SỌGBE hẹ kandai wẹndagbe Matiu tọn, mí hia dọ, “Jesu sọ biọ tẹmpli lọ mẹ bo yàn mẹhe to nusà po mẹhe to nuhọ̀ to tẹmpli lọ mẹ lẹpo po jẹgbonu, e sọ takitina tafo akuẹdiọtọ lẹ po aisinnu mẹhe to apoe sà lẹ po tọn lẹ. E sọ dọna yé dọmọ: ‘E ko yin kinkan dọ, “Ohọ̀ ṣie na yin yiylọdọ ohọ̀ odẹ̀ tọn,” ṣigba mìwlẹ to hinhẹn ẹn zun odò jaguda lẹ tọn.’”—Mat. 21:12, 13.

Kandai whenuho Juvi lẹ tọn dohia dọ ajọwatọ tẹmpli mẹ tọn lẹ nọ tafu ahisinọ yetọn lẹ gbọn ahi vivẹ́ didona yé dali. Di apajlẹ, kandai Mishna (Keritot 1:7) tọn lẹ dohia dọ to ojlẹ de mẹ to owhe kanweko tintan W.M., akuẹ he nọ họ̀ awhànnẹ avọ́sinsan tọn awe yiaga sọ denali sika tọn dopo. Azọ́nkuẹ he pakanọ he ma plọnazọ́n de sọgan dù to azán 25 gblamẹ niyẹn. Wamọnọ lẹ wẹ sọgan yí awhànnẹ kavi owhlé lẹ do sanvọ́; etomọṣo, ohẹ̀ ehelẹ lọsu ko vẹahi zẹjlẹgo. (Lev. 1:14; 5:7; 12:6-8) Ninọmẹ ajọwiwa tọn ehe hẹn homẹgble Labi Simeon ben Gamaliel bọ e de sọha avọ́sinsan he yin dandan tọn lẹ tọn pò, podọ to afọdopolọji akuẹ he nọ họ̀ awhànnẹ awe wá odò bo lẹzun mado kanweko akuẹ dai tọn lọ tọn.

Sọgbe hẹ zẹẹmẹ ehelẹ, owhẹ̀ Jesu tọn whẹ́n nado ylọ ajọwatọ tẹmpli mẹ tọn lẹ dọ “jaguda lẹ,” na mẹhodutọ po nukunkẹnnọ lẹ po wẹ yé wutu.