Dọnsẹpọ Jiwheyẹwhe

E Nọ Flindọ “Kọ́gudu Wẹ Mí”

MẸMẸYỌNNU de wlan gando nuṣiwa etọn he ko wayi lẹ go dọmọ: “N’ma yise dọ Jehovah sọgan jona mi mlẹnmlẹn, podọ n’lẹndọ n’na hẹn agbàn ehe to gbẹzan ṣie lẹpo mẹ.” Na nugbo tọn, agbàn pinpẹn de wẹ e nọ yin to whenue ayihadawhẹnamẹnu mẹde tọn to whẹgbledo e. Ṣigba, Biblu do nuhe sọgan de awufiẹsa lọ sọn ylanwatọ he lẹnvọjọ lẹ ji hia. Lẹnnupọndo hogbe Psalm-kantọ Davidi tọn he tin to Psalm 103:8-14 mẹ lẹ ji.

Davidi yọnẹn dọ ‘lẹblanunọ wẹ Jehovah’ podọ e ma nọ “yí whepoponu do [to nuṣiwa]” mítọn dín. (Wefọ 8-10) Whedepopenu he Jiwheyẹwhe mọ whẹwhinwhẹ́n nado do lẹblanu hia, e nọ do e hia susugege podọ to gigọ́ mẹ. Davidi, ohó milomilo-kantọ dagbe de yí hogbe nuyijlẹdonugo tọn atọ̀n zan nado basi zẹẹmẹ lẹblanu yiaga he Jiwheyẹwhe nọ dohia mí tọn.

“Le olọn yiaga hú aigba do, sọmọ wẹ dagbewanyi etọn hlan mẹhe dibusi i lẹ dali.” (Wefọ 11) Eyin mí pọ́n agahomẹ to ozán mẹ, mí ma sọgan yọ́n lehe olọn he gọ́ na sunwhlẹvu lẹ dẹn do aigba do. Enẹwutu, Davidi do lehe lẹblanu Jehovah tọn sù do hia, yèdọ jẹhẹnu he tindo kanṣiṣa hẹ owanyi etọn. Lẹblanu ehe na yin didohia “mẹhe dibusi” Jiwheyẹwhe lẹ—yèdọ mẹhe tindo “whiwhẹ kavi sisi na aṣẹpipa etọn sọn ahun mẹ wá” lẹ, wẹ weyọnẹntọ de dọ.

“Dile whèzẹtẹn dẹn do whèyihọ do, dẹn sọmọ wẹ ewọ do ze sẹ́nmẹjẹ mítọn yì dẹn sọn mí dè.” (Wefọ 12) Nawẹ e dẹnsọ? E dẹn hugan nuhe mí sọgan lẹn. Owe he basi zẹẹmẹ do Biblu ji de dọmọ: “Dile mẹde basi gbejizọnlin gbọn jẹhọn mẹ yì whèzẹtẹn-waji dẹnsọ, mọ wẹ e na to dindẹn do whèyihọ-waji do niyẹn.” Davidi dọna mí to wefọ ehe mẹ dọ eyin Jiwheyẹwhe jo ylando mítọn lẹ na mí, e nọ ze yé do fihe dẹn taun do mí hugan nuhe mí sọgan lẹn.

“Taidi le otọ́ de nọ blawuna ovi etọn lẹ do, mọ wẹ OKLUNỌ nọ blawuna yé he dibusi i lẹ do.” (Wefọ 13) Davidi he yin otọ́ de, yọ́n numọtolanmẹ he otọ́ owanyinọ de nọ tindo. Otọ́ mọnkọtọn nọ yin whinwhàn nado do awuvẹmẹ hia ovi etọn lẹ, titengbe to whenue yé to awufiẹsa mẹ. Davidi hẹn mí deji dọ Otọ́ owanyinọ olọn mẹ tọn mítọn nọ do lẹblanu hia ovi aigba ji tọn etọn lẹ, titengbe to whenue yé lẹnvọjọ bọ ahun yetọn ‘gbà bo finyọ́n’ na ylando yetọn lẹ wutu.—Psalm 51:17.

To nuyijlẹdonugo atọ̀n lọ lẹ godo, Davidi do nuhe nọ whàn Jehovah nado do lẹblanu hia gbẹtọvi mapenọ lẹ hia mí dọmọ: “Ewọ yọ́n didá mítọn; e sọ flindọ kọ́gudu wẹ mí.” (Wefọ 14) Jehovah yọnẹn dọ nudida he yin bibasi po kọ́gudu po wẹ mí yin bo tindo awugbopo po oblọ susu po. Na ylandonọ-yinyin mítọn nọ duahunmẹna Jehovah wutu, e nọ “wleawu nado jona”—eyin mí gbẹ́ do lẹnvọjọ nujọnu tọn hia.—Psalm 86:5.

Be hogbe Davidi tọn lẹ gando lẹblanu Jehovah tọn go ma yinuwado jiwe ya? Yọnnu he yin nùdego to bẹjẹeji lọ plọn nuhe Biblu dọ gando awuwiwle Jiwheyẹwhe tọn nado jonamẹ go, podọ e yin whinwhàn nado dọmọ: “N’wá mọdọ n’sọgan dọnsẹpọ Jehovah nugbonugbo, podọ n’tindo numọtolanmẹ dọ agbàn pinpẹn de yin didesọn ji e.” a Naegbọn hiẹ ma nado plọn nususu dogọ gando lẹblanu Jiwheyẹwhe tọn po lehe hiẹ sọgan mọ ẹn yí do po go? Vlavo hiẹ lọsu sọgan mọdọ agbàn pinpẹn de na yin didesọn jiwe.

[Nudọnamẹ odò tọn]

[Nudọnamẹ tangan lẹ to weda 23]

“N’wá mọdọ n’sọgan dọnsẹpọ Jehovah nugbonugbo, podọ n’tindo numọtolanmẹ dọ agbàn pinpẹn de yin didesọn ji e”