Ninọmẹ sinsinyẹn lẹ wẹ nọ hẹn lẹnpọn wá. Ehe nọ zọ́n bọ apọ̀n mítọn nọ sisẹ́ nugonu he to homẹ lẹ nado wleawuna osin (hormone) lẹ do agbasa mítọn blebu mẹ. Podọ ahun mítọn nọ hò taun, ohùn nọ sà po huhlọn po, afuje lẹ nọ vlọ́n kavi nọ bọ̀ bléblé, bọ agbasakàn lẹ nọ wún yede. Whẹpo mí na tlẹ do yọnẹn, agbasa mítọn ko nọ sisẹ́ mí nado yinuwa to ninọmẹ mọnkọ lẹ mẹ. Eyin ninọmẹ lọ juwayi, agbasa lọ nọ gọjẹ azọ́nwa ji dile e jẹ do.

Nulẹnpọn tlolo he ninọmẹ sinsinyẹn kavi owù tọn de fọ́n nọ sisẹ́ mí nado yinuwa. Apọ̀n mítọn wẹ nọ wazọ́n enẹ. To whedelẹnu, nulẹnpọn nọ gọalọ nado jẹ yanwle mẹtọn lẹ kọ̀n kavi wazọ́n ganji, vlavo to tẹnpọn wehọmẹ tọn, hokansemẹ, kavi aihundida de whenu.

Amọ́, lẹnpọn glanglan nọ hẹnnugble to mẹgo. Lẹnpọn mọnkọ gán doazọ̀n we, yinuwado numọtolanmẹ towe lẹ ji podọ do ayiha towe ji. Walọ towe, kakajẹ aliho he mẹ a nọ yinuwa hẹ mẹdevo lẹ te ji gán diọ. Lẹnpọn glanglan gán planmẹ jẹ ahànnunu zẹjlẹgo po walọ mọnkọ devo lẹ po kọ̀n. E tlẹ gán zọ́n bọ a na nọ mọ apọ̀, jẹflumẹ bo gán jlo na hù dewe.

Lẹnpọn ma nọ yinuwado mẹlẹpo ji to aliho dopolọ mẹ, amọ́ e gán fọ́n azọ̀n voovo delẹ dote. Humọ, diblayin agbasa towe blebu ji wẹ e gán yinuwado.