NA MẸJITỌ LẸ
5: Hodọdopọ
NUHE E ZẸẸMẸDO
Hodọdopọ dagbe nọ tin eyin mẹjitọ lẹ po ovi lẹ po nọ dọ linlẹn po numọtolanmẹ yetọn lẹ po tọ́n.
NUHEWUTU E YIN NUJỌNU
Hodọdopọ gán vẹawu, titengbe hẹ jọja lẹ. Vlavo to dai, “ovi towe lẹ gán nọ dọ nulẹpo na we gando yede go. Amọ́, todin he yé jẹ whinwhẹ́n ji, yé masọ nọ dọ nulẹpo na we ba, enẹ zọ́n bọ a ma gán yọ́n linlẹn po numọtolanmẹ yetọn lẹ po ba” wẹ owe de dọ. (Breaking the Code) Eyin enẹ tlẹ wá jẹ jijọ ji, a dona yọnẹn dọ ojlẹ enẹ mẹ wẹ a dona nọ dọho hẹ ovi towe lẹ te hugan!
NUHE A SỌGAN WÀ
Wleawufo nado dọhodopọ hẹ ovi towe to whedepopenu. Eyin e tlẹ biọ dọ mì ni dọhodopọ to zánhomẹ, nọ wàmọ.
“A gán nọ do numọtolanmẹ lọ dọ, ‘Din ján a mọ bo na dọho a? Yẹn po hiẹ po janwẹ tofi sọn afọnnu gbọ́n!’ Amọ́, naegbọn mí nado wule eyin ovi mítọn jlo na dọho hẹ mí? Be e ma yin nue mẹjitọ lẹpo nọ jlo niyẹn ya?”—Yọnnu de he nọ yin Lisa.
“N’ma nọ yí amlọn ṣie do daihun, amọ́ zánhomẹ wẹ n’nọ saba dọho hẹ ovi ṣie jọja lẹ ganji.”—Sunnu de he nọ yin Herbert.
AYINAMẸ BIBLU TỌN: “Mì gbọ mẹdopodopo ni nọ dín, e ma yin ale edetiti tọn gba, ṣigba dehe yin mẹdevo tọn.”—1 Kọlintinu lẹ 10:24.
Duto nuhe nọ fẹayihasẹnamẹ lẹ ji. Otọ́ de dọ dọ: “To whedelẹnu, ayiha ṣie nọ to dindanpe to whenue ovi ṣie lẹ to hodọ hẹ mi. Bọ yé nọ mọdọ n’ma to ayidonugo na emi!”
Eyin enẹ nọ jọ do gowe, nọ ṣí Tele, alokan kavi onú mọnkọtọn he na fẹayihasẹna we. Nọ dotoai bo nọ na ayidonugo nuhe dọ ovi towe te ganji, eyin nue dọ e te ma tlẹ di nujọnu na we sọmọ.
“Mí dona nọ hẹn ovi mítọn lẹ deji dọ nuhe to ahun ji na yé lẹ yin nujọnu na mí. Ni e ma yinmọ, yé ma nasọ nọ dọ homẹ na mí ba kavi yé na nọ dọ ẹ na mẹdevo.”—Yọnnu de he nọ yin Maranda.
“Ma nọ yawu gblehomẹ blo, eyin nuhe ovi towe dọ ma tlẹ sọgbe paali.”—Sunnu de he nọ yin Anthony.
AYINAMẸ BIBLU TỌN: “Mì payi lehe mì nọ dotoai do go.”—Luku 8:18.
Nọ yí dotẹnmẹ hundote lẹ zan. To whedelẹnu, ovi lẹ nọ voawu bo nọ dọho eyin yé ma sinai pannukọn mẹjitọ yetọn.
“Mí nọ dọhodopọ eyin mí to mọto mẹ. Na mí nọ sinai do apá na mídelẹ bo ma nọ pannukọn míde wutu, mí nọ dọhodopọ ganji.”—Yọnnu de he nọ yin Nicole.
Núdùdù whenu lẹ sọ nọ yọ́n na hodọdopọ taun.
“To núdùdù dopọ whenu, mẹdopodopo nọ dọ nuylankan po nudagbe he jọ to azán lọ ji lẹ po. Ehe nọ hẹn mí vẹ́ dogọ bọ mí nọ mọdọ mí gán gọalọna míde eyin mí pehẹ nuhahun lẹ.”—Sunnu de he nọ yin Robin.
AYINAMẸ BIBLU TỌN: “Nọ yawu nado dotoai [bo nọ] whleawu nado dọho.”—Jakọbu 1:19.
A Gán Sọ Pọ́n Hosọ Ehelẹ
ATỌ̀HỌ̀-NUHIHỌ́ LỌ TỌN
Hodọdopọ hẹ Jọja Aflanmẹ Lẹ
Nawẹ hiẹ sọgan dọhodopọ hẹ jọja aflanmẹ he ma nọ jlo na kẹnù de gbọn?
NUHE BIBLU PLỌN MÍ
Alọgọ Na Jọja Lẹ
Pọ́n lehe Biblu sọgan gọalọ nado duto nuhahun he jọja lẹ nọ saba pehẹ lẹ ji do.
