e to onú ehelẹ wà to Gbọjẹzangbe wutu.
17 Ṣigba, e gblọnna yé dọmọ: “Otọ́ ṣie zindonukọn to azọ́nwiwa mẹ kakajẹ din, yẹnlọsu sọ to nukọnzindo to azọ́nwiwa mẹ.”+
18 Na ehe tọn wutu, Ju lẹ jẹ aliho lẹpo dín ji nado hù i, na to linlẹn yetọn mẹ, e ma yin Gbọjẹzan kẹdẹ wẹ e ma yìn gba, ṣigba e sọ to Jiwheyẹwhe ylọdọ Otọ́ etọn+ bo to ede hẹn sọzẹn hẹ Jiwheyẹwhe.+
19 Enẹwutu, Jesu gblọnna yé bo dọmọ: “Nugbonugbo wẹ yẹn dọna mì dọ, Visunnu ma sọgan wà onú dopo tata to ojlo edetiti tọn mẹ, adavo nuhe e mọ Otọ́ to wiwà kẹdẹ.+ Na nudepope he e mọ bọ Ewọ to wiwà, onú ehelẹ wẹ Visunnu lọsu nọ wà ga.
20 Na Otọ́ yiwanna Visunnu lọ+ bo nọ do nuhe ewọ lọsu to wiwà lẹpo hia ẹ, podọ e nasọ do azọ́n he klohu ehelẹ hia ẹ, na awú nido ji mì.+
21 Na kẹdẹdile Otọ́ nọ fọ́n oṣiọ lẹ bo nọ na yé ogbẹ̀ do,+ mọ wẹ Visunnu lọsu nọ na ogbẹ̀ mẹdepope he jlo e do.+
22 Na Otọ́ ma nọ dawhẹna mẹdepope, ṣigba ewọ ko ze whẹdida lẹpo do alọmẹ na Visunnu lọ,+
23 na mẹlẹpo nido sọgan gbògbéna Visunnu lọ kẹdẹdile yé nọ gbògbéna Otọ́ do. Mẹdepope he ma gbògbéna Visunnu ma gbògbéna Otọ́ he do e hlan.+
24 Nugbonugbo wẹ yẹn dọna mì dọ, mẹdepope he sè ohó ṣie bo yí Mẹhe do mi hlan sè na mọ ogbẹ̀ madopodo,+ podọ ewọ ma na yin whẹdana ṣigba e ko tọ́n sọn okú mẹ biọ ogbẹ̀ mẹ.+
25 “Nugbonugbo wẹ yẹn dọna mì dọ, ojlẹ lọ ja, din sọ wẹ, whenuena oṣiọ lẹ na sè ogbè Visunnu Jiwheyẹwhe tọn lọ tọn bọ mẹhe ko dotoai lẹ na nọgbẹ̀.
26 Na kẹdẹdile Otọ́ tindo huhlọn nado namẹ ogbẹ̀* do,+ mọ wẹ e ko na huhlọn Visunnu lọsu do ga nado namẹ ogbẹ̀.+
27 Podọ e ko na ẹn aṣẹ nado dawhẹ,+ na Visunnu gbẹtọ tọn wẹ ewọ yin wutu.+
28 Ehe paṣa mì blo, na ojlẹ lọ ja, to ehe mẹ mẹhe to yọdò oflin tọn lẹ mẹ lẹpo na sè ogbè etọn+
29 bo tọ́njẹgbonu, mẹhe wà dagbe lẹ na fọnsọnku ogbẹ̀ tọn bọ mẹhe wà nuylankan lẹ na fọnsọnku whẹdida tọn.+
30 Yẹn ma sọgan wà onú dopo tata sọn ojlo ṣie titi mẹ gba. Kẹdẹdile yẹn sè do, mọ wẹ yẹn nọ dawhẹ do, podọ owhẹ̀ dodo wẹ yẹn nọ dá,+ na yẹn ma nọ dín nuhe yin ojlo ṣie titi gba, adavo nuhe yin ojlo ewọ he do mi hlan tọn.+
31 “Eyin yẹn dopo dekunnu gando dee titi go, kunnudide ṣie ma yin nugbo.+
32 Mẹdevo de nọ dekunnu gando go e, podọ yẹn yọnẹn dọ kunnu he ewọ nọ de gando go e yin nugbo.+
33 Mìwlẹ ko domẹhlan Johanu dè, bọ ewọ ko dekunnu gando nugbo lọ go.+
34 Ṣigba, yẹn ma nọ kẹalọyi kunnudide he wá sọn gbẹtọ dè, amọ́ yẹn dọ onú ehelẹ na mìwlẹ nido sọgan yin whinwhlẹngán.
35 Miyọ́ngbán he to titá bo to hinhọ́n na de wẹ dawe enẹ, podọ mìwlẹ to jijlo nado jaya tlala to hinhọ́n etọn mẹ na ojlẹ gli de.+
36 Ṣigba, yẹn tindo kunnudide lọ he klohu Johanu tọn, na azọ́n lọ lẹ lọsu he Otọ́ ṣie ko dena mi nado wadotana, yèdọ azọ́n ehelẹ he yẹn to wiwà, dekunnu dọ Otọ́ wẹ do mi hlan.+
37 Podọ Otọ́ he do mi hlan lọsu ko dekunnu gando go e.+ Mìwlẹ ma ko sè ogbè etọn kavi mọ ẹn pọ́n,+
38 podọ ohó etọn ma tin to mì mẹ, na mì ma yí mẹlọ he e dohlan sè wutu.
39 “Mì to dogbapọnna Owe-wiwe lẹ,+ na mì lẹndọ mì sọgan mọ ogbẹ̀ madopodo gbọn enẹlẹ gblamẹ; podọ ehelẹ* lọsu wẹ dekunnu gando go e.+
40 Ṣogan, mìwlẹ ma jlo na wá dè e,+ na mì nido sọgan mọ ogbẹ̀.
41 Yẹn ma nọ kẹalọyi gigo he wá sọn gbẹtọ lẹ dè gba,
42 ṣigba yẹn yọnẹn ganji dọ mì ma tindo owanyi Jiwheyẹwhe tọn to mì mẹ.
43 Yẹn wá to oyín Otọ́ ṣie tọn mẹ, ṣigba mìwlẹ ma yí mi. Eyin mẹdevo wá to oyín edetiti tọn mẹ, mìwlẹ na yí omẹ enẹ.
44 Nawẹ mì sọgan yise do, to whenue mì to alọkẹyi gigo he wá sọn ode awetọ dè bọ mì ma to gigo he wá sọn Jiwheyẹwhe dopo kẹdẹ lọ dè dín?+
45 Mì lẹndọ yẹn na sawhẹdokọna mì to Otọ́ dè blo; mẹde tin he nọ sawhẹdokọna mì, yèdọ Mose,+ mẹhe mẹ mìwlẹ ko ze todido mìtọn do.
46 Na nugbo tọn, eyin mìwlẹ ko yí Mose sè, mì na ko yí mi sè, na ewọ kanwe gando go e.+
47 Ṣigba, eyin mìwlẹ ma yí kandai ewọ tọn lẹ sè, nawẹ mì na yí nuhe yẹn dọ lẹ sè gbọn?”
Nudọnamẹ Odò Tọn
^ Enẹ wẹ, agbà gaa de he tindo dòtin lẹ to adà awe lẹ ji he họ̀gbánu lẹ tin to e ji.
^ Kavi “adọzan.”
^ Kavi “adọzan.”
^ Kavi “adọzan.”
^ Kavi “adọzan.”
^ Kavi “adọzan.”
^ Kavi “tindo nunina ogbẹ̀ tọn to ede mẹ.”
^ Enẹ wẹ, Owe-wiwe lẹ.
