ZẸẸMẸ WEFỌ BIBLU TỌN LẸ TỌN
Jenẹsisi 1:1—“To Whẹwhẹwhenu Jiwheyẹwhe Dá Olọn po Aihọn Po”
“To bẹjẹeji Jiwheyẹwhe dá olọn lẹ po aigba po.”—Jenẹsisi 1:1, Lẹdogbedevomẹ Aihọn Yọyọ Tọn.
“To whẹwhẹwhenu Jiwheyẹwhe dá olọn po aihọn po.”—Jenẹsisi 1:1, Biblu Wiwe lọ—Gun Alada.
Zẹẹmẹ Jenẹsisi 1:1 Tọn
Hodidọ bẹjẹeji tọn Biblu tọn ehe donù nugbo titengbe awe delẹ go. Tintan, “olọn lẹ po aigba po,” yèdọ wẹkẹ yinukundomọ lọ, tindo bẹjẹeji. Awetọ, yé yin didá gbọn Jiwheyẹwhe dali.—Osọhia 4:11.
Biblu ma dọ whenue gbọ́n Jiwheyẹwhe dá wẹkẹ lọ, mọjanwẹ e ma basi zẹẹmẹ lehe e dá ẹ do tọn niyẹn. Amọ́, Biblu dọ poun dọ ewọ dá wẹkẹ lọ gbọn “huhlọn daho he gbloada etọn po huhlọn jiawu etọn po” gblamẹ.—Isaia 40:26.
Hogbe lọ “dá” yin lẹdogbedevomẹ hogbe Heblugbe de tọn he nọ yiyizan nado basi zẹẹmẹ nuhe Jiwheyẹwhe lọsu basi tọn. a To Biblu mẹ, Jehovah b Jiwheyẹwhe kẹdẹ wẹ hogbe lọ Mẹdatọ nọ dlẹnalọdo.—Isaia 42:5; 45:18.
Nujijọ He Lẹdo Jenẹsisi 1:1 Lẹ
Wefọ tintan owe Jenẹsisi tọn ehe wẹ bẹ kandai nudida tọn he tin to Jenẹsisi weta 1 po 2tọ po mẹ jẹeji. Bẹsọn Jenẹsisi 1:1 jẹ 2:4, Biblu basi zẹẹmẹ lehe Jiwheyẹwhe dá aigba po nutogbẹ̀ he to e ji lẹpo po do tọn, kakajẹ sunnu po yọnnu tintan lọ po ji. To todohukanji paa ehe godo, Biblu na zẹẹmẹ gigọ́ gando lehe sunnu po yọnnu po yin didá do go.—Jenẹsisi 2:7-25.
Owe Jenẹsisi tọn basi zẹẹmẹ dọ Jiwheyẹwhe dá nulẹ debọdo-dego to gblagbla “azán” ṣidopo tọn mẹ. Azán lọ lẹ ma yin azán paa gànhiho 24 tọn lẹ, amọ́ ojlẹ he tedidi yetọn ma sọgan yin yinyọnẹn lẹ wẹ. Na nugbo tọn, hogbe lọ “azán” sọgan dlẹnalọdo ojlẹ devo lẹ he ma yin gànhiho 24. Ehe yin didohia to Jenẹsisi 2:4 mẹ, he yí hogbe lọ lẹ “azán” po “ojlẹ” po zan nado dlẹnalọdo nudopolọ bo blá nuhe Jiwheyẹwhe dá to azán ṣidopo lọ lẹpo gblamẹ dopọ taidi dọ yé wá aimẹ to “azán” dopo gbè wẹ nkọ.
Pọndohlan agọ̀ lẹ gando Jenẹsisi 1:1 go
Pọndohlan agọ̀: Jiwheyẹwhe dá wẹkẹ yinukundomọ lọ to owhe fọtọ́n kleun delẹ die.
Nugbo lọ: Biblu ma dọ whenue wẹkẹ lọ yin didá. Hodidọ he tin to Jenẹsisi 1:1 mẹ ma jẹagọdo nue lẹnunnuyọnẹntọ lẹ wá dọ to agọe dọ wẹkẹ lọ ko do owhe liva susu lẹ. c
Pọndohlan agọ̀: Jenẹsisi 1:1 to didohia dọ Jiwheyẹwhe yin Atọ̀n-to-Dopomẹ, na hogbe Heblugbe tọn he yin yiyizan na “Jiwheyẹwhe” to wefọ ehe mẹ nọ dlẹnalọdo mẹsusu wutu.
Nugbo lọ: Tẹnmẹ-yinkọ lọ “Jiwheyẹwhe” yin lẹdogbedevomẹ hogbe Heblugbe tọn lọ ’Elo·himʹ tọn, ehe nọ dlẹnalọdo mẹsusu, nado do gigo kavi gbégbò he mẹde jẹna hia, e ma yin sọha gbẹtọ tọn. Wezẹhomẹ lọ New Catholic Encyclopedia dohia dọ hogbe lọ ’Elo·himʹ he nọ yin yiyizan na mẹsusu dile e sọawuhia to Jenẹsisi 1:1 mẹ do, “nọ dlẹnalọdo mẹdopo to whelẹponu, bo to nùzindo ... gigo he mẹlọ tindo ji, e ma yin sọha wẹ e to alọdlẹndo.”—Zinjẹgbonu Awetọ, Bladopọ 6tọ, weda 272.
Hia Jenẹsisi weta 1, gọna nudọnamẹ odò tọn lẹ po alọdlẹndonu ṣẹnṣẹn tọn lẹ po.
a Biblu de he nọ yin HCSB Study Bible dọ gando hogbe ehe go dọmọ: “Eyin hogbe nuyiwa tọn Heblugbe tọn lọ bara’, he zẹẹmẹdo ‘nado dá’ yin yiyizan, e ma nọ dlẹnalọdo nude he gbẹtọvi gán basi. Gbọnmọ dali, bara’ to alọdlẹndo azọ́n de he Jiwheyẹwhe kẹdẹ gán wà.”—Weda 7.
b Jehovah wẹ oyín Jiwheyẹwhe tọn.—Salmu lẹ 83:18.
c Gando ojlẹ he hogbe Heblugbe tọn he yin lilẹdo “to bẹjẹeji” dlẹnalọdo go, Le Commentaire interprétatif de la Bible [Glẹnsigbe] dọmọ: “Hogbe lọ ma do tedidi kavi ojlẹ he e dẹnsọ hia.”—Zinjẹgbonu He Yin Vivọjlado, Bladopọ I, weda 51.
A Gán Sọ Pọ́n Hosọ Ehelẹ
GBLỌNDO NA KANBIỌ SINAI DO BIBLU JI LẸ
Be Jiwheyẹwhe Dá Nutogbẹ̀ Voovo lẹ bọ Yé Nọ Wá Aimẹ Na Yede Wẹ Ya?
Biblu ma dọ nudepope he jẹagọdo zẹẹmẹ lẹnunnuyọnẹntọ lẹ tọn lọ, dọ nutogbẹ̀ wunmẹ dopolọ lẹ nọ wá gbọnvona yedelẹ to whedelẹnu.
NUPLỌNMẸ TANGAN BIBLU TỌN LẸ
Be Wẹkẹ lọ Yin Didá Wẹ Ya?
Mẹlẹ nọ saba mọnukunnujẹ kandai Biblu tọn mẹ to aliho agọ̀ mẹ kavi tlẹ nọ pọ́n ẹn hlan di otàngblo de. Be mí gán dejido nue Biblu dọ go ya?
NUHE BIBLU PLỌN MÍ
Azọ́nwanu Biblu Pinplọn Tọn Lẹ
De azọ́nwanu he a nado plọn Biblu po awuvivi po to aliho debọdo-dego tọn mẹ lẹ.
NUHE BIBLU PLỌN MÍ
Tẹ́n Tito Biblu Pinplọn Tọn Mítọn Pọ́n
A gán plọnnu vọnu hẹ mẹplọntọ de nukun sọ nukun nado mọ ayinamẹ sinai do Biblu ji lẹ yí.
